മുഖ്യമന്ത്രി മാധ്യമങ്ങളെ കാണും... എഡിജിപി എം.ആര്. അജിത് കുമാറിനെതിരെ നീക്കം ശക്തം; തൃശൂര് പൂരം അലങ്കോലപ്പെട്ടതിലെ റിപ്പോര്ട്ടും ഇന്ന് മുഖ്യമന്ത്രിക്ക് കൈമാറും
ഇന്ന് എല്ലാ ചോദ്യങ്ങള്ക്ക് മറുപടിയുമായി മുഖ്യമന്ത്രിയെത്തും. എഡിജിപിയെ കേന്ദ്രീകരിച്ചുള്ള വിവാദം പുകയുന്നതിനിടെ, ഇന്ന് 11ന് മാധ്യമങ്ങളെ കാണാന് മുഖ്യമന്ത്രി തീരുമാനിച്ചു. ഇതോടെ അജിത്കുമാറിനെ നീക്കുന്നതടക്കമുള്ള ആവശ്യങ്ങളില് അദ്ദേഹം എന്തുപറയുമെന്ന ആകാംക്ഷയേറി.
അതിനിടെ തൃശൂര് പൂരം അലങ്കോലപ്പെട്ടതിനെ കുറിച്ചുള്ള അന്വേഷണ റിപ്പോര്ട്ട് എഡിജിപി എംആര്. അജിത് കുമാര് ഇന്ന് മുഖ്യമന്ത്രിക്കും ഡിജിപിക്കും കൈമാറും. ഒരാഴ്ച കൊണ്ട് അന്വേഷണം പൂര്ത്തിയാക്കണമെന്നായിരുന്നു മുഖ്യമന്ത്രിയുടെ നിര്ദ്ദേശം. നാല് മാസം കഴിഞ്ഞാണ് ക്രമസമാധന ചുമതലയുള്ള എഡിജിപി റിപ്പോര്ട്ട് നല്കുന്നത്.
മുഖ്യമന്ത്രിക്ക് ലഭിച്ച നാല് പരാതികളാണ് അന്വേഷണത്തിനായി കൈമാറിയത്. എം.ആര്.അജിത് കുമാര് തൃശൂരിലുള്ളപ്പോഴാണ് പൂരം അലങ്കോലപ്പെടുന്നത്. തൃശൂര് പൂരം അലങ്കോലപ്പെടാനുള്ള കാരണം ചൂണ്ടികാട്ടി തൃശൂര് കമ്മീഷണറായിരുന്ന അങ്കിത് അശോകിനെ സ്ഥലം മാറ്റിയിരുന്നു. പൂര്ണ ഉത്തരവാദിത്വം കമ്മീഷണറില് മാത്രം ഒതുക്കുമോ, മറ്റെന്തെങ്കിലും ശുപാര്ശ എഡിജിപിയുടെ റിപ്പോര്ട്ടിലുണ്ടാകുമോയെന്നാണ് അറിയേണ്ടത്.
അതേസമയം സിപിഐ അടക്കമുള്ള ഘടകകക്ഷികള് മുന്നണിക്കകത്തും പുറത്തും നിലപാട് കടുപ്പിച്ച് രംഗത്തിറങ്ങിയതോടെ, ക്രമസമാധാനച്ചുമതലയില് നിന്ന് എഡിജിപി എം.ആര്.അജിത്കുമാറിനെ നീക്കാന് മുഖ്യമന്ത്രിക്കു മേല് കടുത്ത സമ്മര്ദം. വിജിലന്സ് അന്വേഷണം പ്രഖ്യാപിച്ചിട്ടും ക്രമസമാധാനച്ചുമതലയില് തുടരുന്ന അജിത്കുമാറിന്റെ സംരക്ഷകനായി ചിത്രീകരിക്കപ്പെട്ടതോടെ, അദ്ദേഹത്തെ കൈവിടാന് മുഖ്യമന്ത്രി തയാറാകുമെന്നാണ് ഘടകകക്ഷികള് കരുതുന്നത്.
