സംസ്ഥാന കായികമേളയില്‍ നിന്നും രണ്ട് സ്‌കൂളുകളെ വിലക്കിയ സംഭവം: കുട്ടികളുടെ അവസരം നിഷേധിക്കില്ലെന്ന് വിദ്യാഭ്യാസ മന്ത്രി
63-ാമത് സംസ്ഥാന കായികമേളയില്‍ നിന്നും രണ്ട് സ്‌കൂളുകളെ വിലക്കിയ നടപടി പുനഃപരിശോധിക്കാന്‍ സര്‍ക്കാര്‍. മാര്‍ ബേസിലിന്റെയും നാവാമുകുന്ദ സ്‌കൂളിന്റെയും അപേക്ഷ പരിഗണിക്കുമെന്നും കുട്ടികളുടെ അവസരം നിഷേധിക്കില്ലെന്നും വിദ്യാഭ്യാസ മന്ത്രി പങ്കുവെച്ചതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്യുന്നു. കുട്ടികളുടെ അവസരം നിഷേധിക്കുന്ന നടപടിയുണ്ടാകില്ല. കൂടിയാലോചനകള്‍ക്ക് ശേഷം മാത്രമേ സ്‌കൂളുകളുടെ വിലക്ക് നീക്കുന്ന തീരുമാനമുണ്ടാകൂവെന്നും മന്ത്രി വ്യക്തമാക്കി.
ദേശീയ സ്‌കൂള്‍ കായികമേളയില്‍ ആദ്യ സ്വര്‍ണം നേടിയ തിരുനാവായ നാവമുകുന്ദ സ്‌കൂളിലെ ആദിത്യ അജി നടത്തിയ അഭ്യര്‍ത്ഥന ശ്രദ്ധയില്‍പ്പെട്ടതിന് പിന്നാലെയാണ് മന്ത്രി നിലപാട് വ്യക്തമാക്കിയത്. കുട്ടിയുടെ അഭ്യര്‍ത്ഥന ശ്രദ്ധയിപ്പെട്ട വിവരവും മന്ത്രി അറിയിച്ചു.
സംസ്ഥാന സ്‌കൂള്‍ കായികമേളയിലെ പ്രതിഷേധത്തിന്റെ പേരിലാണ് സര്‍ക്കാര്‍ രണ്ട് സ്‌കൂളുകള്‍ക്ക് വിലക്കേര്‍പ്പെടുത്തിയത്. തിരുനാവായ നാവാമുകുന്ദ ഹയര്‍ സെക്കന്ററി സ്‌കൂളിനെയും, കോതമംഗംലം മാര്‍ ബേസില്‍ ഹയര്‍ സെക്കന്റി സ്‌കൂളിനെയുമാണ് അടുത്ത കായിക മേളയില്‍ നിന്ന് വിലക്കിയത്.
തിരുവനന്തപുരം ജിവി രാജ സ്‌പോര്‍ട്‌സ് സ്‌കൂളിന് രണ്ടാം സ്ഥാനം നല്‍കിയതിനെതിരെയായിരുന്നു എറണാകുളത്ത് നടന്ന കായിക മേളയില്‍ രണ്ട് സ്‌കൂളുകളും വിദ്യാര്‍ഥികളെ ഇറക്കി പ്രതിഷേധിച്ചത്. സംഭവത്തിന് പിന്നാലെ അന്വേഷണത്തിന് മൂന്നംഗ സമിതിയെ വിദ്യാഭ്യാസ വകുപ്പ് ചുമതലപ്പെടുത്തിയിരുന്നു. ഇവരുടെ റിപ്പോര്‍ട്ട് കൂടി പരിഗണിച്ചായിരുന്നു നടപടി. സ്‌കൂള്‍ കായികമേള സംഘര്‍ത്തില്‍ അധ്യാപകര്‍ക്കെതിരെ നടപടിക്കും സമിതി ശുപാര്‍ശ ചെയ്തിരുന്നു.
https://www.facebook.com/Malayalivartha
