ശമ്പള വര്‍ധനയ്ക്കും കുടിശ്ശികയ്ക്കും ആനുകൂല്യങ്ങള്‍ക്കും അവകാശമുന്നയിച്ച് ജീവനക്കാര്‍ കോടതികളെ സമീപിച്ചാല്‍ സര്‍ക്കാരിന് ബാധ്യതയില്ലെന്ന് സത്യവാങ്മൂലം നല്‍കണമെന്നും ഈ സ്ഥാപനങ്ങളുടെയും ബന്ധപ്പെട്ട വകുപ്പുകളുടെയും മേധാവികള്‍ക്ക് നിര്‍ദേശം നല്‍കി. ഈ സ്ഥാപനങ്ങളിലെ ജീവനക്കാര്‍ സര്‍ക്കാരിനെയും വകുപ്പുസെക്രട്ടറിമാരെയും എതിര്‍കക്ഷികളാക്കി കോടതികളെ സമീപിക്കുന്നതും അനുകൂലവിധി നേടിയെടുക്കുന്നതും നിരുത്സാഹപ്പെടുത്താനാണ് ഈ നിര്‍ദേശം.കോടതി അനുകൂലമായി വിധിച്ച് സര്‍ക്കാര്‍ പണം നല്‍കേണ്ടിവന്നാല്‍ അത് സ്ഥാപന മേധാവിയില്‍നിന്ന് ഈടാക്കും.

ശമ്പളേതര ആവശ്യങ്ങള്‍ക്ക് നല്‍കുന്ന പണം ശമ്പളം നല്‍കാന്‍ ചെലവിടരുതെന്ന കര്‍ശനവ്യവസ്ഥയും ഉള്‍പ്പെടുത്തും.സ്‌പോര്‍ട്സ് കൗണ്‍സിലിലും ഹൗസിങ് ബോര്‍ഡിലും സര്‍ക്കാരിന്റെ അനുമതിയില്ലാതെ നടത്തിയ പെന്‍ഷന്‍ പരിഷ്‌കരണത്തിന്റെ കുടിശ്ശിക കോടതിവിധി പ്രകാരം സര്‍ക്കാര്‍ നല്‍കേണ്ടിവന്നത് ഉള്‍പ്പെടെയുള്ള സംഭവങ്ങളുടെ പശ്ചാത്തലത്തിലാണ് ഈ നീക്കം. 35 കോടിയാണ് ഇങ്ങനെ നല്‍കേണ്ടിവന്നത്.സാമ്പത്തിക പ്രതിസന്ധി കാരണം സര്‍ക്കാരിന്റെ സഹായധനം മുടങ്ങുന്നതിനാല്‍ പല സ്ഥാപനങ്ങളുടെയും നിലനില്‍പ്പുതന്നെ പ്രതിസന്ധിയിലാണ്. സ്ഥാപനങ്ങളില്‍ സ്വന്തം ഫണ്ടുണ്ടെങ്കിലേ ശമ്പളം ലഭിക്കൂ. കെ.എസ്.ആര്‍.ടി.സി.യിലെ ശമ്പളക്കുടിശ്ശിക കേസിലും സര്‍ക്കാര്‍ ഇതേ നിലപാടാണ് കോടതിയില്‍ സ്വീകരിച്ചത്.

വിവിധ വകുപ്പുകള്‍ക്കു കീഴില്‍ ചെറുതും വലുതുമായി ഇരുനൂറോളം ഗ്രാന്റ് ഇന്‍ എയ്ഡ് സ്ഥാപനങ്ങളുണ്ട്. ജീവനക്കാര്‍ എത്രയെന്ന് വ്യക്തമല്ല. ഖാദി ഗ്രാമവ്യവസായ ബോര്‍ഡ്, സാഹിത്യ അക്കാദമി, ലളിതകലാ അക്കാദമി, ചലച്ചിത്ര അക്കാദമി, കേരള കലാമണ്ഡലം, ഭാഷാ ഇന്‍സ്റ്റിറ്റ്യൂട്ട്, ലൈബ്രറി കൗണ്‍സില്‍, മനുഷ്യാവകാശ കമ്മിഷന്‍, സാക്ഷരതാ മിഷന്‍, സെന്റര്‍ ഫോര്‍ ഡിവലപ്മെന്റ് സ്റ്റഡീസ്, ഗിഫ്റ്റ്, ബാല സാഹിത്യ ഇന്‍സ്റ്റിറ്റ്യൂട്ട്, ദേവസ്വം റിക്രൂട്ട്മെന്റ് ബോര്‍ഡ് തുടങ്ങിയവയാണ് പ്രധാന സ്ഥാപനങ്ങള്‍.ഇതിൽ  പല സ്ഥാപനങ്ങളിലും പ്രവർത്തിക്കുന്നത് കൊടി കെട്ടിയ  കമ്യൂണിസ്റ്റുകാരാണ്. ധനവകുപ്പിനെതിരെ അല്ലെങ്കിലും മുറുമുറുപ്പ്കൂടുതലാണ്. മുഖ്യമന്ത്രിക്കും മന്ത്രിമാർക്കും ധനവകുപ്പിന്റെ പ്രവർത്തനങ്ങളോട് യോജിക്കാനാവുന്നില്ല.

