യുവാവിനെ അടിച്ചു കൊലപ്പെടുത്തിയ ശേഷം മൃതദേഹം പുഴയില്‍ ഉപേക്ഷിച്ചു... ആറു പേര്‍ പിടിയില്‍. ചെറുതുരുത്തിയിലാണ് ദാരുണ കൊലപാതകം നടന്നത്. നിലമ്പൂര്‍ വഴിക്കടവ് സ്വദേശി സൈനുല്‍ ആബിദ് (39) ആണ് മരിച്ചത്. മദ്യപാനത്തിനിടെയുണ്ടായ തര്‍ക്കമാണ് കൊലയ്ക്ക് കാരണമായി തീര്‍ന്നത്.

യുവാവിനെ പുഴയില്‍ മരിച്ച നിലയിലാണ് കണ്ടെത്തിയത്. പോസ്റ്റുമോര്‍ട്ടം റിപ്പോര്‍ട്ടിലാണ് കൊലപാതകമാണെന്ന് തെളിഞ്ഞത്. പൊലീസ് കേസെടുത്തു അന്വേഷണം തുടങ്ങി. പിന്നാലെയാണ് ആറ് പ്രതികളേയും അറസ്റ്റ് ചെയ്തത്. സൈനുല്‍ ആബിദിനെ പ്രതികള്‍ കമ്പി വടി കൊണ്ടു തലയ്ക്കടിച്ച് പുഴയില്‍ ഉപേക്ഷിക്കുകയായിരുന്നു.

പ്രതികള്‍ സംഘം ചേര്‍ന്നാണ് യുവാവിനെ ആക്രമിച്ചത്. മരിച്ച സൈനുല്‍ ആബിദ് ഒട്ടേറെ മോഷണ കേസുകളില്‍ പ്രതിയായിരുന്നു. ലഹരിക്കടത്തിലും ഇയാള്‍ നേരത്തെ പിടിയിലായിട്ടുണ്ടായിരുന്നു.