ബിജെപിയിലേക്കും എന്‍ഡിഎയിലേക്കും കുടിയേറിയവര്‍ക്കും കൂട്ടുകൂടിയവര്‍ക്കും കഷ്ടവും നഷ്ടവും ബാക്കി... ബിഡിജെഎസും തുഷാര്‍ വെള്ളാപ്പള്ളിയും ബിജെപി മുന്നണിയില്‍ നിന്ന് കാലിയാകാന്‍ തീരുമാനിച്ചിരിക്കുന്നു...
ബിജെപിയിലേക്കും എന്‍ഡിഎയിലേക്കും കുടിയേറിയവര്‍ക്കും കൂട്ടുകൂടിയവര്‍ക്കും കഷ്ടവും നഷ്ടവും ബാക്കി. ഏറെക്കാലത്തെ സംബന്ധത്തിനുശേഷം ബിഡിജെഎസും തുഷാര്‍ വെള്ളാപ്പള്ളിയും ബിജെപി മുന്നണിയില്‍ നിന്ന് കാലിയാകാന്‍ തീരുമാനിച്ചിരിക്കുന്നു. വല്ലാത്ത നഷ്ടക്കച്ചവടം എന്ന് വെള്ളാപ്പള്ളി നടേശനും തിരിച്ചറിഞ്ഞിരിക്കുന്നു.ഒരു പതിറ്റാണ്ട് എന്‍ഡിഎ മുന്നണിയില്‍ കുശിനിപ്പണി നടത്തിയിട്ടും ബിഡിജെഎസിന് അവിടെ ഒന്നും കിട്ടിയില്ല. ഒരു പഞ്ചായത്ത് മെംബര്‍സ്ഥാനം പോലും നേടിയെടുക്കാന്‍ ബിഡിജെഎസിന് സാധിച്ചില്ല.
രാജ്യസഭയില്‍ എംപി സ്ഥാനവും കേന്ദ്രത്തില്‍ മന്ത്രിസ്ഥാനവുമായിരുന്നു തുഷാര്‍ വെള്ളാപ്പള്ളിയുടെ അത്യാഗ്രഹം. കോട്ടയം ലോക്‌സഭാ മണ്ഡലത്തില്‍ സ്ഥാനാര്‍ഥിയായി തോല്‍ക്കുക മാത്രമല്ല ബിജെപിയിലെത്തിയ പിസി ജോര്‍ജിന് പത്തനംതിട്ട ലോക്‌സഭാ സീറ്റ് നല്‍കാതിരിക്കാനും നിലപാടെടുത്ത തുഷാര്‍ വെള്ളാപ്പള്ളിയും കൂട്ടരും ഒരാഴ്ചയ്ക്കുള്ളില്‍ ബിജെപിയില്‍ നിന്ന് പിരിയുകയാണ്.വെള്ളപ്പള്ളിയുടെ അടുത്ത നീക്കം എല്‍ഡിഎഫിലേക്കാണെന്ന സൂചനകള്‍ പുറത്തുവരുന്നു. എന്നാല്‍ തുഷാറിനെ യുഡിഎഫ് വട്ടംപിടിച്ചുണ്ടെന്നും റിപ്പോര്‍ട്ടുകള്‍ പുറത്തുവരുന്നു.
അടുത്ത മാസം ഒന്നാം തീയതി ചേര്‍ത്തലയില്‍ സംസ്ഥാന എക്‌സിക്യുട്ടീവ് യോഗം ചേര്‍ന്ന് മുന്നണി മാറ്റം ബിഡിജെഎസ് ചര്‍ച്ച ചെയ്യുകയാണ്. സംസ്ഥാന ഭാരവാഹികളോടും 14 ജില്ലകളിലെയും പ്രസിഡന്റുമാരോടും യോഗത്തില്‍ പങ്കെടുക്കാന്‍ നിര്‍ദ്ദേശിച്ചിട്ടുണ്ട്. കോട്ടയം ജില്ലാ ക്യാമ്പില്‍ മുന്നണി മാറ്റം പ്രമേയം വന്നതിന് പിന്നാലെയാണ് തുഷാര്‍ വെള്ളാപ്പള്ളി യോഗം വിളിച്ചത്. നിന്നിട്ടു യാതൊരു കാര്യമില്ലെന്നും മുന്നണി വിടുന്നതാണ് ഭേദമെന്നുമുള്ള അഭിപ്രായം പാര്‍ട്ടിയില്‍ ശക്തമായി ഉയരുകയും ചെയ്തു.
ഒന്‍പതു വര്‍ഷമായി ബിജെപിയില്‍ നിന്നും എന്‍ഡിഎയില്‍ നിന്നും അവഗണന നേരിടുകയാണ്.
കോട്ടയം പാര്‍ലമെന്റില്‍ തുഷാര്‍ വെള്ളാപ്പള്ളിക്ക് വിജയിക്കാതിരുന്നത് ബിജെപിക്കാരുടെ വോട്ട് കിട്ടാതിരുന്നതിലാണെന്നും ഈഴവ വോട്ടുകള്‍ മാത്രമേ തുഷാറിനു ലഭിച്ചുള്ളുവെന്നും കോട്ടയം ജില്ലാ നേതൃത്വം വിമര്‍ശിച്ചു.ബിജെപിയില്‍ നിന്നും എന്‍ഡിഎയില്‍ നിന്നും ഉണ്ടായിട്ടുള്ള അവഗണനയില്‍ പ്രതിഷേധിച്ചാണ് എന്‍ഡിഎ മുന്നണി വിടുവാന്‍ ബിഡിജെഎസ് കോട്ടയം ജില്ലാ നേതൃ ക്യാമ്പ് ഐകകണ്‌ഠ്യേന പ്രമേയം പാസാക്കിയത്. എന്‍ഡിഎയില്‍ തുടരേണ്ട ആവശ്യമില്ലെന്നും മറ്റു മുന്നണികളിലുള്ള സാധ്യത സംസ്ഥാന അധ്യക്ഷന്‍ പരിശോധിക്കണമെന്നുമാണ് പ്രമേയം.
