അര്ജുന് വേണ്ടിയുള്ള തെരച്ചിലിന്റെ പന്ത്രണ്ടാം ദിവസവും നിരാശയില്...
![](https://www.malayalivartha.com/assets/coverphotos/w657/315631_1722093000.jpg)
ഷിരൂരിലെ മണ്ണിടിച്ചിലില് കാണാതായ കോഴിക്കോട് സ്വദേശി അര്ജുനായുള്ള ഇന്നത്തെ തെരച്ചിലും ഫലം കണ്ടില്ല. കുന്ദാപുരയില് നിന്നുള്ള മുങ്ങല് വിദഗ്ധരായ മത്സ്യത്തൊഴിലാളി സംഘത്തിന്റെ നേതൃത്വത്തിലായിരുന്നു ഇന്നത്തെ തെരച്ചില്. എന്നാല് ആറിലേറെ തവണ ഉഡുപ്പി അക്വാമാന് എന്നറിയപ്പെടുന്ന മത്സ്യത്തൊഴിലാളിയായ ഈശ്വര് മല്പെ നദിയുടെ ആഴത്തില് മുങ്ങി പരിശോധിച്ചിട്ടും ഒന്നും കണ്ടെത്താനായില്ല.
ഇതിനിടെ ഒരു തവണ ശരീരത്തില് ബന്ധിപ്പിച്ചിരുന്ന കയര് പൊട്ടി ഒഴുക്കില്പ്പെട്ട ഈശ്വര് മല്പെയെ നാവികസേനയാണ് രക്ഷപ്പെടുത്തിയത്. നിലവിലെ സാഹചര്യത്തില് വെള്ളത്തിലെ പരിശോധന എളുപ്പമല്ലെന്ന് റിട്ട. മേജര് ജനറല് ഇന്ദ്രബാലന് അറിയിച്ചു. വെള്ളത്തിനടിയിലെ സീറോ വിസിബിലിറ്റി തിരച്ചിലിന് വെല്ലുവിളിയാണ്. തുടര്ന്നുള്ള പരിശോധനയില് കാന്തം വെള്ളത്തിലിറക്കിയുള്ള പരിശോധന നടത്തണമെന്നും അദ്ദേഹം വ്യക്തമാക്കി. നാളെയും തിരച്ചില് തുടരുമെന്ന് ദൗത്യ സംഘം അറിയിച്ചു.
അര്ജുന് വേണ്ടിയുള്ള തെരച്ചിലിന്റെ പന്ത്രണ്ടാം ദിവസമായിരുന്നു ഇന്ന്. ട്രക്ക് ഉണ്ടാകാന് ഏറ്റവും സാധ്യത ഉണ്ടായിരുന്ന നാലാം പോയിന്റില് നടത്തിയ തെരച്ചിലിലും ഒന്നും കണ്ടെത്താന് കഴിഞ്ഞില്ല. ഇവിടെ ചെളിയും പാറയും മാത്രമാണ് കണ്ടത്. മറ്റ് പോയിന്റ്റുകളില് പരിശോധന തുടരുമെന്ന് ദൗത്യ സംഘം അറിയിച്ചു. ബോട്ടുകളിലും പുഴയുടെ നടുക്ക് രൂപപ്പെട്ട മണ്കൂനയിലുമായാണ് ദൗത്യ സംഘവും മത്സ്യത്തൊഴിലാളികളും തമ്പടിച്ച പരിശോധന നടത്തിയിരുന്നത്. ഗംഗാവാലി നദിയിലെ കനത്ത അടിയൊഴുക്കാണ് പ്രധാന വെല്ലുവിളി. മോശം കാലാവസ്ഥയും തെരച്ചില് വൈകിപ്പിക്കുന്നു. ഇതിനിടെ കൂടുതല് മത്സ്യബന്ധന ബോട്ടുകള് ഷിരൂരിലേക്ക് കൊണ്ടുവന്നിട്ടുണ്ട്.
https://www.facebook.com/Malayalivartha