വിമാന സർവീസുകൾക്ക് നേരെയുള്ള ബോംബ് ഭീഷണി തുടർക്കഥയാകുന്നു.  മനുഷ്യബോംബ് ഭീഷണിയെ തുടർന്നു നെടുമ്പാശേരിയിൽ നിന്നുള്ള വിമാനം പുറപ്പെടാൻ വൈകി. വൈകിട്ട് 3.50ന് മുംബൈയ്ക്കു പറക്കേണ്ട വിസ്താര വിമാനം അരമണിക്കൂറോളം വൈകി . മഹാരാഷ്ട്ര സ്വദേശിയാണ് ബോംബുണ്ടെന്ന ഭീഷണി വിമാനത്തിലേക്കു പ്രവേശിക്കുമ്പോൾ ‘എന്റെ കയ്യിൽ ബോംബുണ്ട്’ എന്നു പറഞ്ഞു ഭീഷണിയുയർത്തിയത്.

ഭീഷണിസന്ദേശത്തിനു പിന്നാലെ വിമാനത്താവള അധികൃതർ ഇയാളെ പരിശോധിക്കുകയും ചെയ്തു . സിഐഎസ്എഫ് ഉദ്യോഗസ്ഥരും പരിശോധിച്ചു , പക്ഷെ  ബോംബ് ഇത് വരെ കണ്ടെത്താൻ സാധിച്ചിട്ടില്ല  .  യാത്രക്കാരനെ അധികൃതർ നെടുമ്പാശേരി പൊലീസിനു കൈമാറി. ബോംബ് ഭീഷണി വ്യാജമാണെന്നും അപകടമില്ലെന്നും പിന്നീട്‌ വ്യക്തമായി. ഇതോടെ  4.19ന് വിമാനം പറന്നുയർന്നു. തുടരെ ഭീഷണിയുള്ളതിനാൽ ഇപ്പോൾ യാത്രക്കാർക്കു രണ്ടുവട്ടമാണ്  ദേഹ പരിശോധന നടത്തുന്നത്.

 കഴിഞ്ഞ ദിവസവും നെടുമ്പാശ്ശേരി വിമാനത്താവളത്തിൽ ബോംബ് ഭീഷണിയുണ്ടായിരുന്നു. രാജ്യത്തു വിമാനങ്ങൾക്കെതിരെയുള്ള വ്യാജ ബോംബ് ഭീഷണി ഗൗരവമുള്ളതാണെന്നും കുറ്റവാളികള്‍ക്കു യാത്രാവിലക്ക് ഏര്‍പ്പെടുത്തുമെന്നും വ്യോമയാന മന്ത്രി റാം മോഹൻ നായിഡു വ്യക്തമാക്കി. 5 ദിവസത്തിനിടെ നൂറിലേറെ വിമാനങ്ങള്‍ക്കാണു ഭീഷണിസന്ദേശം ലഭിച്ചത്.