ട്രാക്ടര്‍ മാര്‍ച്ചും... വയനാട്ടിലും ചേലക്കരയിലും ഇന്ന് ഉപ തെരഞ്ഞെടുപ്പ് പ്രചാരണത്തിന്റെ കൊട്ടിക്കലാശം; പാലക്കാട് ട്രാക്ടര്‍ മാര്‍ച്ചുകളുമായി യുഡിഎഫും ബിജെപിയും
വയനാട്ടിലും ചേലക്കരയിലും ഉപ തെരഞ്ഞെടുപ്പിന് ഇനി ഒരു ദിവസം മാത്രം. ഇന്ന് കൊട്ടിക്കലാശമാണ്. പരസ്യ പ്രചാരണത്തിന്റെ അവസാന മണിക്കൂറുകളിലും പ്രതീക്ഷ കൈവിടാതെ മുന്നണികള്‍. വോട്ട് പിടിക്കാന്‍ പരമാവധി നേതാക്കള്‍ കളത്തിലിറങ്ങും പാലക്കാട് ഇന്ന് യുഡിഎഫിന്റെയും ബിജെപിയുടെയും ട്രാക്ടര്‍ മാര്‍ച്ചുകളും നടക്കും.
വയനാട്ടിലെ കൊട്ടിക്കലാശ ആവേശത്തിലേക്ക് ഇന്ന് രാഹുല്‍ ഗാന്ധിയും എത്തും. പ്രിയങ്കയ്ക്ക് ഒപ്പം രാവിലെ ബത്തേരിയിലും വൈകിട്ട് തിരുവമ്പാടിയിലും കൊട്ടിക്കലാശത്തില്‍ രാഹുല്‍ ഗാന്ധി പങ്കെടുക്കും. രണ്ടിടത്തും ഇരുവരും ഒന്നിച്ച് റോഡ് ഷോയ്‌ക്കെത്തും.
എല്‍ഡിഎഫ് സ്ഥാനാര്‍ഥി സത്യന്‍ മൊകേരി കല്‍പ്പറ്റയിലെ കൊട്ടിക്കലാശത്തില്‍ പങ്കെടുക്കും. എന്‍ഡിഎ സ്ഥാനാര്‍ഥി നവ്യ ഹരിദാസ് കല്‍പ്പറ്റയിലും മാനന്തവാടിയിലും ബത്തേരിയിലും റോഡ്‌ഷോകളില്‍ പങ്കെടുക്കും. സുല്‍ത്താന്‍ ബത്തേരിയിലാണ് എന്‍ഡിഎയുടെ കൊട്ടിക്കലാശം. ഒരു മാസത്തോളം നീണ്ട വീറും വാശിയും നിറഞ്ഞ ചേലക്കരയിലെ തെരഞ്ഞെടുപ്പ് പ്രചാരണത്തിനാണ് ഇന്ന് കൊട്ടിക്കലാശമാകുന്നത്.
മണ്ഡലത്തിന്റെ ചരിത്രത്തില്‍ ഇന്നേവരെ കാണാത്ത കാടിളക്കിയ പ്രചാരണത്തിനാണ് പരിസമാപ്തിയാകുന്നത്. ഭരണ നേട്ടങ്ങള്‍ ഉയര്‍ത്തിക്കാട്ടി, വിവാദങ്ങളില്‍ കരുതലോടെ പ്രതികരിച്ചുമായിരുന്നു സിറ്റിംഗ് സീറ്റ് നിലനിര്‍ത്താനുള്ള ഇടതുമുന്നണി പ്രചാരണം. ഭരണ വിരുദ്ധ വികാരത്തിലൂന്നി, നേതാക്കള്‍ മുഴുവന്‍ സമയവും ബൂത്ത് തലം വരെ കേന്ദ്രീകരിച്ച് പ്രവര്‍ത്തിച്ചുമായിരുന്നു യുഡിഎഫ് ക്യാമ്പ് നീങ്ങിയത്.
ബിജെപിയും പ്രചാരണത്തില്‍ ഇരുമുന്നണികള്‍ക്കും ഒപ്പത്തിനൊപ്പം പിടിച്ചു. വൈകിട്ട് ചേലക്കര ടൗണിലാണ് മൂന്ന് സ്ഥാനാര്‍ത്ഥികളും പങ്കെടുത്തുള്ള കൊട്ടിക്കലാശം. രമ്യ ഹരിദാസിനൊപ്പം കെപിസിസി അധ്യക്ഷന്‍ കെ സുധാകരനും, യുആര്‍ പ്രദീപിനായി പാലക്കാട്ടെ എല്‍ഡിഎഫ് സ്ഥാനാര്‍ത്ഥി സരിനും കൊട്ടിക്കലാശത്തില്‍ അണിനിരക്കും.
സ്ഥാനാര്‍ഥികള്‍ മണ്ഡലത്തിലെ പരമാവധി ഇടങ്ങളില്‍ ഓടിയെത്തി വോട്ട് തേടാനുള്ള തിരക്കിലാണ്. വൈകുന്നേരം നാലരയോടെ കൊട്ടിക്കലാശത്തിനായി സ്ഥാനാര്‍ഥികളും പ്രവര്‍ത്തകരും ചേലക്കര ബസ്റ്റാന്‍ഡ് പരിസരത്തെത്തും. കെപിസിസി പ്രസിഡന്റ് കെ. സുധാകരന്‍ യുഡി എഫിന്റെ കൊട്ടിക്കലാശത്തില്‍ പങ്കെടുക്കും. പഞ്ചായത്ത് തലത്തിലും കൊട്ടിക്കലാശം നടക്കും.
