മലയാളികള്‍ പ്രാര്‍ത്ഥനയോടെ ഷിരൂരിലേക്കാണ്. ഷിരൂരില്‍ മണ്ണിടിഞ്ഞു കാണാതായ ലോറിക്കകത്ത് ഡ്രൈവര്‍ കോഴിക്കോട് കണ്ണാടിക്കല്‍ സ്വദേശി അര്‍ജുന്‍ (30) ഉണ്ടോ എന്നു സ്ഥിരീകരിക്കാനായില്ല. ഇന്നലെ പകല്‍ തെര്‍മല്‍ ഇമേജിങ് പരിശോധനയില്‍ പുഴയ്ക്കടിയിലെ ലോറിക്കകത്ത് മനുഷ്യശരീരത്തിന്റെ സാന്നിധ്യം കണ്ടെത്താനായില്ല. പരിശോധന രാത്രിയും തുടരുകയാണ്.

രാത്രി നദിയിലെ തണുപ്പേറുമ്പോള്‍ ഈ പരിശോധനയ്ക്കു കൃത്യതയേറുമെന്ന് തിരച്ചിലിനു നേതൃത്വം നല്‍കുന്ന റിട്ട. മേജര്‍ ജനറല്‍ ഇന്ദ്ര ബാലന്‍ പറഞ്ഞു. ലോറിയുടെ ഡ്രൈവിങ് കാബിന്‍ തകര്‍ന്നിട്ടില്ലെന്ന് ഇന്നലെ ഡ്രോണ്‍ പരിശോധനയില്‍ വ്യക്തമായി. കാബിനും പിന്‍വശവും വേര്‍പെട്ട നിലയിലാണെങ്കില്‍ പുതിയൊരു സിഗ്‌നല്‍ കൂടി കിട്ടണം. ഇന്നലെ അത്തരത്തില്‍ സിഗ്‌നല്‍ ലഭിച്ചിട്ടില്ല.

സാധാരണഗതിയില്‍ കാബിന്‍ തകരാനുള്ള സാധ്യത വിരളമാണെന്ന് ലോറി നിര്‍മാതാക്കളും അറിയിച്ചു. അപകടം സംഭവിച്ചപ്പോള്‍ കാബിന്‍ ലോക്കാകുന്ന സിസ്റ്റം പ്രവര്‍ത്തിച്ചിട്ടുണ്ടാകാം. അര്‍ജുന്‍ വാഹനത്തിനകത്തായിരുന്നെങ്കില്‍ കാബിനില്‍ കുടുങ്ങിക്കിടപ്പുണ്ടാകണം. ജിപിഎസ് വിവരങ്ങള്‍ പ്രകാരം, അപകട സമയത്ത് ലോറിയുടെ എന്‍ജിന്‍ ഓണാണ്. ഇതാണ് അര്‍ജുന്‍ ലോറിക്കകത്ത് ഉണ്ടെന്നു കരുതാനുള്ള സാധ്യത.

അതേസമയം, ലോറി ഓഫാക്കാതെ പുറത്തിറങ്ങാനുള്ള സാധ്യതയുമുണ്ട്. അര്‍ജുന്‍ ലോറി നിര്‍ത്തി ചായക്കടയിലേക്കു പോയപ്പോള്‍ മണ്ണിടിച്ചിലിനൊപ്പം പുഴയിലേക്കു വീണതാകാനും സാധ്യതയുണ്ടെന്ന് കാര്‍വാര്‍ എംഎല്‍എ സതീഷ് കൃഷ്ണ സെയില്‍ പറഞ്ഞു. ലോറിയിലെ ഏതാനും മരത്തടികള്‍ കിലോമീറ്ററുകള്‍ അകലെയുള്ള ഗ്രാമത്തില്‍ പുഴയോരത്തു കണ്ടെത്തി. 400 അക്കേഷ്യ തടികളാണ് ലോറിയില്‍ ഉണ്ടായിരുന്നത്.

അതേസമയം മണ്ണിടിച്ചിലില്‍ കാണാതായ അര്‍ജുന് വേണ്ടിയുള്ള രക്ഷാദൗത്യം പത്താം ദിനവും വ്യക്തമായ ഉത്തരമില്ലാതെ ഇന്നലെ അവസാനിച്ചു. രാത്രി നടക്കേണ്ട ഡ്രോണ്‍ പരിശോധന തടസ്സപ്പെട്ടതോടെയാണ് രക്ഷാപ്രവര്‍ത്തനം അനിശ്ചിതത്വത്തിലായത്. ഗംഗാവലി പുഴയിലെ നീരൊഴുക്ക് വര്‍ധിച്ചതോടെ നാവികസേനാ ഡൈവിങ് സംഘം തിരച്ചില്‍ അവസാനിപ്പിച്ചിരുന്നു. പുഴയില്‍നിന്ന് 20 അടി താഴ്ചയില്‍ കണ്ടെത്തിയ ലോഹഭാഗങ്ങള്‍ അര്‍ജുന്‍ ഓടിച്ചിരുന്ന ലോറിയുടേതു തന്നെയാണെന്ന് ദൗത്യ സംഘം സ്ഥിരീകരിച്ചു. എന്നാല്‍, ഏറ്റവും ഒടുവില്‍ നടത്തിയ ഡ്രോണ്‍ പരിശോധനയിലും പുഴയ്ക്കടിയില്‍ മനുഷ്യസാന്നിധ്യം സ്ഥിരീകരിക്കാന്‍ ദൗത്യ സംഘത്തിന് സാധിച്ചിട്ടില്ല.

