പൊതുജനങ്ങളുടെ പ്രശ്‌നത്തില്‍ നേരിട്ടിടപെട്ട് ഹൈക്കോടതി. പൊതുജനങ്ങളുടെ സഞ്ചാര സ്വാതന്ത്ര്യം തടഞ്ഞ രാഷ്ട്രിയക്കാര്‍ക്ക് ശക്തമായ താക്കീതായി ഹൈക്കോടതിയുടെ അസാധാരണ നീക്കം. റോഡ് കൈയേറിയുള്ള നാലു പരിപാടികളുമായി ബന്ധപ്പെട്ട് വിവിധ രാഷ്ട്രീയ പാര്‍ട്ടി നേതാക്കളടക്കം 17 പേര്‍ ഫെബ്രുവരി 10ന് ഉച്ചയ്ക്ക് 2ന് നേരിട്ട് ഹാജരാകണം.

ഉന്നത പൊലീസ് ഉദ്യോഗസ്ഥരെയും കോടതി വിട്ടില്ല. ഇവരുള്‍പ്പെടെ 19 പേര്‍ക്ക് കോടതിയലക്ഷ്യ നോട്ടീസ് നല്‍കി. ഇതില്‍ 17 പേരാണ് കോടതിയില്‍ ഹാജരാകേണ്ടത്. ഗതാഗതവും കാല്‍നടയാത്രയും തടസപ്പെടുത്തിയുള്ള യോഗങ്ങളെ ലാഘവത്തോടെ കാണാനാകില്ലെന്ന് കോടതി വ്യക്തമാക്കി.സി.പി.എം സംസ്ഥാന സെക്രട്ടറി എം.വി.ഗോവിന്ദനും സി.പി.ഐ സംസ്ഥാന സെക്രട്ടറി ബിനോയ് വിശ്വവും ഉള്‍പ്പെടെയുള്ളവരാണ് നേരിട്ട് ഹാജരാകേണ്ടത്.

ജസ്റ്റിസ് അനില്‍ കെ.നരേന്ദ്രന്‍, ജസ്റ്റിസ് എസ്.മുരളീകൃഷ്ണ എന്നിവരുള്‍പ്പെട്ട ഡിവിഷന്‍ബെഞ്ചിന്റേതാണ് ഉത്തരവ്. ചീഫ് സെക്രട്ടറി ശാരദാ മുരളീധരന്‍, പൊലീസ് മേധാവി ഷേയ്ക്ക് ദര്‍വേഷ് സാഹിബ് എന്നിവര്‍ക്കും കോടതിയലക്ഷ്യ നോട്ടീസ് നല്‍കിയെങ്കിലും നേരിട്ട് ഹാജരാകുന്നതില്‍ നിന്ന് ഒഴിവാക്കി. പൊലീസ് ഉദ്യോഗസ്ഥരെ ഒഴിവാക്കണമെന്ന സര്‍ക്കാരിന്റെ ആവശ്യം തള്ളി.

വഞ്ചിയൂരിലെ സി.പി.എം സമ്മേളനം, സി.പി.ഐ അനുകൂല സര്‍വീസ് സംഘടനയായ ജോയിന്റ് കൗണ്‍സില്‍ സെക്രട്ടേറിയറ്റ് ധര്‍ണ, തിരുവനന്തപുരം ബാലരാമപുരത്തെ 'ജ്വാല വനിതാ ജംഗ്ഷന്‍' പരിപാടി, കോണ്‍ഗ്രസിന്റെ കൊച്ചി കോര്‍പ്പറേഷന്‍ ധര്‍ണ എന്നിവയുമായി ബന്ധപ്പെട്ട് മരട് സ്വദേശി എന്‍.പ്രകാശ് നല്‍കിയ കോടതിയലക്ഷ്യ ഹര്‍ജിയിലാണ് നടപടി. അഡിഷണല്‍ അഡ്വക്കേറ്റ് ജനറലിന്റെയടക്കം പ്രാഥമിക വാദംകേട്ട കോടതി, പ്രഥമദൃഷ്ട്യാ കോടതിയലക്ഷ്യം നിലനില്‍ക്കുമെന്ന് വ്യക്തമാക്കി. വീഡിയോ ദൃശ്യങ്ങളും പരിശോധിച്ചു. വഞ്ചിയൂരിലേത് പ്രതിഷേധ പരിപാടി പോലുമായിരുന്നില്ലെന്ന് കോടതി വിലയിരുത്തി. കോടതി സമുച്ചയത്തിനും പൊലീസ് സ്റ്റേഷനും സമീപത്തായിരുന്നു സമ്മേളനം.

