ഒറ്റ രാത്രി കൊണ്ട് അലങ്കോലപ്പെടുത്തിയ തൃശൂര്‍പുരത്തെ പറ്റിയുള്ള റിപ്പോര്‍ട്ട് നല്‍കാന്‍ എടുത്തത് 5 മാസം. അന്‍വര്‍ രംഗത്തെത്തിയതോടെ മുകേഷിന്റെ രാജിയും സിനിമാക്കാരും രക്ഷപ്പെട്ടു. തൃശൂര്‍ പൂരം അലങ്കോലപ്പെടുത്തലുമായി ബന്ധപ്പെട്ട് എഡിജിപി അജിത്ത് കുമാറിന്റെ നേതൃത്വത്തില്‍ നടത്തിയ അന്വേഷണത്തിന്റെ റിപ്പോര്‍ട്ട് അഞ്ച് മാസത്തിന് ശേഷം സമര്‍പ്പിച്ചു. ഒരാഴ്ചക്കുള്ളില്‍ അന്വേഷണ റിപ്പോര്‍ട്ട് സമര്‍പ്പിക്കാനായിരുന്നു ആദ്യം നല്‍കിയിരുന്ന നിര്‍ദ്ദേശം. എന്നാല്‍ ഏറെ വിവാദങ്ങള്‍ക്കൊടുവിലാണ് ഇപ്പോള്‍ അന്വേഷണ റിപ്പോര്‍ട്ട് സമര്‍പ്പിച്ചിരിക്കുന്നത്.

സംസ്ഥാന പൊലീസ് മേധാവിക്കാണ് ഇന്ന് സീല്‍ഡ് കവറില്‍ 600 പേജുള്ള റിപ്പോര്‍ട്ട് മെസഞ്ചര്‍ വഴി സമര്‍പ്പിച്ചത്. എന്നാല്‍ ഡിജിപി ഓഫീസില്‍ ഇല്ലാത്തതിനാല്‍ നാളെ മാത്രമേ അദ്ദേഹം ഇത് പരിശോധിക്കൂവെന്നാണ് വിവരം. എം.ആര്‍.അജിത് കുമാര്‍ തൃശൂരിലുള്ളപ്പോഴായിരുന്നു പൂരം അലങ്കോലപ്പെടുന്നത്. തൃശൂര്‍ പൂരം അലങ്കോലപ്പെടാനുള്ള കാരണം ചൂണ്ടിക്കാട്ടി തൃശൂര്‍ കമ്മിഷണറായിരുന്ന അങ്കിത് അശോകിനെ സ്ഥലം മാറ്റി. പൂര്‍ണ ഉത്തരവാദിത്തം കമ്മിഷണറില്‍ മാത്രം ഒതുക്കിയോ എന്ന കാര്യം റിപ്പോര്‍ട്ട് പുറത്തുവന്നാല്‍ മാത്രമേ അറിയൂ.

അതിനിടെ പൂരം കലക്കലുമായി ബന്ധപ്പെട്ട് അന്വേഷണം നടന്നില്ലെന്ന വിവരാവകാശ മറുപടിയില്‍ പൊലീസ് ഉദ്യോഗസ്ഥനെ സസ്പെന്‍ഡ് ചെയ്തിരുന്നു. പൊലീസ് ആസ്ഥാനത്തെ സ്റ്റേറ്റ് പബ്ലിക് ഇന്‍ഫര്‍മേഷന്‍ ഓഫിസറും എന്‍ആര്‍ഐ സെല്‍ ഡിവൈഎസ്പിയുമായ എം.എസ്.സന്തോഷിനെതിരെ ആയിരുന്നു നടപടി. തൃശൂര്‍ പൂരം അലങ്കോലപ്പെടുത്തുന്നതില്‍ ഏതെങ്കിലും തരത്തിലുള്ള അന്വേഷണം നടക്കുന്നുണ്ടോ എന്നായിരുന്നു വിവരാവകാശ നിയമപ്രകാരമുള്ള ചോദ്യം. അതില്‍ അന്വേഷണം നടക്കുന്നില്ല എന്നായിരുന്നു മറുപടി. എന്നാല്‍ ഈ അവസരത്തില്‍ എഡിജിപി തലത്തില്‍ അന്വേഷണം പുരോഗമിക്കുന്നുണ്ടായിരുന്നു. ഈ വിവരം മറച്ചുവച്ചതിനായിരുന്നു നടപടി.