ഓറഞ്ച് അലര്‍ട്ടുള്ള ഷിരൂരില്‍ ശക്തമായ മഴയാണ് ഇടവിട്ട് പെയ്തത്. ഇതോടെയാണ് പുഴയിലെ നീരൊഴുക്ക് വലിയ രീതിയില്‍ വര്‍ധിച്ചതെന്ന് ദൗത്യ സംഘത്തിന് നേതൃത്വം നല്‍കുന്ന മലയാളി റിട്ട. മേജര്‍ ജനറല്‍ ഇന്ദ്രബാലന്‍ നമ്പ്യാര്‍ പറഞ്ഞു. 2 നോട്ട് വരെ ശക്തിയുള്ള അടിയൊഴുക്കിലൂടെയാണ് നാവികസേനാ ഡൈവര്‍മാര്‍ക്ക് മുങ്ങിത്തപ്പാന്‍ സാധിക്കുക. ചിലസമത്ത് ജീവന്‍ പണയം വച്ച് മൂന്ന് നോട്ട് അടിയൊഴുക്കിലും നാവികസേന രക്ഷാപ്രവര്‍ത്തനത്തിന് ഇറങ്ങാറുണ്ട്. എന്നാല്‍ നിലവില്‍ ഗംഗാവലി പുഴയില്‍ 6 8 വരെ നോട്ടാണ് അടിയൊഴുക്കിന്റെ ശക്തി. ഇതില്‍ ഡൈവര്‍മാര്‍ ഇറങ്ങുന്നത് ആത്മഹത്യാപരമാണെന്നും ഇന്ദ്രബാലന്‍ നമ്പ്യാര്‍ പറഞ്ഞു.

നിലവില്‍ ലോഹഭാഗം കണ്ടെത്തിയ നാല് സ്ഥലങ്ങളിലാണ് വെള്ളിയാഴ്ച ദൗത്യസംഘം പരിശോധന നടത്തുക. 30 മീറ്റര്‍ പുഴയിലേക്ക് മാറി, 20 അടി താഴ്ചയിലാണ് ലോറി കണ്ടെത്തിയിരിക്കുന്നത്. ഇതില്‍ നിലവിലെ സാഹചര്യത്തില്‍ മുങ്ങിത്തപ്പി രക്ഷാപ്രവര്‍ത്തനം ദുഷ്‌കരമാണ്. മണ്ണിടിഞ്ഞ സമയത്ത് വീണ റോഡിന്റെ സേഫ്റ്റി റെയില്‍, ടവര്‍ ഭാഗം, അര്‍ജുന്‍ ഓടിച്ചിരുന്ന ലോറിയുടെ ഭാഗം, മറ്റൊരു ഗ്യാസ് ടാങ്കര്‍ എന്നിവയാണ് നിലവില്‍ കണ്ടെത്തിയിരിക്കുന്നത്.

അര്‍ജുന്റെ ലോറിയില്‍ ഉണ്ടായിരുന്ന 400 തടികളെ കുറിച്ചും ഏകദേശ ധാരണ ദൗത്യസംഘത്തിന് ലഭിച്ചിട്ടുണ്ട്. ഇതില്‍ കുറെയേറെ തടിഭാഗങ്ങള്‍ പുഴയോരത്തെ നിരവധി വീട്ടുകാര്‍ക്ക് ലഭിച്ചിരുന്നു. ലോറി പുഴയിലേക്ക് മറിഞ്ഞ ഘട്ടത്തില്‍ തടികള്‍ പുഴയിലേക്ക് വീണില്ലെന്നും പിന്നീടാണ് ലോറിയില്‍ ഇത് വേര്‍പെട്ടതെന്നുമാണ് ദൗത്യസംഘത്തിന്റെ നിഗമനം. കുറച്ച് നേരമെങ്കിലും തടിയോടുകൂടി ലോറി പുഴയില്‍ ഒഴുകി നീങ്ങിയിരിക്കാനാണ് സാധ്യതയെന്നും പറയുന്നു. അര്‍ജുന്‍ കാബിനകത്ത് തന്നെയാണോ അതോ പുറത്തിറങ്ങിയിരുന്നോ എന്ന കാര്യത്തിലും വ്യക്തത കൈവന്നിട്ടില്ല.