സംസ്ഥാന സ്‌കൂള്‍ കായികമേളയ്ക്കിടയില്‍ പ്രതിഷേധിച്ച സ്‌കൂളുകളുടെ വിലക്ക് പിന്‍വലിച്ച് വിദ്യാഭ്യാസ വകുപ്പ്
സംസ്ഥാന സ്‌കൂള്‍ കായികമേളയ്ക്കിടയില്‍ പ്രതിഷേധിച്ച സ്‌കൂളുകളുടെ വിലക്ക് പിന്‍വലിച്ച് വിദ്യാഭ്യാസ വകുപ്പ്. മലപ്പുറം ജില്ലയിലെ നാവാമുകുന്ദ സ്‌കൂളിന്റെയും എറണാകുളം ജില്ലയിലെ കോതമംഗലം മാര്‍ബേസില്‍ സ്‌കൂളിന്റെയും വിലക്ക് ആണ് പിന്‍വലിച്ചത്. കായിക മേളയുടെ സമാപന ചടങ്ങില്‍ ഉണ്ടായ അനിഷ്ട സംഭവങ്ങളില്‍ ഖേദം പ്രകടിപ്പിച്ചുകൊണ്ട് അധികൃതര്‍ കത്ത് നല്‍കിയതിന്റെയും, മുഖ്യമന്ത്രിയും, സ്പീക്കറും, പ്രതിപക്ഷനേതാവും മറ്റ് വിദ്യാര്‍ത്ഥി സംഘടനകളും ഇടപെട്ടതിന്റെ കൂടി അടിസ്ഥാനത്തിലാണ് തീരുമാനമെന്ന് മന്ത്രി വി. ശിവന്‍കുട്ടി വ്യക്തമാക്കി.
''മലപ്പുറം ജില്ലയിലെ നാവാമുകുന്ദ സ്‌കൂളിന്റെയും എറണാകുളം ജില്ലയിലെ കോതമംഗലം മാര്‍ബേസില്‍ സ്‌കൂളിന്റെയും അധികാരികള്‍ എറണാകുളത്ത് വെച്ച് 2024 നവംബര്‍ 8 മുതല്‍ 11 വരെ ഒളിമ്പിക്സ് മാതൃകയില്‍ നടന്ന സംസ്ഥാന സ്‌കൂള്‍ കായിക മേളയുടെ സമാപന ചടങ്ങില്‍ ഉണ്ടായ അനിഷ്ട സംഭവങ്ങളില്‍ ഖേദം പ്രകടിപ്പിച്ചുകൊണ്ട് കത്ത് നല്‍കിയിട്ടുണ്ട്. മേലില്‍ അത്തരം സംഭവങ്ങള്‍ ഉണ്ടാകാതിരിക്കാന്‍ ശ്രദ്ധിക്കുമെന്നും, കത്തില്‍ വ്യക്തമാക്കിയിട്ടുണ്ട്.
ബഹുമാനപ്പെട്ട മുഖ്യമന്ത്രി ഈ വിഷയത്തില്‍ ഇടപെടുകയും ദേശീയ മത്സരങ്ങളില്‍ അടക്കം പങ്കെടുക്കേണ്ട കായിക വിദ്യാര്‍ത്ഥികള്‍ക്ക് ദോഷകരമായി ബാധിക്കുന്ന നടപടി ഒഴിവാക്കണമെന്ന് ആവശ്യപ്പെടുകയും ചെയ്തു. കൂടാതെ ബഹുമാനപ്പെട്ട സ്പീക്കര്‍, ബഹുമാനപ്പെട്ട പ്രതിപക്ഷ നേതാവ്, ബഹുമാനപ്പെട്ട കായിക വകുപ്പ് മന്ത്രി, ബഹുമാനപ്പെട്ട അംഗങ്ങളായ ശ്രീ. ആന്റണി ജോണ്‍, ശ്രീ. കുറുക്കോളി മൊയ്തീന്‍ അഡ്വ. ഡീന്‍ കുര്യാക്കോസ് എം.പി. എന്നിവരും കെ.എസ്.റ്റി.എ., പി.ജി.റ്റി.എ., ഡി.വൈ.എഫ്.ഐ, എസ്.എഫ്.ഐ, കെ.എസ്.യു. എന്നീ സംഘടനകളും കുട്ടികളുടെ ഭാവിയെ ബാധിക്കാത്ത നിലയില്‍ ഉള്ള നടപടികള്‍ സ്വീകരിക്കണമെന്ന് എന്നോട് രേഖാമൂലം ആവശ്യപ്പെട്ടിരുന്നു. ഇതിന്റെയൊക്കെ അടിസ്ഥാനത്തില്‍ രണ്ടായിരത്തി ഇരുപത്തിയഞ്ച് - ഇരുപത്തിയാറില്‍ നടക്കുന്ന സ്‌കൂള്‍ കായികമേളയില്‍ പങ്കെടുക്കുന്നതില്‍ വിലക്ക് കല്‍പ്പിച്ചുകൊണ്ട് 2025 ജനുവരി 2 ന് പൊതുവിദ്യാഭ്യാസ ഡയറക്ടര്‍ ഇറക്കിയ ഉത്തരവ് പിന്‍വലിച്ചുകൊണ്ടുള്ള ഉത്തരവ് ഒരാഴ്ചയ്ക്കകം ഇറങ്ങുന്നതാണ്.
എന്നാല്‍ അന്വേഷണ കമ്മീഷന്‍ സൂചിപ്പിച്ചിട്ടുള്ള ഈ നിയമ വിരുദ്ധ പ്രവര്‍ത്തനത്തിന് നേതൃത്വം കൊടുത്ത അദ്ധ്യാപകര്‍ അവര്‍ക്കുണ്ടായ വീഴ്ചയെ സംഭവിച്ചിടത്തോളം രേഖാമൂലം ഒരു അപേക്ഷയും നല്‍കിയിട്ടില്ല. അന്വേഷണ കമ്മീഷന്റെ കണ്ടെത്തലിന്റെ അടിസ്ഥാനത്തിലും നാവാമുകുന്ദ സ്‌കൂളിന്റെയും മാര്‍ബേസില്‍ സ്‌കൂളിന്റെയും അപേക്ഷയുടെ അടിസ്ഥാനത്തിലും അദ്ധ്യാപകരുടെ വീഴ്ച പരിശോധിക്കാന്‍ പ്രിന്‍സിപ്പല്‍ സെക്രട്ടറിയെ ചുമതലപ്പെടുത്തിയിരിക്കുകയാണ്. പ്രിന്‍സിപ്പല്‍ സെക്രട്ടറി റിപ്പോര്‍ട്ട് നല്‍കുന്നതിന്റെ അടിസ്ഥാനത്തില്‍ ഇക്കാര്യത്തില്‍ ആവശ്യമായ തീരുമാനം കൈക്കൊള്ളുന്നതാണ്.'' എന്നും അദ്ദേഹം പറഞ്ഞു.
https://www.facebook.com/Malayalivartha
