സിപിഐ ഉൾപ്പെടെയുള്ള ഘടകകക്ഷികൾ മുഖ്യമന്ത്രി പിണറായി വിജയനും അദ്ദേഹത്തിൻറെ സർക്കാരിനെതിരെ അതിശക്തമായ വിമർശനങ്ങളാണ് നിരന്തരം ഉന്നയിച്ചുകൊണ്ടിരിക്കുന്നത്. മുഖ്യമന്ത്രി പിണറായി വിജയൻറെ കെടുകാര്യസ്ഥത ഒന്നുകൊണ്ട് മാത്രമാണ് ഇലക്ഷൻ തോറ്റതെന്ന് സിപിഐ നേതാക്കൾ പരസ്യമായി പറയുന്ന സാഹചര്യം  നിലവിലുണ്ട്.   സിപിഐയുടെ പരസ്യ വിമർശനങ്ങൾക്ക് സിപിഎം മറുപടി പറയുന്നുമില്ല.      പിണറായി വിജയൻറെ സ്ഥാനത്ത് മുഖ്യമന്ത്രി വി.ഡി.  സതീശൻ ആയിരുന്നെങ്കിൽ എന്ത് സംഭവിക്കുമായിരുന്നു എന്ന് ചിന്തിക്കുന്നത് രസകരമായ കാര്യമാണ്.  സീസറിന്റെ ഭാര്യ വിശുദ്ധയായിരിക്കണം എന്ന ഒരു പ്രസ്താവനയുടെ   ബാക്കിയായിട്ടാണ്  കേരള രാഷ്ട്രീയത്തിലെ മഹാമേരുവായിരുന്ന കെഎം മാണി ധനകാര്യ മന്ത്രിസ്ഥാനം രാജിവെച്ചത്. 

അദ്ദേഹത്തിന് കോടതി നോട്ടീസ് നൽകിയിരുന്നില്ല.   കോടതി നോട്ടീസ് നൽകുക എന്നാൽ കോടതി വിശദീകരണം ചോദിക്കുക എന്നാണ് അർത്ഥം.  പ്രതിസ്ഥാനത്ത് ഉള്ളവരിൽ നിന്നാണ് കോടതി വിശദീകരണം ചേദിക്കുന്നത്.  പിണറായി വിജയനും മകളും ഇപ്പോൾ നിൽക്കുന്നത് പ്രതിസ്ഥാനത്താണ്.  അദ്ദേഹത്തിന് സ്വന്തം പാർട്ടിയിൽ നിന്ന് പോലും വേണ്ടത്ര പിന്തുണ ലഭിക്കുന്നില്ലെങ്കിലും വിട്ടുകൊടുക്കാൻ അദ്ദേഹം തയ്യാറല്ല.മുഖ്യമന്ത്രി എന്ന വ്യക്തിപ്രഭാവം ഉപയോഗിച്ച് മകൾ അഴിമതി നടത്തിയെന്നാണ് വാദം. ഇതിൽ സഹമന്ത്രിമാർക്ക് യാതൊരു പങ്കുമില്ല. അതു തന്നെയാണ് സി പി എമ്മിന്റെ കരുത്ത്. മാസപ്പടി വിഷയം ഏറെടുക്കാൻ സി പി എം തയ്യാറാകാത്തതും അതുകൊണ്ടു തന്നെയാണ്. വീണയുടെ കമ്പനി പ്രതിസ്ഥാനത്ത് വന്നാൽ അവർ മറുപടി പറയട്ടേ എന്നാണ്  പാർട്ടിയുടെ നിലപാട് . 

പിണറായി തോറ്റമ്പിയ സാഹചര്യത്തിൽ ഇനി പാർട്ടി  ഇക്കാര്യം ഏറ്റെടുക്കുകയേയില്ല. അതായത് എല്ലാ കണ്ണുകളും പിണറായിയിലാണ്. മൂന്ന് ഉപ തിരഞ്ഞടുപ്പുകൾ കൂടി തോൽക്കുന്നതോടെ പിണറായി തീർത്തും ഒറ്റപ്പെടും. ഇതിൽ ചേലക്കരയിൽ മാത്രമാണ് സി.പി.എമ്മിന് അൽപ്പമെങ്കിലും പ്രതീക്ഷയുള്ളത്. എന്നാൽ ചേലക്കരയിൽ കെ. രാധാകൃഷണൻ ഇല്ലാത്തത് സി.പി. എമ്മിനെ ദോഷകരമായി ബാധിക്കുന്നുണ്ട്. രാധാകൃഷ്ണന്റെ ഇമേജ് മറ്റൊന്നാണ്. ഇതിനെ വെല്ലാൻ കേരള രാഷ്ട്രീയത്തിൽ ആർക്കും കഴിഞ്ഞിട്ടില്ല. പാലക്കാട് സീറ്റിൽ ബീ ജെ. പി. ജയിച്ചാൽ സി പി എം ജയിപ്പിച്ചതാണെന്ന ആരോപണവും നേരിടേണ്ടി വരും. അതും പാർട്ടി അണികളെ ബാധിക്കുന്നുണ്ട്. കോൺഗ്രസുമായി യോജിക്കേണ്ടതില്ലെന്ന സി.പി.എം നിലപാട് ദോഷകരമായി ബാധിക്കുക സി.പി.എമ്മിനെ തന്നെയാണ്. കാരണം കേരളത്തിൽ ഉൾപ്പെടെ ബി ജെ പി ബന്ധത്തിന്റെ ആരോപണം സി പി എം നേരിടുന്നുണ്ട്. സുരേഷ് ഗോപി ജയിച്ചത് സി.പി.എം. സഹായത്തോടെയാണെന്ന് ഇതിനകം ആരോപണം ഉയർന്നിട്ടുണ്ട്.

