ചേര്‍ത്തലയില്‍ കെഎസ്ആര്‍ടിസി സൂപ്പര്‍ ഫാസ്റ്റ് ബസും ബൈക്കും കൂട്ടിയിടിച്ച് ബൈക്ക് യാത്രക്കാരായ സൃഹൃത്തുക്കള്‍ക്ക് ദാരുണാന്ത്യം. ചേര്‍ത്തല നെടുമ്പ്രക്കാട് പുതുവല്‍ നികര്‍ത്തില്‍ പരേതനായ രമേശന്റെയും ലളിതയുടെയും മകന്‍ നവീന്‍ (അമ്പാടി 24), സാന്ദ്ര നിവാസില്‍ വിജയപ്പന്റെയും ശോഭയുടെയും മകന്‍ ശ്രീഹരി (ആരോമല്‍ 24) എന്നിവരാണ് മരിച്ചത്.

ഇന്നലെ പുലര്‍ച്ചെ ഒന്നരയോടെ ചേര്‍ത്തല എസ്എന്‍എം ജിബി എച്ച്എസ്എസിനു സമീപമാണ് അപകടം നടന്നത്. തിരുവനന്തപുരത്ത് നിന്നു മലപ്പുറത്തേക്ക് പോവുകയായിരുന്ന സൂപ്പര്‍ ഫാസ്റ്റ് ബസും ബൈക്കും നേര്‍ക്കുനേര്‍ ഇടിക്കുകയായിരുന്നുവെന്ന് പൊലീസ് . ബൈക്കില്‍ സഞ്ചരിച്ചിരുന്ന ഇരുവരും ഇടിയുടെ ആഘാതത്തില്‍ റോഡില്‍ തെറിച്ചുവീണു. ശ്രീഹരിയാണ് ബൈക്ക് ഓടിച്ചിരുന്നത്.

ഗുരുതരമായി പരുക്കേറ്റ ഇരുവരെയും ചേര്‍ത്തല പൊലീസും വാഹനയാത്രക്കാരും സമീപത്തെ താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. മൃതദേഹം ആലപ്പുഴ മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തി. ഇന്നലെ വൈകിട്ട് സംസ്‌കാരചടങ്ങുകള്‍ നടന്നു. രണ്ടു പേര്‍ക്കും ഓരോ സഹോദരിയുണ്ട്.