വയനാട് ഉപതെരഞ്ഞടുപ്പിനായി വോട്ട് തേടി മലപ്പുറം വഴിക്കടവ് പുഞ്ചക്കൊല്ലിയിലെ ആദിവാസി നഗറിലേക്ക് പുറപ്പെട്ട മന്ത്രി പുന്നപ്പുഴയില്‍ ചങ്ങാടത്തില്‍ കുടുങ്ങി. ശനിയാഴ്ച വൈകീട്ട് 5.15 ഓടെയാണ് സംഭവം. മറ്റ് എല്‍.ഡി.എഫ് നേതാക്കളും മന്ത്രിയുടെ കൂടെയുണ്ടായിരുന്നു.മുളകൊണ്ട് നിര്‍മിച്ച ചങ്ങാടം പുഴയിലെ കൂറ്റന്‍ കല്ലില്‍ തടഞ്ഞ് കുടുങ്ങുകയായിരുന്നു.

നാലുപേരാണ് സാധാരണ ചങ്ങാടത്തില്‍ കയറാറുള്ളത്. മന്ത്രി ഉള്‍പ്പെടെ പത്തുപേരാണ് ഇതിലുണ്ടായിരുന്നത്. വയനാട് ഉപതെരഞ്ഞടുപ്പ് എല്‍.ഡി.എഫ് സ്ഥാനാര്‍ഥി സത്യന്‍ മൊകേരിയുടെ പ്രചാരണത്തിന്റെ ഭാഗമായി വഴിക്കടവ് പുഞ്ചക്കൊല്ലി ആദിവാസി നഗറിലേക്ക് പോകും വഴി പുന്നപ്പുഴ കടക്കുന്നതിനിടെയാണ് മന്ത്രി ഒ.ആര്‍. കേളു ചങ്ങാടത്തില്‍ കുടുങ്ങിയത്. ഇന്നലെ വൈകീട്ടാണ് സംഭവം.

ചങ്ങാടം താഴ്ന്ന് പുഴയിലെ കല്ലില്‍ കുടുങ്ങുകയായിരുന്നു. കുറച്ചുപേരെ പിന്നീട് വെള്ളത്തിലിറക്കി ഏറെ പണിപ്പെട്ടാണ് ചങ്ങാടം കരയ്ക്കടുപ്പിച്ചത്. അരമണിക്കൂറോളം മന്ത്രി ചങ്ങാടത്തില്‍ കുടുങ്ങി. സംഭവം അറിഞ്ഞ് പൊലീസും നാട്ടുകാരും തണ്ടര്‍ബോള്‍ട്ട് സംഘവും ചേര്‍ന്ന് അരമണിക്കൂറോളം നീണ്ട ശ്രമത്തിനൊടുവില്‍ മന്ത്രിയെയും മറ്റു നേതാക്കളെയും രക്ഷപ്പെടുത്തി കരയ്‌ക്കെത്തിക്കുകയായിരുന്നു. ശേഷം പുഞ്ചക്കൊല്ലി നഗറിലെത്തി ആദിവാസികളോട് വോട്ട് അഭ്യര്‍ഥിച്ചാണ് മന്ത്രി മടങ്ങിയത്. 2018ലെ പ്രളയത്തില്‍ പുന്നപ്പുഴക്ക് കുറുകെയുള്ള കമ്പിപ്പാലം തകര്‍ന്നശേഷം ആദിവാസി കുടുംബങ്ങള്‍ പുഴ കടക്കാന്‍ ഈ മുള ചങ്ങാടമാണ് ഉപയോഗിക്കുന്നത്.