ഉപ തെരഞ്ഞെടുപ്പിന് തെരഞ്ഞെടുപ്പിന്റെ ആവേശം നല്‍കി പാര്‍ട്ടികള്‍. ഉപതെരഞ്ഞെടുപ്പ് നടക്കുന്ന പാലക്കാടും, ചേലക്കരയിലും സ്ഥാനാര്‍ത്ഥികളെ പ്രഖ്യാപിച്ച് സിപിഎം സംസ്ഥാന സെക്രട്ടറി എംവി ഗോവിന്ദന്‍.

കോണ്‍ഗ്രസ് വിട്ട പി. സരിന്‍ പാലക്കാട് ഇടത് സ്ഥാനാര്‍ഥിയാവുമെന്നും പാര്‍ട്ടി ചിഹ്നത്തിനു പകരം സ്വാതന്ത്ര ചിഹ്നത്തില്‍ മത്സരിപ്പിക്കാനാണ് സിപിഎം തീരുമാനമെന്നും എംവി ഗോവിന്ദന്‍ പറഞ്ഞു. ചേലക്കര ഉപതെരഞ്ഞെടുപ്പില്‍ യുആര്‍ പ്രദീപിനെയും സ്ഥാനാര്‍ത്ഥിയായി പ്രഖ്യാപിച്ചു. മണ്ഡലത്തിലെ മുന്‍ എംഎല്‍എയായ പ്രദീപിന്റെ പ്രചാരണം സ്ഥാനാര്‍ത്ഥി പ്രഖ്യാപനത്തിന് പിന്നാലെ ചേലക്കരയില്‍ തുടങ്ങി.

പാലക്കാട്, ബിജെപി- കോണ്‍ഗ്രസ് ഡീല്‍ ഉണ്ടാകുമെന്ന് അന്നേ ഞങ്ങള്‍ പറഞ്ഞതാണ്. പാലക്കാട് ഇന്നത്തെ സ്ഥിതിയില്‍ സരിന്‍ തന്നെ മത്സരിക്കണം എന്നാണ് തീരുമാനം. രണ്ടു മണ്ഡലങ്ങളിലും എല്‍ഡിഎഫിനു ജയിക്കാന്‍ കഴിയും എന്നാണ് വിശ്വാസം. സരിന്‍ സ്വാതത്രന്‍ ആയി മത്സരിക്കുമെന്നും എംവി ഗോവിന്ദന്‍ കൂട്ടിച്ചേര്‍ത്തു.

ഇന്നലെ രാവിലെ മന്ത്രി എംബി രാജേഷിനെ പാലക്കാട്ടെ വീട്ടിലെത്തി കണ്ട ഡോ പി സരിന്‍, പിന്നീട് ഓട്ടോറിക്ഷയില്‍ സിപിഎം ജില്ലാ കമ്മിറ്റി ഓഫീസിലേക്ക് പോയി. ഇവിടെ വച്ച് സിപിഎം ജില്ലാ സെക്രട്ടറി ഇഎന്‍ സുരേഷ് ബാബുവിന്റെ നേതൃത്വത്തില്‍ സരിനെ നേതാക്കള്‍ ചുവന്ന ഷാള്‍ അണിയിച്ച് സ്വീകരിച്ചു. പ്രവര്‍ത്തകര്‍ സഖാവ് പി സരിന് അഭിവാദ്യം മുഴക്കി. എ.കെ.ബാലന്‍, എന്‍.എന്‍ കൃഷ്ണദാസ് ഉള്‍പ്പെടെ നേതാക്കളും സ്ഥലത്തുണ്ടായിരുന്നു. അതേസമയം ഇന്ന് വൈകിട്ട് നാല് മണിക്ക് പാലക്കാട് വിക്ടോറിയ കോളേജ് പരിസരത്ത് നിന്നും കോട്ടമൈതാനം വരെ റോഡ് ഷോ നടത്താന്‍ സിപിഎം തീരുമാനിച്ചു.

