ഭാഗ്യം വഴി മാറുമ്പോള്... ചരിത്രത്തിലെ വലിയ സമ്മാനമായി തിരുവോണം ബംപര്; ഭാഗ്യവാനെ കാത്തിരിക്കുന്നത് 25 കോടി
ഓണത്തോടൊപ്പം മലയാളികള് ഇത്തവണ തിരുവോണം ബംപറിനേയും വരവേറ്റു. തിരുവോണം ബംപര് വില്പ്പന ഇക്കുറിയും സൂപ്പര് ഹിറ്റിലേക്ക്. ഇതുവരെ 23 ലക്ഷം ടിക്കറ്റുകള് വിറ്റുതീര്ന്നു.
ഒന്നാം സമ്മാനമായി 25 കോടി രൂപയാണ് ഭാഗ്യവാനെ കാത്തിരിക്കുന്നത് എന്നതിനാല് തന്നെ ടിക്കറ്റുകള് ചൂടപ്പം പോലെയാണ് വിറ്റഴിക്കപ്പെടുന്നത്. 25 കോടി രൂപയുടെ ഒന്നാം സമ്മാനം, 1 കോടി രൂപ വീതം 20 പേര്ക്ക് രണ്ടാം സമ്മാനം അടക്കം ആകര്ഷകമായ സമ്മാനങ്ങളാണ് ഇത്തവണയും ഭാഗ്യശാലികളെ കാത്തിരിക്കുന്നത്. ആഗസ്റ്റ് 1 മുതല് ഇതുവരെ 23 ലക്ഷം ടിക്കറ്റ് വിറ്റുകഴിഞ്ഞു.
ഭാഗ്യം തേടിയെത്തുന്നവരില് പാലക്കാട് ജില്ലയാണ് ഇതുവരെ മുന്നില്. 4 ലക്ഷം ടിക്കറ്റാണ് ജില്ലയില് മാത്രം ഇതുവരെ വിറ്റ് പോയത്. മൂന്ന് ലക്ഷം ടിക്കറ്റ് വിറ്റ തിരുവനന്തരപുരം ജില്ല തൊട്ട് പിന്നിലുണ്ട്. ആകര്ഷകമായ സമ്മാനങ്ങള് വന്നതോടെ ടിക്കറ്റ് വാങ്ങാന് വലിയ തിരക്കാണെന്നാണ് കടക്കാര് പറയുന്നത്.
കഴിഞ്ഞ തവണ 80 ലക്ഷം ടിക്കറ്റ് അച്ചടിച്ചപ്പോള് 75 ലക്ഷത്തി എഴുപത്തി ആറായിരം ടിക്കറ്റ് വിറ്റ് പോയിരുന്നു. ഇക്കുറി ആ റിക്കാര്ഡും മറികടക്കുമെന്നാണ് പ്രതീക്ഷ. പേപ്പര് ലോട്ടറിയായി മാത്രമാണ് സംസ്ഥാന ഭാഗ്യക്കുറി വില്ക്കുന്നതെന്നും ഓണ്ലൈന് വാട്സ്ആപ്പ് ലോട്ടറികള് വ്യാജമാണെന്നും സര്ക്കാര് പ്രചാരണം നടത്തുന്നുണ്ട്.
വയനാട് ദുരന്തത്തിന്റെ പശ്ചാത്തലത്തില് വില്പനയില് ഇടിവുണ്ടാകുമെന്നായിരുന്നു വകുപ്പ് പ്രതീക്ഷിച്ചിരുന്നത്. എന്നാല്, ഇപ്പോള് തന്നെ ടിക്കറ്റ് വില്പ്പന 23 ലക്ഷത്തിനടുത്തെത്തി. ഇത്തവണ പരമാവധി അച്ചടിക്കാന് കഴിയുന്ന 90 ലക്ഷം ടിക്കറ്റുകളും വിറ്റഴിക്കാനുള്ള ശ്രമത്തിലാണ് സംസ്ഥാന ഭാഗ്യക്കുറി വകുപ്പ്. കഴിഞ്ഞ തവണ 75,76,096 ടിക്കറ്റുകളാണ് കഴിഞ്ഞ ഓണം ബമ്പറിന്റെ ഭാഗമായി വിറ്റുപോയിരുന്നത്.
