കണ്ണൂർ പാനൂരിൽ  നടുക്കുന്ന സംഭവമാണ് ഉണ്ടായിരിക്കുന്നത്.  നായയെ കണ്ട് കുതറിയോടിയ   ഒമ്പതുവയസുകാരൻ പൊട്ടക്കിണറ്റിൽ വീണ് മരിച്ചു. പാനൂർ തൂവക്കുന്ന് സ്വദേശി മുഹമ്മദ് ഫസലാണ് മരിച്ചത്.  വൈകീട്ട് അഞ്ചരയോടു കൂടിയാണ് സംഭവം. കൂട്ടുകാർക്കൊപ്പം കളിച്ചുകൊണ്ടിരിക്കുകയായിരുന്നു കുട്ടി .  കളിച്ചുകൊണ്ടിരിക്കെ തെരുവുനായയെ കണ്ട കുട്ടികളെല്ലാം പല വഴിക്ക് ഓടുകയായിരുന്നു .

 ഫസൽ ഓടിയ വഴിയിൽ ഒരു ഉപയോഗ ശൂന്യമായ കിണറുണ്ടായിരുന്നു. ഇതിലേക്കായിരുന്നു  കുട്ടി വീണത്. കുട്ടിയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാൻ സാധിച്ചില്ല . പ്രദേശത്ത് തെരുവുനായ ശല്യം രൂക്ഷമാണെന്ന് നാട്ടുകാർ പരാതി പറഞ്ഞു

ചേലക്കാട് മത്തത്ത് ഹൗസിൽ ഉസ്മാൻ, ഫൗസിയ ദമ്പതികളുടെ മകനാണ് മരിച്ച മുഹമ്മദ്‌ ഫസൽ. തൂവക്കുന്ന് ഗവ. എൽപി സ്കൂൾ നാലാം ക്ലാസ്സ്‌ വിദ്യാർഥിയാണ്. കൂട്ടുകാർ കരുതിയത് ഫസൽ വീട്ടിലേക്ക് പോയെന്നാണ്  . മണിക്കൂറുകൾക്കുശേഷമാണ് കൂട്ടൂകാരന്റെ    മരണവാർത്ത അറിഞ്ഞത്.