ധനമന്ത്രിയുടെ  പ്രവർത്തനമാകട്ടെ ശരാശരിയിലും താഴെയാണെന്ന് സി പി എമ്മുകാർ തന്നെ പറയുന്നു. മന്ത്രിയുടെ പ്രവർത്തനങ്ങളാണ്  ഇത്തരത്തിൽ ഉദ്യോഗസ്ഥ തേർവാഴ്ചക്ക് അവസരം ഒരുക്കിയതെന്ന് സി.പി എം വിശ്വസിക്കുന്നു. എന്നാൽ ധനമന്ത്രിയോട്എഎന്തു പറഞ്ഞിട്ടും ഒരു കാര്യവുമില്ലപൊതുതിരഞ്ഞടുപ്പിലേക്ക് പോകുന്ന സർക്കാരിനെ  സംബന്ധിച്ചടത്തോളം ജീവനക്കാരെ പിണക്കുക എന്നാൽ ആത്മഹത്യാപരമാണ്.ഗ്രാന്റ് ഇൻ എയ്ഡ് സ്ഥാപനങ്ങളിൽ പ്രവർത്തിക്കുന്നതിൽ ഒരു നല്ല ശതമാനവും ഇടതുസഹയാത്രികരാണ്. അവരെ സംബന്ധിച്ചടത്തോളം ഇത്തരം തീരുമാനങ്ങൾ തിരിച്ചടിയാണ്. സർക്കാരിന്റെ നയപരമായ വിഷയങ്ങളിലും ധന വകുപ്പ് ഉദ്യോഗസ്ഥർ തീരുമാനം എടുക്കുന്നതിലാണ് സി.പി. എമ്മിന് അമർഷം. ധനമന്ത്രിയാകട്ടെ ഉദ്യോഗസ്ഥർ പറയുന്നത് മാത്രമാണ് അനുസരിക്കുന്നത്. ബാലഗോപാൽ സ്വതന്ത്രമായി തീരുമാനമെടുക്കുന്നില്ലെന്നും പാർട്ടിക്ക് വിമർശനമുണ്ട്. 

കേന്ദ്ര ധനമന്ത്രാലയവുമായി അനുനയനീക്കങ്ങൾ നടത്തി സംസ്ഥാനത്തിന്‍റെ ആവശ്യങ്ങളിൽ നീക്കുപോക്കുണ്ടാക്കാനുള്ള ധനവകുപ്പ് പരിശ്രമങ്ങൾ നിര്‍ണ്ണായക ഘട്ടത്തിൽ നിൽക്കെയാണ് തിരക്കിട്ട് കേരളം സുപ്രീംകോടതിയിൽ ഹര്‍ജി നൽകിയത്. കാര്യം ചോദിച്ചവര്‍ക്ക് മുന്നിൽ ധനവകുപ്പ് കൈമലര്‍ത്തി. കേസ് നടത്തിപ്പെന്ന ആശയം മുന്നോട്ട് വച്ചതും മുഖ്യമന്ത്രിയുടെ ഓഫീസിലിരുന്ന് അത് നടപ്പാക്കിയതും ചീഫ് പ്രിൻസിപ്പൽ സെക്രട്ടറി കെഎം എബ്രഹാമാണ്. സംസ്ഥാനങ്ങളുടെ കടമെടുപ്പ് പരിധി നിശ്ചയിക്കുന്ന ഭരണഘടന 293 ാം അനുച്ഛേദം ചോദ്യം ചെയ്ത മുൻ അനുഭവമില്ലെന്നിരിക്കെ കേസ് ഇത് വരെ കോടതി വരാന്തയിൽ നിന്ന് ഇറങ്ങിയിട്ടുമില്ല.അതൊടൊപ്പം കേരളത്തിന് കിട്ടാനുള്ളത് കിട്ടിയുമില്ല എന്ന അവസ്ഥയും ഉണ്ടായി. ധനവകുപ്പിനെ ഇരുട്ടിൽ നിര്‍ത്തുന്ന നടപടിയിൽ മന്ത്രി അതൃപ്തി അറിയിച്ചതിന് പിന്നാലെയാണ് കെഎം എബ്രഹാം ക്യാബിനറ്റ് പദവിയോടെ കരുത്തനായത്.