കോൺഗ്രസുമായി  ചേരരുത് എന്ന തീരുമാനം പരസ്യമായി സഹായിക്കുന്നത് ബി ജെ പിയെയാണെന്ന്   പാർട്ടി പ്രവർത്തകർ പോലും  കരുതുന്നു.കോൺഗ്രസ്   സഖ്യത്തെക്കാൾ നല്ലത് ദയാവധമാണെന്നാണ്  പിണറായി ഉൾപ്പെടെയുള്ള  കേരള  നേതാക്കളുടെ വാദം. ഇതു കേട്ട്  പണ്ട് യച്ചൂരി  ഞെട്ടിയിരുന്നു. . കോൺഗ്രസ് മുക്ത ഭാരതം എന്ന നരേന്ദ്ര മോദിയുടെ സ്വപ്നം സാക്ഷാത്കരിക്കുന്നതിന് വേണ്ടിയാണ് ഇപ്പോൾ  സാക്ഷാൽ പിണറായി വിജയൻ  ശ്രമിക്കുന്നത്. സഖ്യത്തെ ചൊല്ലി സിപിഎം പിബി യോഗത്തിൽ ഭിന്നത രൂക്ഷമാണ്.. കോൺഗ്രസുമായുള്ള സഖ്യം ഗുണം ചെയ്യില്ല. വർഗീയതയെ ചെറുക്കുന്നതിൽ കോൺഗ്രസ് പരാജയമാണെന്നും പിബിയിൽ അഭിപ്രായമുയർന്നു.  കോൺഗ്രസ് സഖ്യത്തിന് വേണ്ടി നിലകൊണ്ടവരുടെ   കരണത്തടിക്കുന്ന തരത്തിലാണ് പിണറായി  ഉൾപ്പെടെയുള്ള  നേതാക്കൾ സംസാരിച്ചത്.

മുമ്പ് ഇത്തരം അഭിപ്രായ ഭിന്നത ഉണ്ടായപ്പോൾ    യച്ചൂരി പാലിച്ചത് കനത്ത നിശബ്ദതയാണ്. അന്ന്  ഭൂരിപക്ഷാഭിപ്രായം ഇങ്ങനെയാവുമ്പോൾ യച്ചൂരിക്ക് നിശബ്ദനാവാതെ മറ്റ് വഴികളൊന്നും ഉണ്ടായിരുന്നില്ല.ഒരു വിഭാഗം പ്രവർത്തകർ കോൺഗ്രസ് ഇല്ലാതെ പ്രതിപക്ഷ ഐക്യം സാധ്യമല്ലെന്ന് അഭിപ്രായപ്പെട്ടപ്പോൾ കോൺഗ്രസിനെ ആശ്രയിക്കുന്നത് ഗുണം ചെയ്യില്ലെന്ന അഭിപ്രായമാണ് മറുവിഭാഗത്തിനുള്ളത്. ബിജെപിയെ ചെറുക്കാൻ പ്രാദേശിക പാർട്ടികളുമായി സഹകരിച്ച് മുന്നോട്ടുപോവണം. പ്രാദേശിക സാഹചര്യം അനുസരിച്ചുള്ള സഖ്യങ്ങളാണ് പ്രായോഗികമെന്ന് ചിലർ അഭിപ്രായപ്പെട്ടു. അന്ന്  പിബി യോഗത്തിൽ ഭിന്നാഭിപ്രായങ്ങൾ ഉയർന്നതിനാൽ വിഷയം കേന്ദ്രകമ്മിറ്റിയുടെ പരിഗണനയ്ക്ക് വിട്ടു. ഇത് ഇപ്പോഴും കേന്ദ്ര കമ്മറ്റി പരിഗണിക്കുന്നു. 