എഡിജിപി എം.ആര്‍ അജിത് കുമാര്‍ സമര്‍പ്പിച്ച തൃശൂര്‍ പൂരം കലക്കലിലെ അന്വേഷണ റിപ്പോര്‍ട്ട് ഇന്ന് സംസ്ഥാന പൊലീസ് മേധാവി പരിശോധിക്കും. 600 പേജുള്ള റിപ്പോര്‍ട്ട് പരിശോധിച്ച ശേഷം നാളെ മുഖ്യമന്ത്രിക്ക് കൈമാറാനാണ് തീരുമാനം. റിപ്പോര്‍ട്ടിലെ ഉള്ളടക്കവുമായി ബന്ധപ്പെട്ട് ഡിജിപി തയാറാക്കുന്ന കുറിപ്പും മുഖ്യമന്ത്രിയുടെ ഓഫീസിന് കൈമാറും.

അഞ്ചുമാസം മുമ്പ് പ്രഖ്യാപിച്ച അന്വേഷണത്തിന്റെ റിപ്പോര്‍ട്ടാണ് മുഖ്യമന്ത്രിയുടെ നിര്‍ദേശത്തിനും ഡിജിപിയുടെ അന്ത്യശാസനത്തിനും ശേഷം ഇന്നലെ എഡിജിപി എം.ആര്‍ അജിത് കുമാര്‍ സമര്‍പ്പിച്ചത്. 600 പേജുള്ള റിപ്പോര്‍ട്ട് പ്രത്യേക ദൂതന്‍ വഴിയാണ് ഡിജിപിയുടെ ഓഫീസില്‍ എത്തിച്ചത്.

തൃശൂര്‍ പൂരം കലക്കിയതില്‍ അന്വേഷണം പെട്ടെന്ന് തന്നെ പൂര്‍ത്തിയാക്കണമെന്ന് കേന്ദ്ര സഹമന്ത്രി സുരേഷ് ഗോപി കഴിഞ്ഞ ദിവസം പറഞ്ഞിരുന്നു. വളരെ വേഗത്തില്‍ രണ്ടോ, മുന്നോ മാസത്തിനുള്ളളില്‍ അന്വേഷണം പൂര്‍ത്തിയാക്കണമെന്നും അദ്ദേഹം ആവശ്യപ്പെട്ടു. പൂരം കലക്കിയ കള്ളമാരെ പിടിക്കാന്‍ മറ്റൊരു കള്ളനെ ഏല്‍പ്പിക്കുന്നപോലെയാണ് കാര്യങ്ങള്‍. ഇപ്പോള്‍ അന്വേഷിക്കാന്‍ തുടങ്ങിയാല്‍ അടുത്ത പൂരം വരെ കാര്യങ്ങള്‍ നീണ്ടുപോകരുത്.

വേഗത്തില്‍ നടപടിയുണ്ടാകണം. പരാതി ഉയര്‍ന്ന് വന്നിരിക്കുന്നത് ഒരു കള്ളന് നേരെയാണ്. കോഴിക്കോട് പിഎം വിശ്വകര്‍മ സ്‌കീം സര്‍ട്ടിഫിക്കറ്റ് വിതരണം ഉദ്ഘാടനം ചെയ്യാന്‍ എത്തിയപ്പോള്‍ ആയിരുന്നു കേന്ദ്ര സഹമന്ത്രി സുരേഷ് ഗോപി. ഇത്തരത്തിലൊരു പ്രസ്ഥാവന നടത്തിയത്.

അന്വേഷണം ആരെ ഏല്‍പ്പിക്കണം എന്ന് ചോദിച്ചാല്‍ കള്ളന്മാരുടെ കൂട്ടത്തിലെ മികച്ച കള്ളനെ തന്നെ അത് ഏല്‍പ്പിക്കണം. കഴിഞ്ഞ കുറച്ചു ദിവസങ്ങളായി പോലീസിന് നേരെ വലിയ രീതിയില്‍ പരാതി ഉയര്‍ന്നു വന്നിരുന്നു. ഈ സാഹചര്യത്തില്‍ ജഡ്ജിയെ കൊണ്ടോ റിട്ടേര്‍ഡ് ജസ്റ്റിസിനെ കൊണ്ട് ഈ കേസ് അന്വേഷിക്കുന്നതാണ് നല്ലത്. അന്വേഷണം സത്യമുള്ളതായിരിക്കണം, മൂടിവയ്ക്കില്ല എന്നുറപ്പുള്ള അന്വേഷണം വേണമെന്നും സുരേഷ് ഗോപി ആവശ്യപ്പെട്ടു.