മലയാളത്തിന്റെ ഭാവഗായകന്‍ പി. ജയചന്ദ്രന്റെ മരണത്തില്‍ അനുശോചനം അറിയിച്ച് രമേശ് ചെന്നിത്തല
മലയാളത്തിന്റെ ഭാവഗായകന്‍ പി. ജയചന്ദ്രന്റെ മരണത്തില്‍ അനുശോചനം അറിയിച്ച് രമേശ് ചെന്നിത്തല. വിയോഗവാര്‍ത്ത അവിശ്വസനീയവും ഹൃദയഭേദകവുമാണ്. തന്റെ ഗാനങ്ങളിലൂടെ അമരത്വം നേടിയ മഹാഗായകന്റെ ആത്മാവിനു നിത്യശാന്തി നേരുന്നുവെന്നും അദ്ദേഹം പറഞ്ഞു.
കഴിഞ്ഞ ആറു പതിറ്റാണ്ടായി ലോകമെമ്പാടുമുള്ള മലയാളികളെ തരളിത ഗാനങ്ങളില്‍ ആറാടിച്ച അനശ്വര ഗായകനാണ് ജയചന്ദ്രന്‍. അദ്ദേഹവുമായി വളരെ ദീര്‍ഘകാലത്തെ വ്യക്തിബന്ധം തനിക്കുണ്ടായിരുന്നു. മികച്ച ഗായകനുള്ള ദേശീയ, സംസ്ഥാന അവാര്‍ഡുകള്‍ പല തവണ നേടിയിട്ടുള്ള ജയചന്ദ്രന്‍ മലയാളത്തില്‍ മാത്രമല്ല, തന്നിന്ത്യയില്‍ തന്നെ ഏറെ തിളങ്ങി. മലയാളം, തമിഴ്, കന്നഡ, തെലുഗു, ഹിന്ദി എന്നീ ഭാഷകളില്‍ അദ്ദേഹം ഗാനങ്ങള്‍ ആലപിച്ചിട്ടുണ്ട്.
ഔപചാരികമായി ശാസ്ത്രീയ സംഗീതം പഠിച്ചില്ലെങ്കിലും ജന്മസിദ്ധി കൊണ്ട് സംഗീതത്തിന്റെ ഗിരിശൃംഗങ്ങള്‍ കീഴടക്കിയ ഗായകനാണ് ജയചന്ദ്രന്‍. സംസ്ഥാന സ്‌കൂള്‍ കലോത്സവ വേദിയില്‍ കെ.ജെ യേശുദാസിന്റെ പാട്ടിനു പക്കമേളമിട്ടു തുടങ്ങിയ സംഗീത സപര്യയാണ് പെയ്‌തൊഴിയുന്നത്. മലയാളിയുവതയുടെ പ്രണയ തന്ത്രികളില്‍ എല്ലാ കാലത്തും വരിലോടിച്ച ഈ മഹാഗായകന്റെ അനശ്വരഗാനങ്ങള്‍ക്കു മുന്നില്‍ തന്റെ സ്‌നേഹപ്രണാമമെന്നും അദ്ദേഹം കൂട്ടിച്ചേര്‍ത്തു.
https://www.facebook.com/Malayalivartha
