വല്ലാത്തൊരു ദുരന്ത വാര്‍ത്തയാണ് ഷൊര്‍ണൂരില്‍ നിന്നും വന്നത്. റെയില്‍വെ ട്രാക്കില്‍ മാലിന്യം ശേഖരിക്കാനിറങ്ങിയ മൂന്ന് ശുചീകരണ തൊഴിലാളികള്‍ ട്രെയിന്‍ തട്ടി മരിച്ച സംഭവത്തില്‍ കാണാതായ ഒരാള്‍ക്കായുള്ള ഇന്നത്തെ തെരച്ചില്‍ നിര്‍ത്തിവെച്ചു. ഷൊര്‍ണൂരിന് സമീപമുള്ള കൊച്ചിന്‍ പാലത്തില്‍ നിന്നും ട്രെയിന്‍ തട്ടി ഭാരതപുഴയില്‍ വീണുവെന്ന് സംശയിക്കപ്പെടുന്ന ശുചീകരണ തൊഴിലാളിയായ സേലം സ്വദേശിയായ ലക്ഷ്മണന്‍ (48) എന്നയാള്‍ക്കായായാണ് ഇന്ന് വൈകിട്ട് വരെ ഫയര്‍ഫോഴ്‌സ് തെരച്ചില്‍ നടത്തിയത്.

മരിച്ച മൂന്നുപേരുടെയും മൃതദേഹം ട്രാക്കില്‍ നിന്നായി കണ്ടെത്തിയിരുന്നു. ഇവരുടെ മൃതദേഹങ്ങള്‍ പാലക്കാട് ജില്ലാ ആശുപത്രിയിലേക്ക് മാറ്റി. കാണാതായ നാലാമത്തെയാളെ കണ്ടെത്താന്‍ നാളെ പുലര്‍ച്ചെ വീണ്ടും തെരച്ചില്‍ ആരംഭിക്കും. ഇന്ന് വൈകിട്ട് ആറുവരെ തെരച്ചില്‍ നടത്തി. പുഴയില്‍ അടിയൊഴുക്ക് ശക്തമായതോടെയാണ് തെരച്ചില്‍ അവസാനിപ്പിച്ചതെന്ന് ഫയര്‍ഫോഴ്‌സ് അറിയിച്ചു. ഇന്ന് ഫയര്‍ഫോഴ്‌സിന്റെ സ്‌കൂബാ ടീമും സ്ഥലത്തെത്തി തെരച്ചില്‍ നടത്തും.

റെയില്‍വേ ട്രാക്കില്‍ മാലിന്യം ശേഖരിക്കാനിറങ്ങിയ മൂന്ന് ശുചീകരണ തൊഴിലാളികളാണ് ട്രെയിന്‍ തട്ടി മരിച്ചത്. രക്ഷപ്പെടാനായി ട്രാക്കില്‍ നിന്ന് ഭാരതപ്പുഴയിലേക്ക് ചാടിയെന്ന് സംശയിക്കുന്ന ഒരു തൊഴിലാളിയെ കാണാതായി. ഇയാള്‍ക്കായുള്ള തെരച്ചില്‍ ഇന്നും തുടരും. ഷോര്‍ണൂര്‍ റെയില്‍വേ സ്റ്റേഷന് സമീപം കൊച്ചി റെയില്‍വേ മേല്‍പ്പാലത്തില്‍ ഇന്നലെ വൈകിട്ട് മൂന്നുമണിയോടെ ആയിരുന്നു അപകടം.

റെയില്‍വേ കരാര്‍ തൊഴിലാളികളും സേലം അയോധ്യപട്ടണം സ്വദേശികളുമായ ലക്ഷ്മണന്‍ (60), ഭാര്യ വള്ളി (55), അയോധ്യപട്ടണം സ്വദേശിയായ റാണി (45) എന്നിവരാണ് മരിച്ചത്. ഇവരുടെ മൃതദേഹങ്ങള്‍ റെയില്‍വെ ട്രാക്കിന് സമീപത്തു നിന്നും കണ്ടെത്തി. റാണിയുടെ ഭര്‍ത്താവ് ലക്ഷ്മണന്‍ (48)നെയാണ് കണ്ടെത്താനുള്ളത്. ലക്ഷ്മണനുവേണ്ടിയാണ് പുഴയില്‍ തെരച്ചില്‍ നടത്തുന്നത്. മരിച്ച റാണിയും വല്ലിയും സഹോദരിമാരാണ്. അഞ്ചുവര്‍ഷമായി നാലുപേരും ഒറ്റപ്പാലത്താണ് താമസം.

