കളിക്കാനൊരുങ്ങി ബിജെപിയും... പ്രിയങ്ക ഗാന്ധിയുടെ ഭൂരിപക്ഷം 5 ലക്ഷമാക്കി ഉയര്ത്താനായി കോണ്ഗ്രസ്; അഞ്ച് എംപിമാര്ക്കും 2 എംഎല്എമാര്ക്കും മണ്ഡലം തിരിച്ച് ചുമതല; മറു തന്ത്രമൊരുക്കി ബിജപി
വലിയ തിരക്കൊന്നും ഇല്ലാതിട്ടും പ്രിയങ്ക ഗാന്ധി വയനാട്ടില് ചെലവഴിക്കുന്നത് വെറും ഒരാഴ്ച. നോര്ത്ത് ഇന്ത്യയെ പോലെ കേരളത്തേയും കാണുന്നുവോ എന്തോ? ഇത് ആയുധമാക്കാന് മറ്റ് സ്ഥാനാര്ത്ഥികള്.
അതേസമയം പ്രിയങ്ക ഗാന്ധിയുടെ ഭൂരിപക്ഷം 5 ലക്ഷമാക്കി ഉയര്ത്തുകയാണ് ഐക്യ മുന്നണിയുടെ ലക്ഷ്യം. നാമനിര്ദ്ദേശപത്രിക സമര്പ്പിക്കുന്ന ദിവസമാണ് സ്ഥാനാര്ത്ഥിയുടെ പര്യടനം തുടങ്ങുക. പാര്ട്ടിയുടെ 5 എംപിമാരും രണ്ട് എംഎല്എമാരും വയനാട്ടില് പാര്ട്ടിയുടെ പ്രചാരണ സംവിധാനം ചലിപ്പിക്കും.
പ്രിയങ്ക വയനാടിന്റെ പ്രിയങ്കരി എന്ന് ഉറപ്പിക്കാന് ഭൂരിപക്ഷം കൊണ്ടാണ് യുഡിഎഫ് തുലാഭാരം ഒരുക്കുന്നത്. അതിനായി താഴേത്തട്ട് വരെ സംഘടനാ സംവിധാനം സജ്ജമാണ്. പാണക്കാട് അബ്ബാസലി തങ്ങള് ചെയര്മാനും എപി അനില്കുമാര് ജനറല് കണ്വീനറുമായി തിരഞ്ഞെടുപ്പ് കമ്മിറ്റി പ്രവര്ത്തനം തുടങ്ങി. നിയോജകമണ്ഡല അടിസ്ഥാനത്തില് കോണ്ഗ്രസ് നേതാക്കള്ക്ക് പ്രത്യേക ചുമതല. കല്പ്പറ്റയില് രാജ്മോഹന് ഉണ്ണിത്താന്, ബത്തേരിയില് ഡീന് കുര്യാക്കോസ്, മാനന്തവാടിയില് സണ്ണി ജോസഫ്, തിരുവമ്പാടിയില് എം കെ രാഘവന്, നിലമ്പൂരില് ആന്റോ ആന്റണി, വണ്ടൂരില് ഹൈബി ഈഡന്, എറനാട് സിആര് മഹേഷ്.
ഏഴ് നിയമസഭാ മണ്ഡലങ്ങളിലെയും തെരഞ്ഞെടുപ്പ് കണ്വെന്ഷനില് പ്രതിപക്ഷ നേതാവും കെപിസിസി പ്രസിഡണ്ടും പങ്കെടുക്കും. മൂന്ന് ദിവസം പഞ്ചായത്ത് തലത്തിലും രണ്ടു ദിവസങ്ങളിലായി ബൂത്ത് തലത്തിലും യുഡിഎഫ് കണ്വെന്ഷന് വിളിക്കും. നാമനിര്ദ്ദേശ പത്രിക സമര്പ്പിക്കുന്ന ദിവസം കല്പ്പറ്റയില് സ്ഥാനാര്ത്ഥിയുടെ വമ്പന് റോഡ് ഷോയും ഉണ്ടാകും. രാഹുല് ഗാന്ധിയാണ് ഇത്തവണ താര പ്രചാരകന്. പ്രിയങ്കയുടെ കന്നി മത്സരത്തില് വോട്ട് ചോദിച്ച് സോണിയ ഗാന്ധി എത്തുമോ എന്നതും വയനാട് ഉറ്റുനോക്കുന്നുണ്ട്.
