പാമ്പന്‍ പാലത്തിലെ വെര്‍ട്ടിക്കല്‍ ലിഫ്റ്റ് റെയില്‍വേ കടല്‍പ്പാലം യാഥാര്‍ത്ഥ്യത്തിലേക്ക്. ഇന്ത്യയിലെ തന്നെ ആദ്യത്തെ വെര്‍ട്ടിക്കല്‍ ലിഫ്റ്റ് പാലമാണിത്. പാലത്തിന്റെ ലിഫ്റ്റ് സ്പാന്‍ അടക്കമുള്ള പ്രവര്‍ത്തനങ്ങള്‍ റെയില്‍വേ സേഫ്റ്റി കമ്മീഷണര്‍ ഇന്നു വിലയിരുത്തുന്നതാണ്.


ഇതിനു മുന്നോടിയായി ലിഫ്റ്റ് സ്പാന്‍ ഉയരുന്നതിന്റെ വീഡിയോ ദക്ഷിണ റെയില്‍വേ പുറത്തുവിട്ടു. ബോട്ട്, കപ്പലുകള്‍ തുടങ്ങിയവയുടെ യാത്ര സുഗമമാക്കുക ലക്ഷ്യമിട്ടാണ് പാമ്പന്‍ പാലത്തില്‍ വെര്‍ട്ടിക്കല്‍ ലിഫ്റ്റ് സംവിധാനം കൊണ്ടു വരുന്നത്.

രാമേശ്വരത്തെ പാമ്പന്‍ ദ്വീപില്‍ നിന്നും മണ്ഡപം വരെ 2.07 കിലോമീറ്റര്‍ ദൂരമുള്ളതാണ് പുതിയ പാലം. 99 സ്പാനുകളാണ് ഇതിലുള്ളത്. 18.3 മീറ്റര്‍ ദൈര്‍ഘ്യത്തില്‍ ഗര്‍ഡറുകളും 63 മീറ്റര്‍ നാവിഗേഷന്‍ സ്പാനുകളും ഉള്‍പ്പെടുന്നു. പഴയ പാലത്തിന് സമാന്തരമായിട്ടാണ് പുതിയ പാലം നിര്‍മ്മിക്കുന്നത്.

റെയില്‍ വികാസ് നിഗം ലിമിറ്റഡിനാണ് നിര്‍മ്മാണ ചുമതല. ഏതാണ്ട് 535 കോടി രൂപ ചെലവു വരുമെന്നാണ് പ്രാഥമിക വിലയിരുത്തല്‍.