മുക്കൂട്ടുതറയിൽ നിന്ന് കാണാതായ ജെസ്‌ന മരിയ ജയിംസിനോടു സാദൃശ്യമുള്ള പെണ്‍കുട്ടിയെ മുണ്ടക്കയത്തെ ലോഡ്ജില്‍ കണ്ടെന്നു വെളിപ്പെടുത്തിയ മുന്‍ ജീവനക്കാരിയെ നുണപരിശോധനയ്ക്ക് വിധേയമാകുമെന്ന് സൂചന. മുന്‍ജീവനക്കാരിയും ഇതിന് സമ്മതിച്ചിട്ടുണ്ട്. ഇത് കേസില്‍ നിര്‍ണ്ണായക വഴിത്തിരിവാകും. ആവശ്യമെങ്കില്‍ ലോഡ്ജ് ഉടമയെയും നുണപരിശോധനയ്ക്കു വിധേയനാക്കും.വ്യക്തിയുടെ പൂര്‍ണസമ്മതം ഉറപ്പിച്ചിട്ടേ നുണപരിശോധന നടത്താന്‍ അന്വേഷണ ഏജന്‍സികള്‍ക്ക് അവകാശമുള്ളൂ. പോളിഗ്രാഫ് ടെസ്റ്റും ബ്രെയിന്‍ മാപ്പിങും നാര്‍ക്കോ അനാലിസ്റ്റും ആണ് നുണപരിശോധനാ രീതികള്‍. ഇതില്‍ ഏതാണ് നടത്തേണ്ടതെന്ന് സിബിഐ ഉടന്‍ തീരുമാനം എടുക്കും. ലോഡ്ജിലെ മുന്‍ ജീവനക്കാരി സഹകരിക്കുമെന്ന് തന്നെയാണ് പ്രതീക്ഷ.

മുന്‍ ജീവനക്കാരിയുടെ മൊഴി ഇന്നലെ സിബിഐ ഇന്‍സ്‌പെക്ടര്‍ നിപുണ്‍ ശങ്കറിന്റെ നേതൃത്വത്തില്‍ രേഖപ്പെടുത്തിയിരുന്നു. ലോഡ്ജ് ഉടമയുടെ മൊഴി ചൊവ്വാഴ്ച എടുത്തിരുന്നു. രണ്ടും തമ്മില്‍ പൊരുത്തക്കേടുണ്ട്. ഈ സാഹചര്യത്തില്‍ ആരു പറയുന്നതാണ് ശരിയെന്ന് കണ്ടെത്താനാണ് സിബിഐ ശ്രമം. മുന്‍ ജീവനക്കാരിയും ലോഡ്ജ് ഉടമയും പറഞ്ഞ കാര്യങ്ങള്‍ പരിശോധിച്ചുവരികയാണെന്ന് സിബിഐ അറിയിച്ചു. വെളിപ്പെടുത്തലുകള്‍ മുന്‍പും ഉണ്ടായിട്ടുള്ളതിനാല്‍ ഏതു ചെറിയ വിവരവും സത്യമാണോ എന്നു കണ്ടെത്താനാണ് സിബിഐ ശ്രമിക്കുന്നത്. താന്‍ കണ്ടത് സിബിഐയെ അറിയിച്ചിട്ടുണ്ടെന്നും ലോഡ്ജ് ഉടമ തന്നെപ്പറ്റി അപവാദ പ്രചാരണം നടത്തിയതോടെയാണു ജെസ്‌നയെപ്പോലെ ഒരു പെണ്‍കുട്ടിയെ കണ്ട കാര്യം വീണ്ടും പറഞ്ഞതെന്നും ലോഡ്ജിലെ മുന്‍ ജീവനക്കാരി പറഞ്ഞു.

ജസ്‌നയെ കണ്ടെന്നുള്ള വിവരം വെളിപ്പെടുത്താൻ വൈകിയതിൽ കുറ്റബോധമെന്ന് മുണ്ടക്കയത്തെ ലോഡ്ജ് മുൻ ജീവനക്കാരി പ്രതികരിച്ചിരുന്നു. സിബിഐ സംഘം മൊഴി രേഖപ്പെടുത്തിയ ശേഷം മാധ്യമങ്ങളോട് സംസാരിക്കവെയാണ് തനിക്ക് കുറ്റബോധമുണ്ടെന്ന് ജീവനക്കാരി പറഞ്ഞത്. രണ്ടര മണിക്കൂർ സമയം എടുത്താണ് സിബിഐ ലോഡ്ജ് ജീവനക്കാരിയുടെ മൊഴി രേഖപ്പെടുത്തിയത്. വെളിപ്പെടുത്തൽ നടത്താൻ വൈകിയതിൽ കുറ്റബോധം തോന്നുന്നുവെന്നും സിബിഐയോട് പറയാനുള്ളത് എല്ലാം പറഞ്ഞിട്ടുണ്ടെന്നും ജീവനക്കാരി പറഞ്ഞു. അന്വേഷണം ശക്തമായി തുടരുന്നുവെന്ന് സിബിഐ സംഘവും പ്രതികരിച്ചു. തിരുവനന്തപുരത്ത് നിന്നുള്ള സിബിഐ സംഘമാണ് മൊഴി രേഖപ്പെടുത്തിയത്. ജസ്നയെ ലോഡ്ജിൽ വെച്ച് കണ്ടതായി ഇവർ വെളിപ്പെടുത്തിയതിന് പിന്നാലെയായിരുന്നു സിബിഐ നടപടി.