ചേലക്കരയിലെ ഇടത് സ്ഥാനാര്‍ത്ഥി യുആര്‍ പ്രദീപിന്റെ മണ്ഡല പര്യടനം ഇന്ന് ആരംഭിക്കും. ജന്മ നാട് ഉള്‍പ്പെടുന്ന ദേശമംഗലം പഞ്ചായത്തിലാണ് സ്ഥാനാര്‍ത്ഥി വോട്ട് തേടുക. വികസനമാകും പ്രധാന തെരഞ്ഞെടുപ്പ് മുദ്രാവാക്യമെന്ന് പ്രദീപ് പറഞ്ഞു. തെരഞ്ഞെടുപ്പ് പ്രഖ്യാപനത്തിനു മുന്‍പേ തന്നെ സംഘടനാ ഒരുക്കങ്ങളെല്ലാം പൂര്‍ത്തിയാക്കിയ ഇടത് ക്യാമ്പ്, സ്ഥാനാര്‍ത്ഥിയായി ഡഞ പ്രദീപ് കൂടി എത്തിയതോടെ പൂര്‍ണ്ണസജ്ജമായി. യു ആര്‍ പ്രദീപിന്റെ വരവറിയിച്ച് ചേലക്കരയില്‍ നടന്ന റോഡ് ഷോ ഇടതുമുന്നണി ശക്തി പ്രകടനമാക്കി മാറ്റി.

മണ്ഡലത്തില്‍ പ്രദീപ് ചിരപരിചിതനായത് പ്രചാരണം കൂടുതല്‍ സുഗമമാക്കുമെന്നാണ് ഇടതിന്റെ പ്രതീക്ഷ. ജില്ലയിലെ ലോക്കല്‍ സമ്മേളനങ്ങള്‍ പുനക്രമീകരിച്ച് നേതാക്കള്‍ മുഴുവന്‍ സമയം ചേലക്കര കേന്ദ്രീകരിക്കും. ആദ്യ ദിനമായ ഇന്ന് ഉച്ച വരെ സ്വന്തം നാടായ ദേശമംഗലം പഞ്ചായത്തിലാണ് സ്ഥാനാര്‍ത്ഥി വോട്ട് അഭ്യര്‍ത്ഥിക്കുക. അടുത്ത ആഴ്ച നാമനിര്‍ദേശ പത്രിക നല്‍കും. ഇതിനു മുന്‍പായി പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍ അധ്യക്ഷസ്ഥാനം പ്രദീപ് രാജിവെക്കും. അടുത്ത വെള്ളിയാഴ്ചയാണ് മുഖ്യമന്ത്രി പിണറായി വിജയന്‍ പങ്കെടുക്കുന്ന മണ്ഡലം കണ്‍വെന്‍ഷന്‍.

സ്ഥാനാര്‍ഥിയാകാന്‍ അവസരം കിട്ടിയതില്‍ അഭിമാനവും സന്തോഷവുമെന്ന് പാലക്കാട്ടെ സിപിഎം സ്വതന്ത്ര സ്ഥാനാര്‍ത്ഥി പി സരിന്‍ പറഞ്ഞു. സിപിഎം സംസ്ഥാന സെക്രട്ടറി എംവി ഗോവിന്ദനാണ് സരിന്റെ സ്ഥാനാര്‍ത്ഥി പ്രഖ്യാപനം നടത്തിയത്. ജനങ്ങളുടെ പ്രതിനിധിയാകാന്‍ പാര്‍ട്ടി ചുമതലപ്പെടുത്തിയിരിക്കുകയാണ്. രാഷ്ട്രീയം പറഞ്ഞു തന്നെ ജനങ്ങളിലേക്ക് ഇറങ്ങുമെന്ന് സരിന്‍ വ്യക്തമാക്കി.

മുന്നണിയിലെ പ്രവര്‍ത്തകര്‍ക്കൊപ്പം തോളോടു തോള്‍ ചേര്‍ന്ന് പ്രവര്‍ത്തിക്കുമെന്ന് പറഞ്ഞ സരിന്‍ യുഡിഎഫ് സ്ഥാനാര്‍ഥിയെയും പാലക്കാടേക്ക് സ്വാഗതം ചെയ്യുന്നുവെന്നും കൂട്ടിച്ചേര്‍ത്തു. മറ്റൊരാളുടെ തോളില്‍ കയറി നിന്നു പ്രവര്‍ത്തിക്കുന്ന ആളാണ് യു ഡി എഫ് സ്ഥാനാര്‍ഥിയെന്നും സരിന്‍ വിമര്‍ശിച്ചു. ഭാര്യ വലിയ രീതിയില്‍ സൈബര്‍ അറ്റാക്ക് നേരിടുന്നു. ഇത് മലീമസമായ രാഷ്ട്രീയമാണെന്നും അദ്ദേഹം ചൂണ്ടിക്കാട്ടി. ബിജെപിക്ക് എതിരായ രാഷ്ട്രീയ പോരാട്ടമാണ് പാലക്കാട് നടക്കുന്നതെന്നും ബിജെപിയാണ് മുഖ്യശത്രുവെന്നും സരിന്‍ പറഞ്ഞു.