വയനാട്ടില്‍ കൊട്ടികലാശം കളറാക്കാനുള്ള തയ്യാറെടുപ്പിലാണ് മുന്നണികള്‍. യുഡിഎഫ് സ്ഥാനാര്‍ഥി പ്രിയങ്ക ഗാന്ധിയ്‌ക്കൊപ്പം രാഹുല്‍ ഗാന്ധിയും റോഡ് ഷോയില്‍ പങ്കെടുക്കും. രാവിലെ സുല്‍ത്താന്‍ ബത്തേരിയിലും വൈകീട്ട് തിരുവമ്പാടിയിലുമാണ് റോഡ് ഷോ നടക്കുന്നത്. എല്‍ഡിഎഫ് സ്ഥാനാര്‍ഥി സത്യന്‍ മൊകേരി രാവിലെ സുല്‍ത്താന്‍ ബത്തേരി സെന്റ് മേരീസ് കോളേജിലെത്തും. കൊട്ടിക്കലാശത്തിന് കല്‍പറ്റയില്‍ സത്യന്‍ മൊകേരിക്കൊപ്പം മന്ത്രി പി. പ്രസാദും മറ്റ് നേതാക്കളും പങ്കെടുക്കും . എന്‍ഡിഎ സ്ഥാനാര്‍ഥി നവ്യ ഹരിദാസിന്റെ പ്രചാരണവും കല്‍പ്പറ്റയിലാണ് സമാപിക്കുക.
അതേസമയം ഏറെ വിവാദങ്ങള്‍ക്കൊടുവില്‍ പാലക്കാട്ട് യുഡിഎഫ് സ്ഥാനാര്‍ഥി രാഹുല്‍ മാങ്കൂട്ടത്തിലിനായി പ്രചാരണത്തിനെത്തി മുതിര്‍ന്ന കോണ്‍ഗ്രസ് നേതാവ് കെ. മുരളീധരന്‍. പാലക്കാട് മേപറമ്പില്‍ നടന്ന പ്രചാരണ യോഗത്തിലാണ് മുരളീധരന്‍ പങ്കെടുത്ത് സംസാരിച്ചത്. മുരളിയുടെ പ്രസംഗത്തിനിടെ വേദിയിലെത്തിയ രാഹുല്‍ ഷാള്‍ അണിയിച്ചാണ് സന്തോഷം അറിയിച്ചത്. മുരളീധരന്‍ തിരിച്ചും രാഹുലിനെ ഷാള്‍ അണിയിച്ചു.
വോട്ട് ചോദിക്കുന്നത് യുഡിഎഫിനും കൈപ്പത്തിക്കും വേണ്ടിയാണെന്നും വ്യക്തിക്ക് വേണ്ടിയല്ലെന്നും പ്രസംഗത്തില്‍ മുരളീധരന്‍ പറഞ്ഞു. എഐസിസി പ്രഖ്യാപിച്ചാല്‍ പിന്നെ ആര്‍ക്കും മറ്റൊരു അഭിപ്രായമില്ലെന്നും അദ്ദേഹം പറഞ്ഞു. കെ. മുരളിധരന്‍ വരുമോ എന്ന് ചോദിച്ചുവര്‍ക്കുള്ള മറുപടിയാണിതെന്ന് വേദിയില്‍ നടത്തിയ പ്രസംഗത്തില്‍ രാഹുല്‍ പറഞ്ഞു.
തെരഞ്ഞെടുപ്പാണ് പ്രധാനമെന്നും മറ്റു വിഷയങ്ങളെല്ലാം അപ്രസക്തമാണെന്നും മുരളീധരന്‍ പറഞ്ഞു. പാലക്കാട്ട് യുഡിഎഫ് വിജയം ഉറപ്പാണ്. ഇവിടെ യുഡിഎഫും എല്‍ഡിഎഫും തമ്മിലാണു മത്സരം നടക്കുന്നത്. ഇവിടെ മത്സരം എല്‍ഡിഎഫ്-ബിജെപി സംയുക്ത സ്ഥാനാര്‍ഥികള്‍ക്കെതിരെയാണു മത്സരം നടക്കുന്നത്. പാലക്കാട്ടെ ബിജെപി സ്ഥാനാര്‍ഥിക്ക് വോട്ട് വേണ്ട, നോട്ട് മതി. ബിജെപി അപ്രസക്തമായിക്കൊണ്ടിരിക്കുകയാണ്. സന്ദീപ് വാര്യര്‍ കോണ്‍ഗ്രസിലേക്കു വരേണ്ട ആവശ്യമില്ല. ഇവിടെ കാര്യങ്ങള്‍ നല്ല രീതിയില്‍ നടക്കുന്നുണ്ടെന്നും അദ്ദേഹം പറഞ്ഞു.
https://www.facebook.com/Malayalivartha
