ജന്മദിനത്തില്‍ വാഹനാപകടത്തില്‍ വിദ്യാര്‍ഥിക്ക് ദാരുണാന്ത്യം... തേവലക്കര പാലയ്ക്കല്‍ കാട്ടയ്യത്ത് ഷിഹാബുദ്ദീന്റെയും സജീദയുടെയും മകന്‍ അല്‍ത്താഫ് (19) ആണ് മരിച്ചത്.

വെള്ളിയാഴ്ച ഉച്ചയ്ക്ക് ചാമ്പക്കടവ്-മാരാരിത്തോട്ടം റോഡില്‍ കല്ലേലിഭാഗം സ്‌കൂളിനു സമീപമായിരുന്നു അപകടം നടന്നത്. അല്‍ത്താഫും സുഹൃത്തും സഞ്ചരിച്ച ബൈക്കില്‍ പിക്കപ്പ് വാന്‍ ഇടിച്ചായിരുന്നു അപകടം നടന്നത്.

കരുനാഗപ്പള്ളി ഐഎച്ച്ആര്‍ഡി എന്‍ജിനീയറിങ് കോളജ് വിദ്യാര്‍ഥിയായ അല്‍ത്താഫും സുഹൃത്തും ജുമുഅ നമസ്‌കാരത്തിനായി മസ്ജിദിലേക്കു പോകുന്നതിനിടെയായിരുന്നു സംഭവം . അല്‍ത്താഫ് സംഭവ സ്ഥലത്തുവച്ച് തന്നെ മരിച്ചു. സുഹൃത്തിനെ തിരുവനന്തപുരത്തെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്.

സുഹൃത്തുക്കളും ബന്ധുക്കളും വൈകുന്നേരം അല്‍ത്താഫിന്റെ ജന്മദിനം ആഘോഷിക്കാനിരിക്കെയാണ് മരണ വാര്‍ത്ത ഇവരെ തേടിയെത്തിയത്. കബറടക്കം ശനിയാഴ്ച തേവലക്കര ചാലിയത്ത് മുസ്ലിം ജമാഅത്തില്‍ നടക്കുന്നതാണ്.