ഇടുക്കിയിലെ ഇരട്ടയാര്‍ ടണലില്‍ ഒഴുക്കില്‍പ്പെട്ട പന്ത്രണ്ടുകാരനായി തെരച്ചില്‍ ഊര്‍ജ്ജിതമാക്കി. പന്ത് കളിക്കുന്നതിനിടെയാണ് ഇടുക്കിയിലെ ഇരട്ടയാര്‍ ടണലില്‍ ഒഴുക്കില്‍ പെട്ട രണ്ട് കുട്ടികളെ കാണാതായത്.

ഓണാവധി ആഘോഷിക്കാനായി മുത്തച്ഛന്റെ വീട്ടിലെത്തിയപ്പോഴാണ് ഉപ്പുതറ, മൈലാടുംപാറ രതീഷിന്റെ മകന്‍ അക്കുവെന്ന് വിളിക്കുന്നു അസൗരേഷ് (12) നെ യാണ് കാണാതായത്. അസൗരേഷിനൊപ്പം വെള്ളത്തില്‍ വീണ കായംകുളം മുതുകുളം നടുവിലേയത്ത് പൊന്നപ്പന്റെ മകന്‍ അമ്പാടി എന്നു വിളിക്കുന്ന അതുല്‍ (13) മരിച്ചിരുന്നു.

അപകടത്തില്‍പ്പെട്ട കുട്ടികള്‍ രണ്ട് പേരും മറ്റു രണ്ട് കുട്ടികളോടൊപ്പം ഡാമിന് സമീപത്തു കരയില്‍ പന്തു കളിക്കുകയായിരുന്നു. ഉരുണ്ട് ജലാശയത്തില്‍ വീണ പന്ത് അതുലും, അസൗരേഷ് ഉം ചേര്‍ന്ന് കൈ കോര്‍ത്തു പിടിച്ചു എടുക്കാനായി ശ്രമിക്കുന്നതിനിടെ ഒഴുക്കില്‍ പെടുകയായിരുന്നു.

തുടര്‍ന്ന് നാട്ടുകാര്‍ നടത്തിയ തെരച്ചിലില്‍ അതുലിനെ തുരങ്ക മുഖത്തു നിന്നാണ് കണ്ടുകിട്ടിയത്. തുടര്‍ന്ന് ഫയര്‍ ആന്‍ഡ് റെസ്‌ക്യൂ വിഭാഗവും പൊലീസും ചേര്‍ന്ന് അസൗരേഷിനു വേണ്ടി തുരങ്ക മുഖത്തും വെള്ളം ഇടുക്കി ജലാശയത്തിലെത്തുന്ന അഞ്ചുരുളിയിലും തെരച്ചില്‍ നടത്തിയെങ്കിലും ഫലമുണ്ടായിരുന്നില്ല.

അതേസമയം അതുല്‍ഹര്‍ഷിന്റെ മൃതദേഹം പോസ്റ്റുമോര്‍ട്ടത്തിനുശേഷം ഇന്ന് ബന്ധുക്കള്‍ക്ക് വിട്ടുനല്‍കും.