വാക്കുതര്‍ക്കത്തിനിടെ ഭാര്യയെ കൊലപ്പെടുത്താന്‍ ശ്രമിച്ച ഭര്‍ത്താവിനെ പൊലീസ് പിടികൂടി
വാക്കുതര്‍ക്കത്തിനിടെ യുവതിയെ കുത്തികൊല്ലാന്‍ ശ്രമിച്ച കേസില്‍ ഭര്‍ത്താവിനെ പൊലീസ് പിടികൂടി. തൊടുപുഴ മുതലക്കോടം ഇടവെട്ടി കൊതകുത്തി പാണവേലില്‍ വീട്ടില്‍ മനോജ് കുഞ്ഞപ്പനെ(47)യാണ് മൂവാറ്റുപുഴ പൊലീസ് പിടികൂടിയത്. കടാതി അമ്പലംപടിയില്‍ തിങ്കള്‍ വൈകിട്ട് അഞ്ചോടെയാണ് സംഭവം. വാക്കുതര്‍ക്കത്തിനിടെ ഭാര്യ സ്മിത(42) യെ കത്തികൊണ്ട് നെഞ്ചിലും കാലിലും കുത്തുകയായിരുന്നുവെന്ന് പൊലീസ് പറഞ്ഞു.
ഗുരുതര പരിക്കേറ്റ സ്മിതയെ പരിസരവാസികള്‍ മൂവാറ്റുപുഴ ജനറല്‍ ആശുപത്രിയിലും തുടര്‍ന്ന് കോട്ടയം മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. സ്വന്തം സ്‌കൂട്ടറില്‍ ഒളിവില്‍ പോയ മനോജിനെ പൊലീസ് ചൊവ്വ രാവിലെ പിടികൂടി. ഭാര്യയെ അസഭ്യം പറഞ്ഞതിനും മര്‍ദിച്ചതിനും 2021 ല്‍ മൂവാറ്റുപുഴ പൊലീസ് സ്റ്റേഷനില്‍ ഇയാള്‍ക്കെതിരെ കേസുണ്ട്.
ഡിവൈഎസ്പി വി ടി ഷാജന്റെ നേതൃത്വത്തിലുള്ള സംഘത്തില്‍ ഇന്‍സ്‌പെക്ടര്‍ എസ് ജയകൃഷ്ണന്‍, എസ്‌ഐമാരായ വിഷ്ണു രാജു, എം വി ദിലീപ്കുമാര്‍, പി സി ജയകുമാര്‍, ബിനോ ഭാര്‍ഗവന്‍, സീനിയര്‍ സിവില്‍ ഓഫീസര്‍മാരായ ബിബില്‍ മോഹന്‍, രഞ്ജിത് രാജന്‍ എന്നിവരുണ്ടായിരുന്നു. കുത്താന്‍ ഉപയോഗിച്ച കത്തി പൊലീസ് കണ്ടെടുത്തു. കൂലിപ്പണിക്കാരനായ മനോജ് ഭാര്യയും കുട്ടികളുമായി അമ്പലംപടിയില്‍ സ്മിതയുടെ വീട്ടിലാണ് താമസിച്ചിരുന്നത്.
https://www.facebook.com/Malayalivartha
