ജീപ്പ് ഓട്ടോയിലിടിച്ച് ഓട്ടോഡ്രൈവര്‍ മരിച്ച സംഭവം... ജീപ്പ് ഓടിച്ചിരുന്ന സുമില്‍ഷാദ് കസ്റ്റഡിയില്‍
ജീപ്പ് ഓട്ടോയിലിടിച്ച് ഓട്ടോഡ്രൈവര്‍ മരിച്ച സംഭവത്തില്‍ പൊലീസിനു തോന്നിയ ഈ സംശയങ്ങളുടെ ഉത്തരം ഞെട്ടിക്കുന്നതായിരുന്നു- അത് അപകടമായിരുന്നില്ല, ആസൂത്രിത കൊലപാതകമായിരുന്നു. ഓട്ടോ ഡ്രൈവര്‍ കാപ്പുംകുന്ന് അബ്ദുല്‍ നവാസ് മരിച്ച സംഭവത്തില്‍, ജീപ്പ് ഓടിച്ചിരുന്ന സുമില്‍ഷാദ് കസ്റ്റഡിയിലായി. ആ കൊലപാതകത്തിന്റെ കാരണങ്ങള്‍ വിചിത്രമായിരുന്നു.
അപകടം നടന്ന റോഡിനു നല്ല വീതിയുണ്ടായിരുന്നു. വളവുകളില്ലാത്തതിനാല്‍ എതിരെ വരുന്ന വാഹനങ്ങളെ വ്യക്തമായി കാണാം. സുമില്‍ഷാദ് ഓടിച്ച ജീപ്പ് അമിത വേഗത്തിലായിരുന്നുവെന്ന് ദൃക്‌സാക്ഷികള്‍ പറയുന്നു. എതിരെ ഓട്ടോ വന്നപ്പോള്‍ ജീപ്പ് പെട്ടെന്നു വെട്ടിച്ച് അതില്‍ ഇടിക്കുകയായിരുന്നു. അതിന്റെ ആഘാതത്തില്‍ ഓട്ടോ സമീപത്തെ മണ്‍തിട്ടയിലേക്ക് ഇടിച്ചു കയറി. അന്വേഷണം തുടങ്ങിയ പൊലീസിനു സംശയങ്ങളുണ്ടായി.
അപകടം നടക്കുന്നതിനു മുന്‍പ് സമീപത്തെ പള്ളിക്കു സമീപം ജീപ്പ് നിര്‍ത്തിയിട്ട് സുമില്‍ഷാദ് കാത്തു നിന്നതും മൊബൈല്‍ ഫോണ്‍ റിങ് ചെയ്തപ്പോള്‍ പെട്ടെന്ന് വാഹനമെടുത്ത് പോയതും നാട്ടുകാരില്‍ ചിലര്‍ കണ്ടിരുന്നു. അപകടത്തിനു ശേഷം സുമില്‍ഷാദ് വാഹനത്തില്‍ നിന്നിറങ്ങി ഫോണ്‍ ചെയ്തതും കണ്ടവരുണ്ട്. പരുക്കേറ്റ അബ്ദുല്‍ നവാസിനെ ആശുപത്രിയില്‍ എത്തിക്കാനും സുമില്‍ഷാദ് ശ്രമിച്ചില്ല. ഓടിക്കൂടിയ നാട്ടുകാര്‍ നവാസിനെ പിന്നാലെയെത്തിയ വാഹനത്തിലേക്ക് കയറ്റുമ്പോഴും സുമില്‍ഷാദ് ഇടപെട്ടില്ല.
ഇതോടെ, മരണത്തിനു കാരണമായ അപകടത്തില്‍ ദുരൂഹത ആരോപിച്ച് ബന്ധുക്കളും നാട്ടുകാരും രംഗത്തെത്തി. പൊലീസ് ആരോപണങ്ങള്‍ പരിശോധിച്ചു. ചുണ്ടേല്‍ ടൗണില്‍ ഹോട്ടല്‍ നടത്തുന്ന സുമില്‍ഷാദ് എന്തിനാണ് അപകട സ്ഥലത്തേക്ക് എത്തിയത്? ആരോപണങ്ങളില്‍ പൊലീസ് വിശദമായ അന്വേഷണം നടത്തി. ഫോണ്‍ രേഖകള്‍ അടക്കം പരിശോധിച്ച് തെളിവുകള്‍ കണ്ടെത്തി. ചോദ്യംചെയ്യലിനിടെ തെളിവുകള്‍ നിരത്തിയതോടെ സുമില്‍ഷാദ് കുറ്റം സമ്മതിച്ചു- അത് കൊലപാതകമായിരുന്നു. കാരണം വ്യക്തിവൈരാഗ്യവും മന്ത്രവാദവും!
സുമില്‍ഷാദിന്റെ ഹോട്ടലിനു മുന്‍വശന്‍ അബ്ദുല്‍ നവാസിന് പലചരക്കു കടയുണ്ടായിരുന്നു. സുമല്‍ഷാദിന്റെ ഹോട്ടലിന് മുന്നില്‍ മന്ത്രവാദം ചെയ്ത സംഭവമാണ് നവാസിനെ കൊലപ്പെടുത്താന്‍ കാരണം. ഹോട്ടലിന് മുന്‍വശത്തുനിന്ന്, വാഴയില്‍ വച്ചനിലയില്‍ കോഴിയുടെ തല, പട്ട്, ഭസ്മം, മഞ്ഞപ്പൊടി, വെറ്റില, പാക്ക് എന്നിവ ലഭിച്ചു. നവംബര്‍ 30 നായിരുന്നു സംഭവം.
ഹോട്ടലിലെ സിസിടിവി ദൃശ്യങ്ങള്‍ പരിശോധിച്ചപ്പോള്‍ നവാസാണ് കോഴിയുടെ തലയുള്‍പ്പെടെ കടയുടെ മുന്നില്‍കൊണ്ടുവച്ചതെന്ന് കണ്ടെത്തി. തുടര്‍ന്നാണ് സുമില്‍ഷാദ് അനുജന്‍ അജിന്റെ സഹായത്തോടെ നവാസിനെ കൊലപ്പെടുത്താന്‍ തീരുമാനിച്ചതെന്ന് പൊലീസ് പറഞ്ഞു. നവാസിനെ കൊലപ്പെടുത്താന്‍ സുമില്‍ഷാദ് തിരക്കഥ തയാറാക്കി. അപകടത്തില്‍ സുമില്‍ഷാദിനും പരുക്കേറ്റിരുന്നു. മേപ്പാടിയിലെ സ്വകാര്യ മെഡിക്കല്‍ കോളജ് ആശുപത്രിയില്‍ ചികില്‍സയിലിരിക്കെയാണ് ഇയാളെ പൊലീസ് അറസ്റ്റു ചെയ്തത്.
https://www.facebook.com/Malayalivartha
