ഡെലിവറി വൈകിയതില്‍ ഉപഭോക്താവ് വഴക്കുപറഞ്ഞതിനെ തുടര്‍ന്ന് ഡെലിവറി ബോയ് ജീവനൊടുക്കി. ബി.കോം വിദ്യാര്‍ഥിയായ പവിത്രന്‍ എന്ന പത്തൊമ്പതുകാരനാണ് ജീവനൊടുക്കിയത്.

ചെന്നൈ കൊളത്തൂരിലാണ് സംഭവം. ആത്മഹത്യാ കുറിപ്പ് കണ്ടെത്തിയിട്ടുണ്ടായിരുന്നു. പഠനത്തിനിടെ വരുമാനം കണ്ടെത്തുന്നതിനായാണ് പവിത്രന്‍ ഡെലിവറി ജോലി ചെയ്തിരുന്നത്. സെപ്റ്റംബര്‍ 11ന് കൊരട്ടൂര്‍ ഭാഗത്തെ ഒരു വീട്ടില്‍ പലചരക്കുകള്‍ ഡെലിവറി ചെയ്യാനുണ്ടായിരുന്നു.

എന്നാല്‍, വിലാസം കണ്ടെത്താനായി പ്രയാസമായതോടെ ഡെലിവറി താമസിച്ചു. സാധനങ്ങള്‍ ഓര്‍ഡര്‍ ചെയ്ത സ്ത്രീ പവിത്രനെ വഴക്കുപറയുകയും ഡെലിവറി സ്ഥാപനത്തില്‍ വിളിച്ച് പരാതി അറിയിക്കുകയും ചെയ്തു. ഇതില്‍ പ്രകോപിതനായ പവിത്രന്‍ തൊട്ടടുത്ത ദിവസം ഇവരുടെ വീടിന് നേരെ കല്ലെറിഞ്ഞു.

ജനല്‍ ചില്ലുകള്‍ തകര്‍ന്നു. ഇതോടെ സ്ത്രീ പൊലീസില്‍ പരാതി നല്‍കുകയും ചെയ്തു . തുടര്‍ന്ന് രക്ഷിതാക്കളുടെ സാന്നിധ്യത്തില്‍ വിട്ടയക്കുകയായിരുന്നു. സംഭവത്തിന് ശേഷം പവിത്രന്‍ അസ്വസ്ഥനായിരുന്നു. തുടര്‍ന്നാണ് കഴിഞ്ഞ ചൊവ്വാഴ്ച ഇയാളെ മരിച്ച നിലയില്‍ കണ്ടെത്തിയത്.

ഡെലിവറി സമയത്ത് സ്ത്രീ ശകാരിച്ചതിനെ തുടര്‍ന്ന് താന്‍ വിഷാദത്തിലേക്ക് പോയെന്നും അതാണ് മരണകാരണമെന്നുമാണ് പവിത്രന്റെ ആത്മഹത്യ കുറിപ്പിലുള്ളത്. സംഭവത്തില്‍ പൊലീസ് കേസെടുത്തു.