സിപിഎം ബംഗാൾ ഘടകത്തിന്റെ വർഷങ്ങളായുള്ള ആവശ്യം പരിഗണിച്ചുകൊണ്ട് കഴിഞ്ഞ നിയമസഭാതിരഞ്ഞെടുപ്പിൽ കോൺഗ്രസുമായി സിപിഎം പ്രത്യക്ഷ സഖ്യത്തിലേർപ്പെട്ടിരുന്നു. എന്നാൽ രണ്ട് പാർട്ടികളും തിരഞ്ഞെടുപ്പിൽ വട്ടപ്പൂജ്യമായി. ഈ അനുഭവം മുൻനിർത്തി കോൺഗ്രസ്-സിപിഎം സഖ്യം ഫലവത്താവില്ലെന്നാണ് ഒരുവിഭാഗം വാദിക്കുന്നത്. കോൺഗ്രസ് സഖ്യം  ഇല്ലായിരുന്നെങ്കിൽ ഇതിനെക്കാൾ മെച്ചപ്പെട്ട പ്രകടനം കാഴ്ചവയ്ക്കുമായിരുന്നു എന്നാണ്  കേരള നേതാക്കൾ അഭിപ്രായപ്പെട്ടത്.കോൺഗ്രസുമായി  ഇടതുപാർട്ടികൾ  ഒരിക്കലും ധാരണ ഉണ്ടാക്കരുതെന്ന അഭിപ്രായമാണ് പിണറായിയും മറ്റും മുമ്പേ വച്ചുപുലർത്തുന്നത്.  പിണറായിയുടെ അഭിപ്രായത്തിന് ബി ജെ പിയുടെ പിന്തുണയുണ്ട്. ഏതുവിധേനയും ഇടതുപാർട്ടികളെ കോൺഗ്രസിൽ നിന്നും അകറ്റുകയാണ് ബി ജെ പിയുടെ ലക്ഷ്യം. 

പിണറായിയുടെ അഭിപ്രായത്തിന് പി.ബിയിൽ ഒരു പ്രബല വിഭാഗത്തിൻ്റെ പിന്തുണയുണ്ട്. ബിജെപിക്ക് ദീർഘകാലം രാജ്യം ഭരിക്കണമെങ്കിൽ കോൺഗ്രസ് നശിക്കണം. അതിനുള്ള ശ്രമങ്ങൾ രാജ്യത്ത് നാളുകൾക്ക് മുമ്പേ ആരംഭിച്ചു കഴിഞ്ഞിരുന്നു.കോൺഗ്രസിന് ദേശീയ തലത്തിൽ നേതാവ് പോലുമില്ലാത്ത അവസ്ഥയാണ് നിലവിലുള്ളത്. കോൺഗ്രസിൻ്റെ തലയിൽ ആർക്കും കയറി മേയാവുന്ന അവസ്ഥയാണ്  ഇന്നുള്ളത്. വൻ പ്രതിസന്ധിയിൽ ആടിയുലയുമ്പോഴും അധികാരം വിട്ടൊഴിയാൻ ഗാന്ധി കുടുംബം തയ്യാറല്ല.ഇതാണ് വയനാട്ടിൽ കാണുന്നത്. കോൺഗ്രസ് സഖ്യത്തെ എതിർക്കുന്നു എന്നതാണ് പിണറായി വിജയനോടുള്ള നരേന്ദ്ര മോദിയുടെ പ്രതിപത്തിക്ക് പിന്നിലുള്ളത്. കേരളത്തിൽ സ്വർണ്ണക്കടത്ത് കേസ് പോലുള്ള ആരോപണങ്ങൾ കെട്ടു മുറുക്കിയിട്ടും മോദി പിണറായിയെ തൊടാത്തതിന് പിന്നിലുള്ള കാരണം ഇതാണ്. 

ഇടതുപാർട്ടികളുടെ പിന്തുണയില്ലാതെ  കോൺഗ്രസിന് ദേശീയ തലത്തിൽ നിലനിൽപ്പില്ല. ഇടതു പാർട്ടികൾ ദേശീയ തലത്തിൽ ഒരു കൺസോർഷ്യമായി  മാറിയാലും  അവർ എത്ര ദൂരം പോകുമെന്ന് മോദിക്ക് നന്നായറിയാം. പ്രതിപക്ഷത്തെ ഇല്ലാതാക്കണമെങ്കിൽ  അവർ പല ട്രാക്കുകളിലൂടെ ഓടണം. അതിനാണ് പിണറായിയുടെ സഹായ ത്തോടെ  മോദി ശ്രമിക്കുന്നത്. യച്ചൂരിയ്ക്ക് എം.പി സ്ഥാനം നൽകാമെന്ന കോൺഗ്രസ് വാഗ്ദാനം ഇല്ലാതാക്കിയതും പിണറായിയാണ്. മോദിയെ സംബന്ധിച്ചടത്തോളം പിണറായി പ്രതീക്ഷ പുലർത്തുന്ന നേതാവാണ്. ഏതായാലും  രാജ്യത്തിന്റെ ഭാവി മോദിയുടേതാണെന്ന് ഉറപ്പിക്കാം.  പ്രതിപക്ഷ നേതാക്കളെ പോലും ഒരുമിച്ച് നിർത്താൻ കഴിയാത്ത  രാഹുൽ ഗാന്ധിക്ക് എങ്ങനെയാണ് രാജ്യത്തെ നയിക്കാൻ കഴിയുക?