തിരുവനന്തപുരത്ത് വിഎസ്എസ്സിയിലെ ശാസ്ത്രജ്ഞനും കുടുംബത്തിനു നേരെ ഗുണ്ടാ ആക്രമണം. ബിഹാര്‍ പാറ്റ്ന സ്വദേശി വികാസ് കുമാര്‍ യാദവും ഭാര്യയുമാണ് ആക്രമം നേരിട്ടത്. പുത്തന്‍തോപ്പ് ആശുപത്രിക്ക് സമീപം ഇന്നലെ രാത്രി 11 മണിക്കായിരുന്നു സംഭവം. കഴിഞ്ഞ ദിവസം കഠിനംകുളത്ത് നാട്ടുകാരെ വളര്‍ത്തുനായയെ കൊണ്ട് കടിപ്പിച്ച സംഭവത്തില്‍ അറസ്റ്റിലായ ഗുണ്ട കമ്രാന്‍ സമീറിന്റെ നേതൃത്വത്തിലുള്ള മൂന്നംഗ സംഘമാണ് ആക്രമണം നടത്തിയത്. ഈ കേസില്‍ ഇയാള്‍ ജാമ്യം നേടിയിരുന്നു.

വികാസ് കുമാര്‍ യാദവും ഭാര്യയും സഞ്ചരിച്ചിരുന്ന കാറിനു നേരെ ഗുണ്ടാ സംഘം കല്ലെറിയുകയും വാഹനം നിര്‍ത്തിച്ച ശേഷം ഇരുവരെയും മര്‍ദ്ദിക്കുകയും കത്തി കൊണ്ട് കഴുത്തിലടക്കം പരുക്കേല്‍പ്പിക്കുകയും ചെയ്തു. സംഭവത്തില്‍ കമ്രാന്‍ സമീറിനെ കഠിനംകുളം പൊലീസ് കസ്റ്റഡിയില്‍ എടുത്തു.