ഡിജിപിയുടെ അന്വേഷണ റിപ്പോര്ട്ടിന്റെ അടിസ്ഥാനത്തിലേ അജിത്കുമാറിനെതിരെ നടപടിയെടുക്കൂ എന്ന കടുംപിടിത്തം ഉപേക്ഷിക്കാന് മുഖ്യമന്ത്രി തയാറാകുമോയെന്നാണ് സിപിഐ അടക്കമുള്ള കക്ഷികള് ഉറ്റുനോക്കുന്നത്. അജിത്കുമാറിനെതിരായ ആരോപണങ്ങളില് 18 ദിവസം പിന്നിട്ട അന്വേഷണം പൂര്ത്തിയാക്കാന് ഡിജിപിക്ക് ഇനി 13 ദിവസം കൂടി സമയമുണ്ട്. അതുവരെ അജിത്കുമാറിനു മുഖ്യമന്ത്രി സംരക്ഷണകവചമൊരുക്കുന്നത് മുന്നണിക്കാകെ ക്ഷീണം ചെയ്യുമെന്ന നിലപാടിലാണ് സിപിഐ. സമ്മര്ദമേറുന്ന സാഹചര്യത്തില് അന്വേഷണം വേഗത്തിലാക്കാന് ആഭ്യന്തര വകുപ്പ് ഡിജിപിക്കു നിര്ദേശം നല്കിയിട്ടുണ്ട്.
ഈ മാസം 13നു പൊലീസ് ആസ്ഥാനത്ത് വിളിച്ചുവരുത്തി അജിത്കുമാറിനെ ഡിജിപി ചോദ്യംചെയ്തിരുന്നു. ആര്എസ്എസ് നേതാക്കളുമായുള്ള അദ്ദേഹത്തിന്റെ കൂടിക്കാഴ്ചയെക്കുറിച്ച് ഡിജിപി അന്ന് ചോദിച്ചിരുന്നില്ല. വരുംദിവസങ്ങളില് അദ്ദേഹത്തെ വീണ്ടും ചോദ്യംചെയ്യുമെന്നാണു വിവരം. മലപ്പുറത്തെ സ്വര്ണംപൊട്ടിക്കല് സംഘത്തെ സഹായിച്ചു, റിയല് എസ്റ്റേറ്റ് ഇടനിലക്കാരന് മുഹമ്മദ് ആട്ടൂരിന്റെ (മാമി) തിരോധാനത്തിലെ അന്വേഷണം അട്ടിമറിച്ചു എന്നിവയടക്കം പി.വി.അന്വര് ഉന്നയിച്ച ആരോപണങ്ങളും ഡിജിപി പരിശോധിക്കുന്നുണ്ട്. ഈ കേസുകളുമായി ബന്ധപ്പെട്ടവരുടെ മൊഴി അന്വേഷണ സംഘം വൈകാതെ രേഖപ്പെടുത്തും. ഡിഐജി തോംസണ് ജോസിന്റെ നേതൃത്വത്തിലുള്ള സംഘം അന്വറിന്റെ മൊഴി എടുത്തിരുന്നു.
അതേസമയം എഡിജിപി: അജിത്കുമാറിനും മുന് എസ്പി സുജിത്ദാസിനുമെതിരായ വിജിലന്സ് അന്വേഷണം തിരുവനന്തപുരം സ്പെഷല് ഇന്വെസ്റ്റിഗേഷന് യൂണിറ്റ് 1 എസ്പി: ജോണ്കുട്ടിയുടെ നേതൃത്വത്തിലുള്ള സംഘം നടത്തും. ഡിവൈഎസ്പി ഷിബു പാപ്പച്ചന്, സിഐ: കിരണ് തുടങ്ങിയവരുള്പ്പെട്ടതാണു സംഘം. അനധികൃത സ്വത്ത് സമ്പാദനം, കൈക്കൂലി, സ്വര്ണക്കടത്ത് എന്നിവയടക്കമുള്ള പരാതികളിലുള്ള അന്വേഷണം പൂര്ത്തിയാക്കാന് 6 മാസമാണുള്ളത്.
https://www.facebook.com/Malayalivartha