കെങ്കേരിയില്‍ ആഡംബര കാറിടിച്ച് യുവതി മരിച്ചു. കെങ്കേരിയിലെ കെ. സന്ധ്യയാണ് (30) മരിച്ചത്. സംഭവത്തില്‍ കാര്‍ ഓടിച്ച വീര്‍ ശിവയുടെ മകന്‍ ധനുഷിനെതിരെ (20) പൊലീസ് നരഹത്യക്ക് കേസെടുക്കുകയും ചെയ്തു. ധനുഷ് മദ്യലഹരിയിലാണ് മെഴ്‌സഡസ് ബെന്‍സ് ഓടിച്ചതെന്നാണ് നാട്ടുകാര്‍ പൊലീസിനോട് പറഞ്ഞത്.

റോഡ് മുറിച്ചുകടക്കുകയായിരുന്ന സന്ധ്യയുടെ ദേഹത്ത് കാര്‍ കയറിയിറങ്ങുകയായിരുന്നു. സംഭവസ്ഥലത്ത് നിന്ന് ഓടിരക്ഷപ്പെടാന്‍ ശ്രമിച്ച ധനുഷിനെ നാട്ടുകാര്‍ പിടികൂടി കൈകാര്യം ചെയ്തശേഷം പൊലീസില്‍ ഏല്‍പ്പിച്ചു.

ഈയിടെയാണ് ധനുഷിന്റെ പിതാവ് ആഡംബര കാര്‍ വാങ്ങിയത്. വാഹനം ഓടിച്ചു നോക്കാനായി എടുത്ത മകന്‍ സുഹൃത്തുമായി ചേര്‍ന്ന് യശ്വന്ത്പൂരിലെ മാളിലെത്തി മദ്യപിച്ചശേഷം ദീര്‍ഘ ഓട്ടത്തിനായി മൈസൂരുവിലേക്ക് പുറപ്പെട്ടതിനിടെയാണ് അപകടം സംഭവിച്ചത്.