പാറമേക്കാവില്‍ ആചാര വെടിക്കെട്ടിന് എഡിഎം അനുമതി നല്‍കി. 100 കിലോഗ്രാം വെടിമരുന്ന് വരെ ഉപയോഗിക്കാമെന്നും പെസോ നിര്‍ദേശിച്ച മാനദണ്ഡങ്ങള്‍ പാലിക്കണമെന്നുമുള്ള നിര്‍ദേശത്തോടെയാണ് എഡിഎം വെടിക്കെട്ടിന് അനുമതി നല്‍കിയത്. ജനുവരി 5 നു നടക്കുന്ന തിരുവമ്പാടി വേലയുടെ വെടിക്കെട്ടിനുള്ള അനുമതി നാളെ നല്‍കിയേക്കും. തേക്കിന്‍കാട് മൈതാനത്താണ് ഇരുവിഭാഗത്തിന്റെയും വേല വെടിക്കെട്ടുകള്‍ നടക്കുക.

ഞായറാഴ്ച നടക്കുന്ന തിരുവമ്പാടി വേലയുടെ വെടിക്കെട്ടിനുള്ള രേഖകള്‍ ദേവസ്വം ഇന്നലെ എഡിഎമ്മിന് സമര്‍പ്പിച്ചിട്ടുണ്ട്. 5 ന് രാത്രി നായ്ക്കനാലിലെ പഞ്ചവാദ്യത്തിനു ശേഷമാണ് തിരുവമ്പാടിയുടെ വെടിക്കെട്ട്. ഇപ്പോഴത്തെ അനുമതി വേല വെടിക്കെട്ടിനു മാത്രമുള്ളതാണ്. പൂരം വെടിക്കെട്ട് സംബന്ധിച്ച ആശങ്കകള്‍ ഇപ്പോഴും നിലനില്‍ക്കുന്നുണ്ട്. പൂരം വെടിക്കെട്ടിന് കേന്ദ്ര നിയമത്തിലെ ഭേദഗതികള്‍ എങ്ങനെ മറികടക്കുമെന്നതിനെ കുറിച്ചുള്ള ആലോചനയിലാണ് പാറമേക്കാവ്, തിരുവമ്പാടി ദേവസ്വങ്ങള്‍.

വെടിക്കെട്ടിന് അപേക്ഷ ലഭിച്ചാലുടന്‍ വിഷയത്തില്‍ തീരുമാനമെടുക്കണമെന്നു കഴിഞ്ഞ ദിവസം ഹൈക്കോടതി എഡിഎമ്മിനു നിര്‍ദേശം നല്‍കിയിരുന്നു. തുടര്‍ന്നാണ് മാനദണ്ഡങ്ങള്‍ക്കു വിധേയമായി വെടിക്കെട്ടിന് അനുമതി നല്‍കിയത്. ഭക്തരുടെ വിശ്വാസത്തെ മാനിച്ചും ആചാരസംരക്ഷണത്തിനു വേണ്ടിയുമാണ് അനുമതി എന്ന് എഡിഎമ്മിന്റെ അനുമതി പത്രത്തില്‍ വ്യക്തമാക്കുന്നു.

രാത്രി 12.30നും 2നും ഇടയിലാണ് വെടിക്കെട്ട് നടത്തേണ്ടത്. 100 മീറ്ററില്‍ ബാരിക്കേഡ് കെട്ടി ആളുകളെ തടയണം. ഗുണ്ട്, അമിട്ട്, കുഴിമിന്നല്‍ എന്നിവ ഉപയോഗിക്കരുത്. പെസോ നിര്‍ദേശിച്ച ഓലപ്പടക്കങ്ങള്‍ മാത്രമേ ഉപയോഗിക്കാവൂ. വെടിക്കെട്ടിന്റെ വിഡിയോ പകര്‍ത്തി എഡിറ്റ് ചെയ്യാതെ 3 ദിവസത്തിനകം എഡിഎമ്മിന്റെ ഓഫിസില്‍ എത്തിക്കണമെന്നും ഉത്തരവില്‍ പറയുന്നു.