ഷിരൂര് ദുരന്തത്തില് കോഴിക്കോട് സ്വദേശി അര്ജുനെ ഉള്പ്പെടെ കണ്ടെത്താന് ഉപയോഗിച്ച ഡ്രോണ് വയനാട്ടിലെത്തിക്കാന് തീരുമാനം
മേപ്പാടി ഉരുള്പൊട്ടലില് മൃതദേഹങ്ങള് കണ്ടെടുക്കാന് ഡ്രോണിന്റെയും മറ്റ് സാങ്കേതിക വിദ്യകളുടെയും സഹായം തേടാന് കര്ണാടക ഷിരൂര് ദുരന്തത്തില് കോഴിക്കോട് സ്വദേശി അര്ജുനെ ഉള്പ്പെടെ കണ്ടെത്താന് ഉപയോഗിച്ച ഡ്രോണ് വയനാട്ടിലെത്തിക്കാന് തീരുമാനമായി. നാളെമുതല് ഈ ഡ്രോണ് ഉപയോഗിച്ച് രക്ഷാപ്രവര്ത്തനം ആരംഭിക്കും. തെര്മല് സ്കാനിംഗും നടത്തും. അര്ജുന് രക്ഷാദൗത്യത്തില് പങ്കാളിയായ റിട്ട.മേജര് ജനറല് ഇന്ദ്രബാലന്റെ സംഘത്തിന്റെ സഹായവും സംസ്ഥാന സര്ക്കാര് തേടിയിരുന്നു. അദ്ദേഹത്തിന്റെ നേതൃത്വത്തിലാകും ഐബോഡ് ഡ്രോണ് ഉപയോഗിക്കുക. ഉരുള്പൊട്ടിയ പ്രദേശത്തെ ഏരിയ മാപ്പിംഗും തയ്യാറാക്കുന്നുണ്ട്.
വയനാട് ദുരന്തത്തില് മരിച്ചവരുടെ എണ്ണം 283 ആയി ഉയര്ന്നിരിക്കുകയാണ്. 240 പേരെ കണ്ടെത്താനുണ്ട്. ദുരന്ത ഭൂമിയില് തെരച്ചില് ഊര്ജിതമായി നടക്കുകയാണ്. തെരച്ചിലിന് ആവശ്യമായ യന്ത്രങ്ങള് എത്തിക്കാന് പറ്റാത്തത് വെല്ലുവിളി ആയിരുന്നു. എന്നാല് ബെയ്ലി പാലം പൂര്ത്തിയായതോടെ കൂടുതല് യന്ത്രങ്ങള് എത്തിച്ച് തെരച്ചില് വേഗത്തിലാക്കാന് സാധിക്കുമെന്ന് മുഖ്യമന്ത്രി വ്യക്തമാക്കിയിരുന്നു. ഉരുള്പൊട്ടല് ദുരന്തത്തില് ജീവനോടെ ഇനി ആരുമില്ലെന്ന് സൈന്യം അറിയിച്ചെന്നും മുഖ്യമന്ത്രി പിണറായി വിജയന് പറഞ്ഞു. മുണ്ടക്കൈയിലേത് ദേശീയ ദുരന്തമായി പ്രഖ്യാപിക്കണമെന്നാണ് സംസ്ഥാനം ആവശ്യപ്പെടുന്നതെന്ന് മുഖ്യമന്ത്രി പറഞ്ഞു. ദുരിതാശ്വാസത്തിന് നേരിട്ട് സഹായവുമായി ആരും വരരുതെന്നും അത് സ്വീകരിക്കാനാവില്ലെന്നും അദ്ദേഹം വ്യക്തമാക്കി.
വയനാട് ഉരുള്പൊട്ടലിനെ എംപി ഫണ്ട് മാര്ഗരേഖ പ്രകാരം അതിതീവ്ര പ്രകൃതി ദുരന്തമായി പ്രഖ്യാപിക്കണം എന്നാവശ്യപ്പെട്ടുകൊണ്ട് ആഭ്യന്തരമന്ത്രി അമിത് ഷായ്ക്ക് കത്തു നല്കിയതായി ശശി തരൂര് എംപിയും പറഞ്ഞു. എം പി ഫണ്ട് വിനിയോഗിക്കുന്നതിനുള്ള മാര്ഗരേഖയുടെ ഖണ്ഡിക 8.1 പ്രകാരം വയനാട്ടിലുണ്ടായ ഉരുള്പൊട്ടല് അതിതീവ്ര പ്രകൃതി ദുരന്തമായി പ്രഖ്യാപിച്ചാല് എല്ലാ എം പി മാര്ക്കും അവരുടെ എം പി ഫണ്ടില് നിന്നും ഒരു കോടി രൂപയുടെ വരെ പദ്ധതികള് ദുരന്തബാധിത പ്രദേശത്ത് പുനരുദ്ധാരണ പ്രവര്ത്തനങ്ങള്ക്ക് വിനിയോഗിക്കുന്നതിനായി ശുപാര്ശ ചെയ്യുവാന് കഴിയുമെന്ന് അദ്ദേഹം വ്യക്തമാക്കി.
https://www.facebook.com/Malayalivartha