തിരുവോണം ബമ്പറിന്റെ (BR 99) പത്തു സീരീസുകളിലെ ടിക്കറ്റുകളില് ഒന്നാം സമ്മാനമായി നല്കുന്നത് 25 കോടി രൂപയാണ്. രണ്ടാം സമ്മാനവും കോടികള് തന്നെ. പക്ഷേ അത് ഭാഗ്യാന്വേഷികളിലെ 20 പേര്ക്ക് ഒരു കോടി വീതമെന്ന പ്രത്യേകതയോടു കൂടിയതുമാണ്. അങ്ങിനെ 20 കോടി. ഒന്നാം സമ്മാനം നേടുന്ന ടിക്കറ്റ് വില്ക്കുന്ന ഏജന്റിന് നല്കുന്ന കമ്മീഷന് കൂടി ലഭിക്കുമ്പോള് ഇക്കുറി ഒറ്റ ബമ്പര് വഴി സൃഷ്ടിക്കപ്പെടുന്നത് 22 കോടിപതികളാണ്.
ഒന്നാം സമ്മാനാര്ഹമാകുന്ന ടിക്കറ്റിന്റെ മറ്റ് ഒന്പതു സീരീസുകളിലെ അതേ നമ്പരുകള്ക്ക് സമാശ്വാസ സമ്മാനമായി അഞ്ചു ലക്ഷം രൂപ വീതം ലഭിക്കും. 20 പേര്ക്ക് 50 ലക്ഷം രൂപ വീതം നല്കുന്ന മൂന്നാം സമ്മാനവും 10 പേര്ക്ക് അഞ്ച് ലക്ഷം രൂപ വീതം നല്കുന്ന നാലാം സമ്മാനവും 2 ലക്ഷം രൂപ വീതം നല്കുന്ന അഞ്ചാം സമ്മാനവുമാണ് പിന്നീടുള്ള വലിയ സമ്മാന തുകകള്.
ആറാം സമ്മാനം 5000 രൂപയും ഏഴാം സമ്മാനം 2000 രൂപയുമാണ്. എട്ടാം സമ്മാനം 1000 രൂപയാണ്. ഒന്പതാം സമ്മാനമായി അവസാന നാലക്കത്തിന് 500 രൂപ ഉറപ്പാക്കുന്ന സമ്മാനങ്ങളും നിശ്ചയിച്ചിട്ടുണ്ട്. 500 രൂപയാണ് ഒരു ടിക്കറ്റിന് വില നിശ്ചയിച്ചിരിക്കുന്നത്.
2024 ഏപ്രില് മുതല് ഓഗസ്റ്റ് വരെ സമ്മാന ഇനത്തില് മാത്രം ലോട്ടറി വകുപ്പ് വിതരണംചെയ്തത് 2400 കോടി രൂപയാണ്. മുന് സാമ്പത്തിക വര്ഷം വിതരണം ചെയ്ത സമ്മാനത്തുക ആകെ 7095 കോടി രൂപയായിരുന്നു. ഓണം ബമ്പര് മുതലായവയുടെ സമ്മാനത്തുക കൂടെ ഇനി കണക്കാക്കുമ്പോള് ഈ വര്ഷവും സമ്മാനത്തുകയില് ഭാഗ്യക്കുറി റെക്കോര്ഡ് ഭേദിക്കുമെന്നാണ് കരുതുന്നത്.
അതേസമയം ഓള് ഇന്ത്യ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സ് (എയിംസ്) തിരുവോണ നാളില് നടത്താന് നിശ്ചയിച്ചിരിക്കുന്ന നഴ്സിങ് ഓഫിസര് പ്രിലിമിനറി പരീക്ഷ മാറ്റി വയ്ക്കണമെന്നാവശ്യപ്പെട്ട് എ ഐ സി സി ജനറല് സെക്രട്ടറി കെ സി വേണുഗോപാല് എം പി രംഗത്ത്. കേന്ദ്ര ആരോഗ്യമന്ത്രി ജെ പി നദ്ദയോടാണ് കെ സി വേണുഗോപാല് ആവശ്യമുന്നയിച്ചത്. ഇക്കാര്യം ആവശ്യപ്പെട്ട് കേന്ദ്രമന്ത്രിക്കും എയിംസ് ഡയറക്ടര്ക്കും കത്ത് നല്കിയതായും കെ സി അറിയിച്ചു.
"
https://www.facebook.com/Malayalivartha