കൊല്ലം കൊട്ടാരക്കരയില്‍ മദ്യലഹരിയില്‍ മകന്‍ അച്ഛനെ കൊലപ്പെടുത്തി. തൃക്കണ്ണമംങ്കല്‍ സ്വദേശി തങ്കപ്പന്‍ ആചാരിയാണ് കൊല്ലപ്പെട്ടത്. വെട്ടേറ്റ നിലയില്‍ കണ്ടെത്തിയ തങ്കപ്പന്‍ ആചാരിയുടെ കഴുത്തില്‍ തോര്‍ത്തും മുറുക്കിയിരുന്നു. മകന്‍ അജിത്തിനെ പൊലീസ് അറസ്റ്റ് ചെയ്തു. തൃക്കണ്ണമംങ്കലിലെ വീട്ടില്‍ തങ്കപ്പന്‍ ആചാരിയും മകന്‍ അജിത്തും മാത്രമായിരുന്നു താമസിച്ചിരുന്നത്.


ഇന്നലെ രാവിലെയാണ് അച്ഛനെ കൊലപ്പെടുത്തിയെന്ന് അജിത്ത് ഒരു സുഹൃത്തിനെ ഫോണ്‍ വിളിച്ച് അറിയിച്ചത്. പിന്നാലെ കൊട്ടാരക്കര പൊലീസ് വീട്ടിലെത്തി. വെട്ടേറ്റ നിലയില്‍ ആയിരുന്നു മൃതദേഹം. കഴുത്തില്‍ തോര്‍ത്ത് വരിഞ്ഞ് മുറുക്കിയിരുന്നു. ശ്വാസം മുട്ടിച്ച ശേഷം വെട്ടി കൊലപ്പെടുത്തിയതാകാമെന്നാണ് നിഗമനം. അജിത്തിനെ പൊലീസ് അറസ്റ്റ് ചെയ്തു. മദ്യലഹരിയിലാണ് അജിത്ത് അച്ഛനെ കൊലപ്പെടുത്തിയത്. കൊലപാതകത്തിലേക്ക് നയിച്ച കാരണം വ്യക്തമല്ല.

അരുംകൊലയുടെ നടുക്കത്തില്‍ ബന്ധുക്കളും നാട്ടുകാരും. റിട്ടയേര്‍ഡ് ഫയര്‍ഫോഴ്‌സ് ഉദ്യോഗസ്ഥനാണ് തങ്കപ്പന്‍ ആചാരി. 81 വയസായിരുന്നു. അജിത്ത് ഭാര്യയുമായി പിരിഞ്ഞാണ് താമസിക്കുന്നത്. ഇയാള്‍ സ്ഥിരം മദ്യപാനിയാണ്. മകന്റെ മദ്യപാനത്തെ അച്ഛന്‍ എതിര്‍ത്തിരുന്നുവെന്നും നാട്ടുകാര്‍.