ഓടുന്ന കാറില്‍ ഡോറിലിരുന്ന് അഭ്യാസം കാണിച്ച ആളും കാര്‍ ഓടിച്ചിരുന്ന ഡ്രൈവറും ഇനി കുറച്ചു നാളത്തേക്ക് വാഹനം ഓടിക്കേണ്ടെന്ന് മോട്ടോര്‍ വെഹിക്കിള്‍ ഡിപ്പാര്‍ട്‌മെന്റ്. ഒരാള്‍ പത്തനംതിട്ട കുമ്പഴ സ്വദേശിയും മറ്റൊരാള്‍ തിരുവല്ല മഞ്ഞാടി സ്വദേശിയുമാണ്. ഓടുന്ന കാറില്‍ അഭ്യാസ പ്രകടനം നടത്തിയതിന് ആഡംബര കാര്‍ പിടിച്ചെടുത്തു.

1 കോടിയിലേറെ വില മതിയ്ക്കുന്ന വോള്‍വോ എക്‌സ് സി 90 ആണ് എം വി ഡി പിടിച്ചെടുത്തത്. വള്ളക്കടവ് കുമ്പനാട് റോട്ടില്‍ ഡോറിലൂടെ പുറത്തേക്കിരുന്ന് ഒരാള്‍ ഫോണിലൂടെ സംസാരിക്കുന്നത് ദൃശ്യങ്ങളില്‍ കാണാനാകും. രാവിലെ റോഡില്‍ നല്ല തിരക്കുള്ള സമയത്താണ് സംഭവം. യാത്രികരില്‍ ഒരാളാണ് വീഡിയോ ചിത്രീകരിച്ച് മോട്ടോര്‍ വാഹന വകുപ്പിന് അയച്ചത്.

വളരെ വേഗത്തില്‍ തിരുവല്ല വാഹന വകുപ്പിന്റെ എന്‍ഫോഴ്‌സ്‌മെന്റ് വിഭാഗം വാഹനം കസ്റ്റഡിയില്‍ എടുക്കുകയായിരുന്നു. സംഭവത്തില്‍ കേസെടുത്തിട്ടുണ്ട്. പിഴയും ഈടാക്കും. ഇത് കൂടാതെ രണ്ട് പേരെയും നല്ല നടപ്പിനായി എടപ്പാളിലുള്ള ഡ്രൈവിംഗ് പരിശീലന കേന്ദ്രത്തിലേക്ക് അയക്കുമെന്ന് എം വി ഡി അറിയിച്ചിട്ടുണ്ട്.

പത്തനംതിട്ട ആര്‍ ടി ഒയ്ക്ക് കീഴില്‍ രജിസ്റ്റര്‍ ചെയ്ത വാഹനമാണ് പിടിച്ചെടുത്തിട്ടുള്ളത്. ഡോറിലിരുന്ന് അഭ്യാസം കാണിച്ച ആളുടെയും ഡ്രൈവറുടെയും ലൈസന്‍സ് സസ്‌പെന്‍ഡ് ചെയ്യുമെന്ന് എം വി ഡി അറിയിച്ചത്.