നേരിട്ട് ഹാജരാകേണ്ടവര്‍ ഇവരാണ്

സി.പി.എം: എം.വി.ഗോവിന്ദന്‍, എം.വിജയകുമാര്‍, എം.എല്‍.എമാരായ കടകംപള്ളി സുരേന്ദ്രന്‍, വി.ജോയ്, വി.കെ.പ്രശാന്ത്

സി.പി.ഐ: ബിനോയ് വിശ്വം, പന്ന്യന്‍ രവീന്ദ്രന്‍, ജയചന്ദ്രന്‍ കല്ലിങ്കല്‍ (ജോയിന്റ് കൗണ്‍സില്‍)

കോണ്‍ഗ്രസ്: ഡി.സി.സി പ്രസിഡന്റ് മുഹമ്മദ് ഷിയാസ്, ടി.ജെ.വിനോദ് എം.എല്‍.എ, മുന്‍മന്ത്രി ഡൊമിനിക് പ്രസന്റേഷന്‍

പൊലീസ് ഉദ്യോഗസ്ഥര്‍: തിരു. കമ്മിഷണറായിരുന്ന ഐ.ജി ജി. സ്പര്‍ജന്‍കുമാര്‍, കൊച്ചി കമ്മിഷണര്‍ പുട്ട വിമാലാദിത്യ, തിരു. റൂറല്‍ എസ്.പി കിരണ്‍ നാരായണന്‍, സി.ഐമാരായ ഡി. ഗിരിലാല്‍, അനീഷ് ജോയ്, എസ്.എച്ച്.ഒ പ്രജീഷ് ശശി

വഴി തടഞ്ഞുള്ള പരിപാടികള്‍ ഇതൊക്കെയാണ്

1. ഡിസംബര്‍ 5
വഞ്ചിയൂരില്‍ സി.പി.എം പാളയം ഏരിയ സമ്മേളനം. റോഡില്‍ സ്റ്റേജുകെട്ടി ഗതാഗതതടസമുണ്ടാക്കി. എം.വി.ഗോവിന്ദനും എം.എല്‍.എമാരുമടക്കം വേദിയില്‍
2. ഡിസംബര്‍ 10,11
ജോയിന്റ് കൗണ്‍സിലിന്റെ സെക്രട്ടേറിയറ്റിന് മുന്നിലെ രാപകല്‍ ധര്‍ണ. ഫുട്പാത്തും റോഡിന്റെ പകുതിയും തടസപ്പെടുത്തി. ഉദ്ഘാടകന്‍ ബിനോയ് വിശ്വം
3. ഡിസംബര്‍ 11
കൊച്ചിയിലെ കോണ്‍ഗ്രസ് ധര്‍ണ. നടത്തിയത് ഫുട്പാത്ത് കൈയേറി
4. ജനുവരി മൂന്ന്
ബാലരാമപുരത്ത് പഞ്ചായത്തിന്റെ ആഭിമുഖ്യത്തില്‍ റോഡ് തടഞ്ഞ് 'ജ്വാല വനിതാ ജംഗ്ഷന്‍' പരിപാടി. ഉദ്ഘാടനം റൂറല്‍ എസ്.പി കിരണ്‍ നാരായണന്‍