ദില്ലിയില്‍ നിന്ന് തിരുവനന്തപുരത്തേക്ക് വരുകയായിരുന്ന കേരള എക്‌സ്പ്രസ് ട്രെയിന്‍ തട്ടിയാണ് അപകടം. ഷൊര്‍ണൂര്‍ റെയില്‍വെ സ്റ്റേഷന്‍ കഴിഞ്ഞുള്ള കൊച്ചിന്‍ പാലത്തില്‍ വെച്ചാണ് അതിദാരുണമായ അപകടമുണ്ടായത്. മാലിന്യം നീക്കം ചെയ്യുന്നതിന് റെയില്‍വെ പുറം കരാര്‍ നല്‍കിയ സംഘത്തിലുള്ളവരാണ് അപകടത്തില്‍പ്പെട്ടത്. പത്തു പേരടങ്ങുന്ന ശുചീകരണ തൊഴിലാളികളാണ് പാളത്തില്‍ നിന്ന് മാലിന്യം ശേഖരിച്ചിരുന്നത്.

ഇതില്‍ ആറു പേര്‍ ഓടി രക്ഷപ്പെട്ടുവെന്നാണ് വിവരം. ട്രെയിന്‍ തട്ടിയ നാലുപേരും മരിച്ചുവെന്നായിരുന്നു ആദ്യം ലഭിച്ച വിവരമെങ്കിലും മൂന്നുപേരുടെ മൃതദേഹമാണ് കണ്ടെത്താനായതെന്നും ഒരാളെ കാണാനില്ലെന്നും പൊലീസ് അറിയിച്ചു. തുടര്‍ന്നാണ് ഭാരതപ്പുഴയില്‍ വീണുവെന്ന നിഗമനത്തില്‍ ഫയര്‍ഫോഴ്‌സ് തെരച്ചില്‍ ആരംഭിച്ചത്.

ട്രെയിന്‍ വരുമ്പോള്‍ രണ്ടു പുരുഷന്മാരും പാലത്തിന്റെ നടുഭാഗത്തായിരുന്നു ഉണ്ടായിരുന്നത്. ഓടി രക്ഷപ്പെടാന്‍ ശ്രമിച്ചപ്പോഴേക്കും ഇവരെ ട്രെയിന്‍ ഇടിച്ചുവെന്ന് ദൃക്‌സാക്ഷികള്‍ പറഞ്ഞു. ഭാരതപ്പുഴക്ക് കുറുകെ ഷൊര്‍ണൂരിലെ ചെറുതുരുത്തിയിലാണ് കൊച്ചിന്‍ പാലമുള്ളത്. പാലത്തില്‍ നില്‍ക്കുമ്പോള്‍ പെട്ടെന്ന് ട്രെയിന്‍ വന്നു. ട്രാക്കില്‍ നിന്ന് മാറാനുള്ള ശ്രമത്തിനിടെയാണ് അപകടമുണ്ടായതെന്നാണ് കരുതുന്നത്.

ട്രെയിന്‍ വരുന്നത് ഇവര്‍ അറിഞ്ഞിരുന്നില്ലെന്നും സൂചനയുണ്ട്. മരിച്ച മൂന്നു പേരുടെ മൃതദേഹങ്ങള്‍ പാലക്കാട് ജില്ലാ ആശുപത്രിയിലേക്ക് മാറ്റി. സംഭവത്തില്‍ റെയില്‍വെ പൊലീസ് അന്വേഷണം ആരംഭിച്ചു. പൊലീസ് സ്ഥലത്തെത്തിയിട്ടുണ്ട്. അപകടം സംബന്ധിച്ച മറ്റു കാര്യങ്ങള്‍ അന്വേഷിച്ചുവരുകയാണെന്ന് പൊലീസ് അറിയിച്ചു. സംഭവം നടന്നതിന്റെ റെയില്‍വെ ട്രാക്കിന് സമീപമായി തൊഴിലാളികളുടെ ഭക്ഷണ പാത്രങ്ങളും തുണികളും മറ്റു വസ്തുക്കളെല്ലാം കിടക്കുന്നുണ്ട്. തൊഴിലാളികള്‍ ചാക്കുകളിലാക്കിയ മാലിന്യങ്ങളും ട്രാക്കിന് സമീപമുണ്ട്.