സംസ്ഥാന നാടക അവാര്‍ഡ് ജേതാവും നാടകരചയിതാവുമായ കട്ടപ്പന കുമ്പുക്കല്‍ കെ.സി. ജോര്‍ജ് (51) അന്തരിച്ചു. രോഗബാധയെ തുടര്‍ന്ന് ചികിത്സയിലിരിക്കെയായിരുന്നു അന്ത്യം. സംസ്ഥാന സര്‍ക്കാരിന്റെ ഈ വര്‍ഷത്തെ പ്രഫഷനല്‍ നാടക മത്സരത്തിലെ വിജയികളെ പ്രഖ്യാപിച്ചപ്പോള്‍ കെ.സി. ജോര്‍ജ് മികച്ച നാടകകൃത്തായി തെരഞ്ഞെടുക്കപ്പെട്ടിട്ടുണ്ടായിരുന്നു. കായംകുളം ദേവ കമ്യൂണിക്കേഷന്‍സിന്റെ 'ചന്ദ്രികാ വസന്തം' എന്ന നാടകത്തിനായിരുന്നു അവാര്‍ഡ്.

2005ല്‍ ഓച്ചിറ സരിതയുടെ അതിരുകളില്ലാത്ത ആകാശത്തിന്റെ രചനയിലൂടെ നാടക രചനക്ക് തുടക്കമിട്ടു. അതിനുമുമ്പ് തിരുവനന്തപുരം സൗപര്‍ണിക, കൊച്ചിന്‍ സംഗമിത്ര, ആലപ്പി തിയേറ്റേഴ്‌സ്, കൊല്ലം ആത്മമിത്ര, ഓച്ചിറ സരിഗ, അങ്കമാലി അഞ്ജലി, വടകര വരദ, കോഴിക്കോട് സാഗര്‍ കമ്യൂണിക്കേഷന്‍ തുടങ്ങിയ പ്രമുഖ സമിതികള്‍ക്കായി രചന നിര്‍വഹിച്ചു. പ്രഫഷണല്‍ നാടകവേദിയില്‍ ആദ്യമായി അഞ്ചു കഥകള്‍ ഒരൊറ്റ നാടകമാക്കി അരങ്ങിലെത്തിച്ചത് കെ.സിയുടെ രചനാ വൈഭവത്തിന്റെ മികവാണ്.

സ്‌കൂള്‍ കോളജ് പ്രാദേശിക സമിതികള്‍ക്ക് വേണ്ടി 40 ഓളം നാടകങ്ങള്‍ രചിച്ചിട്ടുണ്ട്. അതിലെ ഒട്ടുമിക്ക നാടകങ്ങളും സംവിധാനവും ചെയ്തു.
കുട്ടികളുടെ നാടകങ്ങളുടെ ഒരു സമാഹാരവും പ്രസിദ്ധീകരിച്ചു. 50ലധികം പ്രഫഷണല്‍ നാടകങ്ങള്‍ക്ക് രചന നിര്‍വഹിച്ചിട്ടുണ്ട്.

സുനാമി വിതച്ച കടുത്ത യാതനകളെ പ്രമേയമാക്കിക്കൊണ്ടാണ് കെ.സി. ജോര്‍ജ് നാടക രംഗത്ത് ചുവടുവച്ചത്. കേരളത്തിന്റെ നാടക ഭൂപടത്തില്‍ മൗലികവും കാലികവുമായ രചനാ വൈഭവത്തിലൂടെ സ്വന്തമായി ഒരിടം കണ്ടെത്തിയ വ്യക്തിയായിരുന്നു കെ.സി. ഹൈറേഞ്ചിന്റെ മലമടക്കില്‍നിന്ന് നാടക രചനയിലൂടെ കേരളത്തിലെ നാടകപ്രേമികളുടെ മനസില്‍ വ്യക്തിമുദ്ര പതിപ്പിച്ചയാളാണ് കെ.സി. ജോര്‍ജ്. ഭാര്യ: ബീന. മക്കള്‍: ജറോം, ജറിറ്റ്.