ഇന്ന് ഗുരുവായൂരില്‍ ചരിത്രത്തിലെ ഏറ്റവും വലിയ കല്ല്യാണങ്ങളുടെ മേളം... 350ലേറെ കല്ല്യാണങ്ങള്‍... 6 മണ്ഡപങ്ങളിലായാണ് വിവാഹ ചടങ്ങുകള്‍ നടക്കുന്നത്, പുലര്‍ച്ചെ നാലുമണി മുതല്‍ തുടങ്ങി, റെക്കോര്‍ഡ് കല്യാണം നടക്കുന്നത് പ്രമാണിച്ച് ശയന പ്രദക്ഷിണം, അടി പ്രദക്ഷിണം എന്നിവയുണ്ടാകില്ല

തിരക്ക് പരിഗണിച്ചാണ് പുലര്‍ച്ച നാലിന് വിവാഹങ്ങള്‍ ആരംഭിക്കാന്‍ ദേവസ്വം തീരുമാനിച്ചത്. സാധാരണ അഞ്ചിനാണ് തുടങ്ങാറുള്ളത്.
ആറു മണ്ഡപങ്ങളിലാണ് ഒരേ സമയം വിവാഹങ്ങള്‍ നടക്കുന്നത്. കല്യാണസംഘങ്ങള്‍ മേല്‍പത്തൂര്‍ ഓഡിറ്റോറിയത്തിന് തെക്കു ഭാഗത്തെ പന്തലിലെത്തി പേര് നല്‍കണം.

പേരെഴുതിയ സംഘങ്ങളെ മേല്‍പത്തൂര്‍ ഓഡിറ്റോറിയത്തില്‍ പ്രവേശിപ്പിക്കും. വിവാഹച്ചടങ്ങിനുശേഷം തെക്കേ നട വഴി പോകണം. കിഴക്കേ നടയില്‍നിന്ന് ഫോട്ടോയെടുക്കാന്‍ അനുമതിയില്ല. ദീപസ്തംഭത്തിനു സമീപം നിന്ന് തൊഴുന്നവര്‍ കിഴക്കു ഭാഗത്തുനിന്ന് വരിയായി വരണം. ദര്‍ശനത്തിനുള്ള വരി തീര്‍ഥക്കുളത്തിന്റെ ഭാഗത്തുനിന്ന് ക്യൂ കോംപ്ലക്‌സിലേക്ക് പ്രവേശിക്കേണ്ടതാണ്.


അതേസമയം ചിങ്ങ മാസത്തിലെ ഏറ്റവും നല്ല മുഹൂര്‍ത്തമാണ് സെപ്റ്റംബര്‍ 8 ന്. ഞായറാഴ്ച അവധിയും ഓണാഘോഷവും കൂടി ആകുന്നതോടെ ഗുരുപവനപുരി അക്ഷരാര്‍ത്ഥത്തില്‍ കാലുകുത്താന്‍ പോലും ഇടമില്ലാത്ത അവസ്ഥയിലാകും. ഗുരുവായൂര്‍ ക്ഷേത്രത്തില്‍ റെക്കോഡ് വിവാഹങ്ങള്‍ നടക്കുന്ന ഞായറാഴ്ച ദര്‍ശനവും വിവാഹ ചടങ്ങുകളും സുഗമമായി നടത്താന്‍ ദേവസ്വം പ്രത്യേക ക്രമീകരണങ്ങള്‍ ഒരുക്കിയിട്ടുണ്ട്. താലികെട്ട് നടക്കുന്നതിന് തൊട്ടുമുമ്പ് വരെ ശീട്ടാക്കാന്‍ സൗകര്യമുള്ളതിനാല്‍ വിവാഹങ്ങളുടെ എണ്ണം വര്‍ധിക്കാന്‍ സാധ്യതയുണ്ട്.
തിരക്ക് പരിഗണിച്ച് കൂടുതല്‍ സെക്യുരിറ്റി ജീവനക്കാരെ നിയോഗിച്ചിട്ടുണ്ട്. കൂടുതല്‍ പോലീസിന്റെ സേവനവും ഉറപ്പുവരുത്തും. കാര്‍ ഉള്‍പ്പെടെയുള്ള വാഹനങ്ങള്‍ പാര്‍ക്ക് ചെയ്യാന്‍ കിഴക്കേ നടയിലെ ബഹുനില വാഹന പാര്‍ക്കിങ് സമുച്ചയത്തിന് പുറമെ, ശ്രീകൃഷ്ണ ഹയര്‍ സെക്കന്‍ഡറി സ്‌കൂള്‍ മൈതാനവും സജ്ജമാക്കും.
അതേസമയം 2017 ആഗസ്റ്റ് 27ന് നടന്ന 277 വിവാഹങ്ങളാണ് നിലവിലെ റെക്കോഡുള്ളത്.