കാണാതാവുന്നതിന് ദിവസങ്ങള്‍ക്ക് മുമ്പ് ജസ്‌ന ഒരു യുവാവിനൊപ്പം ലോഡ്ജില്‍ എത്തിയെന്നായിരുന്നു മുണ്ടക്കയത്തെ ലോഡ്ജിലെ മുന്‍ ജീവനക്കാരിയുടെ വെളിപ്പെടുത്തൽ. 'ഉച്ചയ്ക്ക് 12നും ഒന്നിനും ഇടയ്ക്കാണ് അവിടെ കാണുന്നത്. മൂന്നോ നാലോ മണിക്കൂര്‍ അവിടെയുണ്ടായിരുന്നു. അഞ്ച് മണിക്ക് തിരിച്ചിറങ്ങിപോയി. റൂം എടുത്ത് താമസിക്കുന്നവരുടെ പേരും മേല്‍വിലാസവും മാത്രമെ എഴുതാറുള്ളൂ. എന്നോട് ചിരിച്ചിരുന്നു. അപ്പോഴാണ് പല്ലിലെ കമ്പി ശ്രദ്ധിച്ചത്. ഒരു പയ്യന്‍ കൂടെയുണ്ടായിരുന്നു. വെളുത്തു മെലിഞ്ഞ പയ്യനാണ്. കൊച്ചുപെണ്‍കുട്ടി ആയതിനാലാണ് ശ്രദ്ധിച്ചത്. പിങ്ക് ഡ്രസാണ് ഇട്ടിരുന്നത്' എന്നായിരുന്നു വെളിപ്പെടുത്തൽ.

ബികോം രണ്ടാം വര്‍ഷ വിദ്യാര്‍ഥിനിയായിരുന്ന ജെസ്‌നയെ പത്തനംതിട്ട ജില്ലയിലെ വെച്ചൂച്ചിറ കൊല്ലമുളയിലെ വീട്ടില്‍ നിന്ന് 2018 മാര്‍ച്ച് 22ന് ആണു കാണാതായത്. കാണാതാവുന്നതിനു മുന്‍പ് മുണ്ടക്കയത്തെ ലോഡ്ജില്‍ യുവാവുമൊത്ത് ജെസ്‌ന എത്തിയെന്ന ലോഡ്ജിലെ മുന്‍ ജീവനക്കാരിയുടെ വെളിപ്പെടുത്തലിനെ തുടര്‍ന്നാണ് സി.ബി.ഐ. ഇവരുടെ മൊഴി ശേഖരിച്ചത്. ബുധനാഴ്ച രാവിലെ 10-ന് ടി.ബി.യില്‍ ആരംഭിച്ച മൊഴി രേഖപ്പെടുത്തല്‍ ഉച്ചയ്ക്ക് 12.30 വരെ നീണ്ടു. മാധ്യമ പ്രവര്‍ത്തകരോട് പ്രതികരിക്കാന്‍ സി.ബി.ഐ. ഉദ്യോഗസ്ഥര്‍ തയ്യാറായില്ല.

ലോഡ്ജ് ഉടമയോട് വ്യക്തിവൈരാഗ്യം തീര്‍ത്തതല്ലന്നും തന്നെ തേജോവധം ചെയ്ത ലോഡ്ജ് ഉടമ മുന്‍പ് ചെയ്ത കാര്യങ്ങള്‍ സി.ബി.ഐ.യോട് വെളിപ്പെടുത്തുക മാത്രമാണ് ഉണ്ടായതെന്നും സ്ത്രീ മാധ്യമങ്ങളോട് പ്രതികരിച്ചു. ഇത്രനാള്‍ പറയാതിരുന്ന കാര്യം വൈകി വെളിപ്പെടുത്തിയത്തില്‍ കുറ്റബോധം ഉണ്ടെന്നും സ്ത്രീ പറഞ്ഞു. ലോഡ്ജ് ഉടമ ബിജു സേവ്യറിന്റെ മൊഴി ചൊവ്വാഴ്ച സി.ബി.ഐ. ഉദ്യോഗസ്ഥര്‍ രേഖപ്പെടുത്തിയിരുന്നു. ഒപ്പം ബിജുവിന്റെ ലോഡ്ജില്‍ എത്തി രേഖകളും പരിസരവും മുറികളും പരിശോധിക്കുകയും ചെയ്തു.