വിശ്വസ്തനായ കെഎം എബ്രഹാം മുഖ്യമന്ത്രി അറിയാതെ ഒന്നും നടത്തില്ലെന്നിരിക്കെയാണ് ധനവകുപ്പിന്‍റെ അതൃപ്തിക്ക് വ്യാപ്തിയേറുകയാണ്. തെരഞ്ഞെടുപ്പ് തോൽവിയോടെ എല്ലാറ്റിനും കാരണം ധനവകുപ്പിന്‍റെ പിടിപ്പ് കേടെന്ന ആക്ഷേപം പാർട്ടിയിലും സര്‍ക്കാരിലും ശക്തമാണ്. ഇതിന് പിന്നാലെയാണ് വികസനത്തിനല്ല ക്ഷേമത്തിനാണ് മുൻഗണന എന്ന് വിലയിരുത്തി കിഫ്ബിയുടെ പ്രവര്‍ത്തനത്തിന് കടിഞ്ഞാണിടാൻ ധനവകുപ്പ് തീരുമാനിച്ചത് . വയനാട് ദുരന്തത്തിൽ കേന്ദ്രം സഹായം നൽകാതായതോടെ ഉടക്ക് പതിൻമടങ്ങ് വർധിച്ചു. കേന്ദ്ര സർക്കാരിനെതിരെ സുപ്രീം കോടതിയെ സമീപിച്ച പിണറായി സർക്കാരിലെ ധന സെക്രട്ടറിയെ കേന്ദ്രം തിരികെ വിളിച്ചതോടെയാണ് ജയതിലക് ധനവകുപ്പിലെത്തിയത്.

ധനസെക്രട്ടറി രബീന്ദ്ര കുമാർ അഗർവാളിനെയാണ് കേന്ദ്രം വിളിച്ചത്.  അതോടെ കേരളത്തിന്റെ സുപ്രീം കോടതി കേസ് പെരുവഴിയിലായി. കൂടുതൽ ഫണ്ട് ആവശ്യപ്പെട്ട് കേരളം നൽകിയ സുപ്രീം കോടതിയിലെ ഹർജി ഇതോടെ ആവിയായി. ധനവകുപ്പ് സെക്രട്ടറി രബീന്ദ്രകുമാർ അഗർവാളാണ് കേന്ദ്ര ഡപ്യൂട്ടേഷനിൽ പോയത്. രണ്ടാം പിണറായി സർക്കാർ അധികാരത്തിലെത്തിയ ശേഷം 3 ധന സെക്രട്ടറിമാരാണ് മാറിയത് . പണ്ട് ഐ.എ എസുകാരുടെ ഗ്ലാമർ വകുപ്പായിരുന്നു ധനം. എന്നാൽ പിണറായി സർക്കാരിൽ ധനവകുപ്പ് ഏറ്റെടുക്കാൻ ആരും തയ്യാറല്ല. രണ്ടാം പിണറായി സർക്കാരിൽ രാജേഷ് കുമാർ സിംഗ് ആയിരുന്നു ആദ്യ ധന സെക്രടറി. പിന്നീട് ബിശ്വനാഥ് സിൻഹ ചുമതലയേറ്റെങ്കിലും അദ്ദേഹം ആഭ്യന്തര വകുപ്പിലേക്ക് മാറി. പിന്നാലെ രബീന്ദ്ര കുമാർ അഗർവാൾ വന്നു. കഴിഞ സാമ്പത്തിക വർഷം അവസാനിക്കാനിരിക്കെ കേരള സർക്കാർ കേന്ദ്രത്തിനെതിരെ സുപ്രീം കോടതിയെ സമീപിച്ചത് അഗർവാളിനെ മറികടന്നാണ്..

