അറുപത്തി മൂന്നാമത് സംസ്ഥാന സ്‌കൂള്‍ കലോത്സവത്തില്‍ സ്വര്‍ണ്ണക്കപ്പ് ആര്‍ക്ക്? 965 പോയിന്റുമായി തൃശൂര്‍ മുന്നില്‍, പിന്നാലെ കണ്ണൂരും പാലക്കാടും....
10 മത്സരങ്ങള്‍ മാത്രം ബാക്കി നില്‍ക്കെ 965 പോയിന്റുമായി തൃശൂരാണ് ഒന്നാമത്. 961 പോയിന്റുമായി നിലവിലെ ചാമ്പ്യന്‍മാരായ കണ്ണൂരും പാലക്കാടും രണ്ടാം സ്ഥാനത്താണ്. തൊട്ടു പിന്നില്‍ 959 പോയിന്റുമായി കോഴിക്കോട് മൂന്നാം സ്ഥാനത്തുണ്ട്.

സ്‌കൂളുകളില്‍ ആലത്തൂര്‍ ഗുരുകുലം ഹയര്‍ സെക്കന്ററി സ്‌കൂള്‍ വ്യക്തമായ ലീഡോടെ ഒന്നാം സ്ഥാനത്താണ്. തിരുവനന്തപുരം കാര്‍മെല്‍ ഹയര്‍ സെക്കന്ററി സ്‌കൂള്‍ രണ്ടാം സ്ഥാനത്തും മാനന്തവാടി എംജിഎംഎസ്എസ് മൂന്നാം സ്ഥാനത്തുമുണ്ട്. അവസാന ദിനമായ ഇന്ന് ഹയര്‍ സെക്കന്ററി വിഭാഗം ആണ്‍ കുട്ടികളുടെ നാടോടി നൃത്തം, ഹൈസ്‌കൂള്‍ വിഭാഗം വഞ്ചിപ്പാട്ട്, ട്രിപ്പിള്‍ ജാസ്, ഹൈസ്‌ക്കൂള്‍ വിഭാഗം കഥാ പ്രസംഗം തുടങ്ങിയ മത്സരങ്ങള്‍ ഉണ്ട്. വൈകുന്നേരം നാലിന് നടക്കുന്ന സമാപന സമ്മേളനം പ്രതിപക്ഷ നേതാവ് വി.ഡി സതീശന്‍ ഉദ്ഘാടനം ചെയ്യും. സിനിമ താരങ്ങളായ ടോവിനൊ തോമസും ആസിഫ് അലിയും മുഖ്യാഥിതികളാകും.

അതേസമയം സംസ്ഥാന സ്‌കൂള്‍ കലോത്സവത്തോടനുബ ന്ധിച്ച് തിരുവനന്തപുരം ജില്ലയിലെ എല്ലാ സ്‌കൂളുകള്‍ക്കും ഇന്ന് (ജനുവരി 8 ബുധനാഴ്ച) അവധി പ്രഖ്യാപിച്ചു. പൊതുവിദ്യാഭ്യസ വകുപ്പിന് കീഴില്‍ വരുന്ന വിദ്യാലയങ്ങള്‍ക്കാണ് അവധി പ്രഖ്യാപിച്ചത്. ജനുവരി നാലിന് ആരംഭിച്ച സ്‌കൂള്‍ കലോത്സവം ഇന്നാണ് അവസാനിക്കുന്നത്. സമാപന ദിവസം എല്ലാ വിദ്യാര്‍ഥികള്‍ക്കും ജില്ലയില്‍ നടക്കുന്ന കലോത്സവം കാണാനെത്താനുള്ള സൗകര്യം കണക്കിലെടുത്താണ് അവധി നല്‍കിയത്.