അതേസമയം വയനാട്ടില് യുഡിഎഫ് സ്ഥാനാര്ത്ഥി പ്രിയങ്ക ഗാന്ധിക്കെതിരെ നടിയും ബിജെപി നേതാവുമായ ഖുശ്ബുവിനെ പരീക്ഷിക്കാന് ബിജെപി നീക്കം. വയനാട്ടിലേക്കുളള സ്ഥാനാര്ത്ഥിയായി നടി ഖുശ്ബുവും ബിജെപി അന്തിമപട്ടികയില് ഇടംപിടിച്ചതായാണ് വിവരം. തൃശ്ശൂരിന് സമാനമായ രീതിയില് സിനിമാ താരത്തെ മത്സരിപ്പിക്കുന്നതില് സംസ്ഥാന ഘടകത്തോട് കേന്ദ്രനേതൃത്വം അഭിപ്രായം ആരാഞ്ഞു. നാലുവര്ഷം മുന്പാണ് ഖുശ്ബു കോണ്ഗ്രസ് വിട്ട് ബിജെപിയില് ചേര്ന്നത്. നിലവില് ബിജെപി തമിഴ്നാട് ഘടകത്തിന്റെ ഭാഗമായാണ് ഖുശ്ബു പ്രവര്ത്തിക്കുന്നത്.
പ്രിയങ്കയ്ക്ക് ഒത്ത എതിരാളിയെ തിരയുകയാണ് ബിജെപി നേതൃത്വം. താര പരിവേഷമുള്ള കോണ്ഗ്രസ് നേതാവിന്, അതേ തലപ്പൊക്കമുള്ള മറ്റൊരു നേതാവിനെയാണ് പാര്ട്ടി തേടുന്നത്. അങ്ങനെയാണ് ഖുശ്ബു അന്തിമ പട്ടികയിലേക്ക് എത്തിയത്. തമിഴ്നാട് കേന്ദ്രീകരിച്ചാണ് രാഷ്ട്രീയ പ്രവര്ത്തനം എങ്കിലും മലയാളിക്ക് ഏറെ സുപരിചിതമായ സിനിമാ താരമാണ് ഖുശ്ബു. തമിഴ് വംശജര് കൂടി വോട്ടര്മാരായുള്ള വയനാട് മണ്ഡലത്തില് ഖുശ്ബുവിന്റെ വരവ് വലിയ സ്വാധീനം ചെലുത്തും എന്നാണ് കണക്കുകൂട്ടല്.
ബിജെപി സംസ്ഥാന ഘടകം അനുകൂലമായ മറുപടിയാണ് നല്കിയത്. തൃശ്ശൂരില് പരീക്ഷിച്ചു വിജയിച്ച ഫോര്മുലയ്ക്ക് ഒരു തുടര്ച്ചയെന്നാണ് നേതൃത്വം പ്രതീക്ഷിക്കുന്നത്. എന്നാല് ബിജെപിയുടെ തമിഴ്നാട് ഘടകത്തിന്റെ നിലപാട് സ്ഥാനാര്ത്ഥത്തില് നിര്ണായകമാണ്. സംസ്ഥാന അധ്യക്ഷന് അണ്ണാമലയുമായുള്ള അസ്വാരസ്യം നിലനില്ക്കുന്നുണ്ട്.
അതേസമയം ഉരുള്പൊട്ടല് ദുരന്തത്തിന്റെ പശ്ചാത്തലത്തില് വയനാടിന് പ്രത്യേക സഹായം നല്കുന്നത് പരിഗണനയിലാണെന്ന് കേന്ദ്ര സര്ക്കാര് ഹൈക്കോടതിയെ അറിയിച്ചു. കഴിഞ്ഞ രണ്ട് വര്ഷങ്ങളിലായി 700 കോടിയിലധികം രൂപ ദുരന്ത നിവാരണ പ്രവര്ത്തനങ്ങള്ക്കായി കേരളത്തിന് നല്കിയിട്ടുണ്ട്. എന്നാല് ഈ തുക സംസ്ഥാനത്തിന് മുഴുവനായി നല്കിയതാണെന്നും ദുരന്തത്തിന്റെ പശ്ചാത്തലത്തില് വയനാടിന് പ്രത്യേക സഹായം വേണമെന്നും കേരളം ആവര്ത്തിച്ചു.
നേരത്തെ കിട്ടിയ തുക എവിടെയൊക്കെ, എന്ത് ആവശ്യങ്ങള്ക്ക് വിനിയോഗിച്ചെന്ന് അറിയിക്കണമെന്ന് കോടതി സംസ്ഥാന സര്ക്കാരിനോട് നിര്ദേശിച്ചു. ബാങ്ക് ലോണുകളുടെ കാര്യത്തില് സര്ക്കുലര് ഇറക്കുന്നത് കേന്ദ്ര സര്ക്കാര് പരിഗണിക്കണമെന്നും കോടതി നിര്ദ്ദേശിച്ചു.
"
https://www.facebook.com/Malayalivartha