സംസ്ഥാനത്തെ സര്‍ക്കാര്‍ മെഡിക്കല്‍ കോളജുകളില്‍ അനധികൃത അവധിയിലുള്ളവര്‍ക്കെതിരെ കടുത്ത അച്ചടക്ക നടപടിയുമായി മെഡിക്കല്‍ വിദ്യാഭ്യാസ വകുപ്പ്. 2016 മുതല്‍ അനധികൃത അവധിയിലുള്ള 84 പേരുടെ വിവരങ്ങള്‍ പ്രസിദ്ധപ്പെടുത്തി. കര്‍ശന നടപടി ഉണ്ടാകുമെന്നും കൂടുതല്‍ ആളുകള്‍ പുറത്താക്കപ്പെടുന്ന ഘട്ടം ആയിരിക്കാം ഇതെന്നും ആരോഗ്യമന്ത്രി വീണ ജോര്‍ജ് പറഞ്ഞു. മെഡിക്കല്‍ കോളേജുകളിലും തിരുവനന്തപുരം എസ് ടി ആശുപത്രിയിലുമൊക്കെ നഴ്‌സിംഗ് ജീവനക്കാരുടെ കടുത്ത ക്ഷാമം നിലനില്‍ക്കുമ്പോഴാണ് 84 പേര്‍ അനധികൃത അവധിയിലുള്ളത്.

സംസ്ഥാനത്തെ സര്‍ക്കാര്‍ മെഡിക്കല്‍ കോളജുകളിലെ നഴ്‌സിംഗ് ഓഫീസര്‍, നേഴ്‌സിങ് ഓഫീസര്‍ ഗ്രേഡ് വണ്‍ തസ്തികകളില്‍ - അനധികൃത അവധിയിലുള്ളവര്‍ക്കെതിരെ കടുത്ത അച്ചടക്ക നടപടിക്കാണ് വകുപ്പ് ഒരുങ്ങുന്നത്. അവധിയിലുള്ള 84 പേരുടെ വിവരങ്ങള്‍ മാധ്യമങ്ങളില്‍ പ്രസിദ്ധപ്പെടുത്തി. പേര് , ജോലി ചെയ്തിരുന്ന സ്ഥാപനം, എന്നു മുതലായിരുന്നു അവധി തുടങ്ങിയ കാര്യങ്ങളാണ് പട്ടികയായി പ്രസിദ്ധീകരിച്ചത്.

ഇന്നുമുതല്‍ 15 ദിവസത്തിനകം വിശദീകരണം നല്‍കണം. അനധികൃത അവധിയിലുള്ളവര്‍ക്കെതിരെ കര്‍ശന നടപടി ഉണ്ടാകുമെന്ന് ആരോഗ്യ മന്ത്രി വീണ ജോര്‍ജ് പറഞ്ഞു. ജോലിയില്‍ പുനര്‍ പ്രവേശിക്കാന്‍ താല്പര്യമുള്ളവര്‍ക്ക് തിരികെ വരാമെന്നും ഒരു അവസരം ഇനി ഉണ്ടാകില്ലെന്നും മന്ത്രി പറഞ്ഞു. ഡിജിറ്റല്‍ അപ്ലിക്കേഷന്‍ വഴി മാത്രമേ ഇനി അപേക്ഷ സ്വീകരിക്കുകയുള്ളുവെന്നും അതിനുള്ള നടപടികള്‍ ആരംഭിച്ചതായും മന്ത്രി വ്യക്തമാക്കി.