പാലക്കാട്ട് ഓടിക്കൊണ്ടിരിക്കെ സ്വകാര്യ ബസിന് തീപിടിച്ചു. വന്‍ ദുരന്തം ഒഴിവായത് തലനാരിഴയ്ക്ക്. കോഴിക്കോട്ടുനിന്നു പോണ്ടിച്ചേരി വഴി ചെന്നൈയിലേക്കു പോവുകയായിരുന്ന സ്വകാര്യ ബസിനാണ് തീപിടിച്ചത്. എ വണ്‍ ട്രാവല്‍സിന്റെ ബസാണ് അപകടത്തില്‍പ്പെട്ടത്. 23 യാത്രക്കാരും 4 ജീവനക്കാരും ബസിലുണ്ടായിരുന്നു. പെട്ടെന്നു തീ അണച്ചതിനാല്‍ വന്‍ ദുരന്തം ഒഴിവായി. രാത്രി ഒന്‍പതോടെ തിരുവാഴിയോട് ശ്രീകൃഷ്ണപുരം പൊലീസ് സ്റ്റേഷനു സമീപമായിരുന്നു അപകടം.

ഡ്രൈവറുടെ ഭാഗത്തുനിന്നാണ് പുക ഉയര്‍ന്നത്. പുക കണ്ടതോടെ ജീവനക്കാര്‍ യാത്രക്കാരെ വേഗം പുറത്തിറക്കി. പലരും ഉറങ്ങുകയായിരുന്നു. ഭക്ഷണം കഴിക്കാനെന്നു കരുതിയാണു പലരും പുറത്തിറങ്ങിയത്. യാത്രക്കാര്‍ പുറത്തിറങ്ങിയതിനു പിന്നാലെ ബസ് കത്താന്‍ തുടങ്ങി. പൂര്‍ണമായും ബസ് കത്തി നശിച്ചു. കോങ്ങാട്ടുനിന്നും മണ്ണാര്‍ക്കാട്ടുനിന്നും അഗ്‌നിരക്ഷാസേന എത്തിയാണു തീയണച്ചത്. യാത്രക്കാരില്‍ ചിലരുടെ ബാഗും മറ്റു രേഖകളും കത്തിനശിച്ചെന്നു പൊലീസ് പറഞ്ഞു.