കൊച്ചിയില്‍ ട്രെയിനിടിച്ച് അതിഥിത്തൊഴിലാളിക്ക് ദാരുണാന്ത്യം. ദക്ഷിണേന്ത്യയിലെ ആഡംബര ടൂറിസം ട്രെയിനായ ഗോള്‍ഡന്‍ ചാരിയറ്റിന്റെ കൊച്ചിയിലെ ആദ്യ ദിവസം തന്നെ ദുരന്തമുണ്ടായിരിക്കുകയാണ്. ഇന്നു രാവിലെ ഗോള്‍ഡന്‍ ചാരിയറ്റ് ഇടിച്ച് കമലേഷ് എന്ന അതിഥിത്തൊഴിലാളി മരിച്ചു. വെല്ലിങ്ടന്‍ ഐലന്‍ഡിലെ ഉപയോഗിക്കാതെ കിടക്കുന്ന റെയില്‍വേ സ്റ്റേഷനിലേക്ക് എത്തുന്നതിനു മുന്‍പ് വാത്തുരുത്തിക്കടുത്തു വച്ചായിരുന്നു ദുരന്തം. ഈ ട്രാക്കിലൂടെ മുന്‍പ് ഒരു ചരക്കു ട്രെയിന്‍ കടന്നുപോയത് 2 വര്‍ഷം മുന്‍പായിരുന്നു. 2022ലും ഗോള്‍ഡന്‍ ചാരിയറ്റ് ഇവിടെയെത്തിയിരുന്നു.

ചരക്കുട്രെയിനുകള്‍ വന്നാല്‍ പോലും പലപ്പോഴും മട്ടാഞ്ചാരി ഹാള്‍ട്ട് വരെ മാത്രമേ എത്താറുള്ളൂ. ഹാര്‍ബര്‍ ടെര്‍മിനസിലേക്ക് യാത്രാ വണ്ടികളും എത്താറില്ല. അതുകൊണ്ടു തന്നെ മട്ടാഞ്ചേരി ഹാള്‍ട്ടിനും ഹാര്‍ബര്‍ ടെര്‍മിസലിനും ഇടയ്ക്ക് ട്രെയിനുകള്‍ വരുമെന്ന് ആരും തന്നെ പ്രതീക്ഷിച്ചിരുന്നില്ല. അതാണ് അതിഥിത്തൊഴിലാളിയുടെ അന്ത്യത്തിലേക്ക് നയിച്ചതും.

വെല്ലിങ്ടന്‍ ഐലന്‍ഡിലേക്ക് റെയില്‍പ്പാതയും കൊച്ചി ഹാര്‍ബര്‍ ടെര്‍മിനസ് എന്ന സ്റ്റേഷനുമുണ്ടെങ്കിലും ഇത് ഇപ്പോള്‍ ഉപയോഗിക്കാതെ കിടക്കുകയാണ്. ഇവിടെ എത്തുന്ന ടൂറിസ്റ്റുകളുടെ ആകര്‍ഷകകേന്ദ്രം കൂടിയാണ് ഈ സ്റ്റേഷന്‍. അതിനിടെയാണ് 31 ടൂറിസ്റ്റുകളെയും വഹിച്ച് കര്‍ണാടകയില്‍ നിന്നുള്ള ഗോള്‍ഡന്‍ ചാരിയറ്റ് ഇവിടേക്ക് എത്തിയത്. എന്നാല്‍ ട്രെയിന്‍ വരുന്ന വിവരത്തിനു മുന്നറിയിപ്പുകളൊന്നും നല്‍കിയിരുന്നില്ല എന്നാണ് പ്രദേശവാസികള്‍ പറയുന്നത്.

അതിഥി തൊഴിലാളികളടക്കമുള്ളവര്‍ റെയില്‍ പാളത്തിലിരുന്ന് ഫോണ്‍ ചെയ്യുന്നതും മറ്റും പതിവാണ്. ഇത്തരത്തില്‍ റെയില്‍പാളത്തില്‍ ഇരിക്കുമ്പോള്‍ മുന്നറിയിപ്പില്ലാതെ വന്ന ട്രെയിന്‍ ഇടിക്കുകയായിരുന്നു എന്നാണ് കരുതുന്നത്. ട്രെയിന്‍ ഇതിനു പിന്നാലെ ഐലന്‍ഡിലെ സ്റ്റേഷനിലേക്ക് പോയി. പിന്നീട് ഇതുവഴി വന്ന ഒരാളാണ് ട്രെയിന്‍ ഇടിച്ച് ഒരാള്‍ കിടക്കുന്നത് കാണുന്നതും പൊലീസിനെ അറിയിക്കുന്നതും. ഇയാളുടെ പോക്കറ്റില്‍ നിന്ന് ലഭിച്ച ആധാര്‍ കാര്‍ഡില്‍ നിന്നാണ് വിവരങ്ങള്‍ ലഭിച്ചത്.