ഇതിനോട് മന്ത്രി ബാലഗോപാലിനും എതിർപ്പായിരുന്നു. എന്നാൽ മുഖ്യമന്ത്രിയുടെ ഓഫീസ് കേസു കൊടുക്കണമെന്ന് പിടിവാശി കാണിച്ചു. ധനവകുപ്പിൽഎടുക്കേണ്ട  പല തീരുമാനങ്ങളും മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി എടുക്കുന്നു എന്ന പരാതി ധനവകുപ്പിനുണ്ട്. രവീന്ദ്ര കുമാർ അഗർവാൾ കേരളം വിടാനുള്ള പ്രധാന കാരണങ്ങളിലൊന്നാണ് ഇത്. അഗർവാൾ ഡൽഹിയിൽ എത്തിയതോടെ  കേരളത്തിന്റെ കളികളുടെ പൂർണ വിവരങ്ങൾ കേന്ദ്രത്തിന് കിട്ടി. കേസ് ഇപ്പോഴും തീർന്നിട്ടില്ല.പുതിയ സംഭവവികാസങ്ങളുടെ പശ്ചാത്തലന്തിൽ കേരളത്തിനു വേണ്ടി കേസ്  ഡ്രാഫ്റ്റ് ചെയ്ത അഗർവാൾ തന്നെ കേരളത്തെ തോൽപ്പിക്കും. കേസു കൊടുത്തതു കൊണ്ടാണ് കേരളത്തിന് കിട്ടേണ്ടിയിരുന്ന പണം വൈകിയത്. ഇനി കേരളത്തിന് കേന്ദ്രത്തിന് മുന്നിൽ കൈനീട്ടേണ്ടി വരും. കേരളത്തിന് അർഹതപ്പെട്ട പണം ലഭിക്കാൻ പോലും കേസ് വേണ്ടി വന്നു. കൂടുതൽ പണം കിട്ടുമെന്ന പ്രതീക്ഷയും മുടങ്ങി.

ഫണ്ടിനായി കേന്ദ്രത്തിലെ വിവിധ വകുപ്പുകൾക്ക് മുന്നിൽ തല കുനിച്ചു നിൽക്കേണ്ടത് ധന സെക്രട്ടറിയാണ്. കേന്ദ്രവുമായി ഉടക്കിയതോടെ ഇത്തരത്തിൽ തലകുനിച്ചാലും ഫണ്ട് കിട്ടില്ലെന്നായി.  സാമ്പത്തിക പ്രതിസന്ധിയിൽ നിന്നും കേരളത്തിന് ഒരിക്കലും കരകയറാൻ കഴിയില്ലെന്ന സാഹചര്യവും നിലവിൽ വന്നു. ഇതും ധന സെക്രട്ടറിമാരെ പിന്നോട്ടടിക്കുന്നു. സമർത്ഥരായ ഉദ്യോഗസ്ഥർകാർക്കും ധനവകുപ്പിനോട് ഒരു താൽപര്യവുമില്ല.മന്ത്രി ബാലഗോപാലിന് വകുപ്പിൽ ഒരു സ്വാധീനവുമില്ലാത്തതാണ് യഥാർത്ഥ പ്രശ്നം. മുഖ്യമന്ത്രിയുടെ നേത്യത്വത്തിലാണ് ധനവകുപ്പിലെ ഭരണം നടക്കുന്നത്.സൂപ്പർ മുഖ്യമന്ത്രിയായി വിരാജിക്കുന്ന മുഖ്യമന്ത്രിയുടെ ഓഫീസിലെ മുൻ ധന  സെക്രട്ടറിക്ക് മുന്നിൽ തലകുമ്പിട്ട് നിൽക്കാൻ ധനവകുപ്പിലെ ഉദ്യോഗസ്ഥർ തയ്യാറല്ല.

ധനവകുപ്പിൽനിന്നും വാർത്തകൾ ചോർന്ന് മാധ്യമങ്ങൾക്ക് ലഭിക്കുന്നത് ഇത്തരം റൂട്ടിലൂടെയാണ്..അടുത്തിടെ കേന്ദ്ര ധനമന്ത്രിയുമായി നടത്തിയ ചർച്ചയിൽ കെ.എം. എബ്രഹാം പങ്കെടുത്തിരുന്നു. സൂപ്പർ ധനമന്ത്രി എന്നാണ് അദ്ദേഹം പൊതുവേ അറിയപ്പെടുന്നത്.ധനമന്ത്രി  കെ . എൻ. ബാലഗോപാലിനെക്കാൾ സ്വാധീനം മുഖ്യമന്ത്രിയിൽ കെ.എം. എബ്രഹാമിനുണ്ട്. അദ്ദേഹമാണ് മുഖ്യമന്ത്രിയുടെ ഫിനാൻഷ്യൻ അഡ്വൈസർ. എബ്രഹാമിന് ജയതിലകിനോട് താൽപര്യമില്ലെന്നാണ് മനസിലാക്കുന്നത്. അതു കൊണ്ടു കൂടിയാണ് ഗ്രാന്റ് ഇൻ എയ്ഡ്  സർക്കുലർ പതിവില്ലാത്ത വിധം വിവാദത്തിലായത്.ജയതിലക് പോയാൽ ധന വകുപ്പിൽ ആരു വരുമെന്ന്  ഒരു നിശ്ചയവുമില്ല.