പന്നിയുടെ ആക്രമണത്തെ തുടര്‍ന്ന് സ്‌കൂട്ടര്‍ മറിഞ്ഞ് ചികിത്സയിലായിരുന്ന യുവാവ് മരിച്ചു. റോഡിനു കുറുകെ പാഞ്ഞ പന്നി സ്‌കൂട്ടറില്‍ വന്ന് ഇടിക്കുകയായിരുന്നു. സ്‌കൂട്ടര്‍ മറിഞ്ഞു ഗുരുതരമായി പരുക്കേറ്റു ചികിത്സയിലായിരുന്ന യുവാവ്. വണ്ടൂര്‍ ചെട്ടിയാറമ്മല്‍ പൊത്തന്‍കോടന്‍ നൗഷാദലി (47) ആണു കോഴിക്കോട് സ്വകാര്യ ആശുപത്രിയില്‍ മരിച്ചത്. കഴിഞ്ഞ 20ന് രാത്രി എട്ടരയോടെ എളങ്കൂറിനു സമീപമായിരുന്നു അപകടം.

വെറ്ററന്‍സ് സെവന്‍സ് ഫുട്‌ബോള്‍ അസോസിയേഷന്‍ ജില്ലാ ജനറല്‍ സെക്രട്ടറിയായ നൗഷാദലി കിഴിശ്ശേരിയില്‍ നടക്കുന്ന ടൂര്‍ണമെന്റിന്റെ ഉദ്ഘാടന ചടങ്ങില്‍ പങ്കെടുത്തു മടങ്ങുമ്പോഴായിരുന്നു സംഭവം. കൂടെയുണ്ടായിരുന്ന ഇളയ മകന്‍ ഫൈസാനും പരുക്കേറ്റിരുന്നു. നൗഷാദലി മികച്ച അനൗണ്‍സറാണ്. തിങ്കളാഴ്ച പോസ്റ്റ്മോര്‍ട്ടത്തിനു ശേഷം പള്ളിക്കുന്ന ജുമാ മസ്ജിദില്‍ കബറടക്കും.