വിവിധ പാര്‍ട്ടികളില്‍ നിന്ന് ബിജെപിയില്‍ ചേക്കേറിയ എല്ലാവരുടെയും ഗതി ഇതുതന്നെയാണ്. രാജ്യസഭയില്‍ എംപി സ്ഥാനവും കേന്ദ്രമന്ത്രിസ്ഥാനവും സ്വപ്‌നം കണ്ടാണ് കെ കരുണാകരന്റെ മകള്‍ പത്മജ ബിജെപിയില്‍ ആവേശത്തോടെ കാവി പുതച്ചതും കോണ്‍ഗ്രസിനെ തള്ളിപ്പറഞ്ഞതും. വന്ന വഴിയും വളന്ന വഴിയും മറന്നുപോയ പത്മജ ഇപ്പോള്‍ എവിടെയെന്നു പോലും ഒരാള്‍ക്കും അറിയില്ല. നിയമസഭാ സീറ്റില്‍ ജയിക്കാന്‍ യാതൊരു സാധ്യതയുമില്ലാത്ത ഒരു സീറ്റ് നല്‍കി തൃപ്തിപ്പെടുത്താനാണ് ബിജെപിയുടെ തീരുമാനം.
കേന്ദ്ര വനിത കമ്മീഷനില്‍ മുന്തിയ സ്ഥാനം ഉള്‍പ്പെടെ പത്മജ പ്രതീക്ഷിച്ചിരുന്നു. വലിയ മോഹത്തോടെ ബിജെപിയിലെത്തിയ പിസി ജോര്‍ജിന് അവിടെയും രക്ഷയില്ല. റബര്‍ ബോര്‍ഡ് ചെയര്‍മാന്‍ സ്ഥാനം ഉള്‍പ്പെടെ മുന്തിയ പദവികള്‍ പ്രതീക്ഷിച്ചെത്തിയ പിസി ജോര്‍ജിന് ബിജെപിയില്‍ യാതൊരു നേട്ടവുമില്ലാതായി. പത്തനംതിട്ട ലോക്‌സഭാ സീറ്റില്‍ മത്സരിക്കാന്‍പോലും പിസി ജോര്‍ഡിന് സാധിച്ചില്ല.സാക്ഷാല്‍ എകെ ആന്റണിയുടെ മകന്‍ അനില്‍ ആന്റണിക്ക് പത്തനംതിട്ടയില്‍ നിന്ന മത്സരിച്ച് നാണം കെട്ടു തോല്‍ക്കാന്‍ ഒരു അവസരം കിട്ടി.
അനിലിന്റെ കാര്യം ഏറെക്കുറെ തീര്‍ച്ചയായി കഴിഞ്ഞു. കോണ്‍ഗ്രസ് അടുത്ത നിയമസഭാ തെരഞ്ഞെടുപ്പില്‍ ഉറപ്പുള്ള സീറ്റ് നല്‍കാനിരുന്ന അനിലിന്റെ രാഷ്ട്രീയഭാവിയും തീര്‍ന്നു. അബ്ദുള്ളക്കുട്ടിക്കും ഇതുതന്നെയാണ് ഗതികേടുണ്ടായതിരിക്കുന്നത്.സിപിഎം വിട്ട് ബിജെപിയിലെത്തിയ അല്‍ഫോന്‍സ് കണ്ണന്താനത്തിന് മാത്രമാണ് അല്‍പമെങ്കിലും ഗതിയുണ്ടായത്. ഒരിക്കല്‍ എംപിയും കേന്ദ്രമന്ത്രിയുമായിരിക്കാനുള്ള അവസരം കണ്ണന്താനത്തിന് ലഭിച്ചു. കഴിഞ്ഞ അഞ്ചു വര്‍ഷമായി അല്‍ഫോന്‍സ് കണ്ണന്താനത്തെക്കുറിച്ച യാതൊരു വിവരവുമില്ല.
തിരുവിതാംകൂര്‍ ദേവസ്വം ബോര്‍ഡ് പ്രസിഡന്റായിരുന്ന ജി.രാമന്‍നായര്‍ കോണ്‍ഗ്രസ് വിട്ട് ബിജെപിയില്‍ ചേര്‍ന്നു. സംസ്ഥാന വനിതാ കമ്മീഷന്‍ അംഗമായി കോണ്‍ഗ്രസ് അംഗീകരിച്ച ഡോ. ജെ പ്രമീളാദേവി ബിജെപിയിലെത്തിയെങ്കിലും പദവിയും നേട്ടവുമൊന്നും പിന്നീട് ലഭിച്ചില്ല.
സ്ഥാനമോഹത്തോടെ ആരു ബിജെപിയിലെത്തിയാലും അമിത് ഷായും നരേന്ദ്ര മോദിയമൊന്നും തിരിഞ്ഞുനോക്കില്ലെന്ന് വ്യക്തമായിരിക്കുന്നു.കേരളത്തിലെ ബിജെപിയുടെ ഏറാന്‍മൂളികളും എന്‍ഡിഎയില്‍ വെള്ളംകോരികളും വിറകുവെട്ടികളുമായി കാലം പോക്കാമെന്നു മാത്രം.
https://www.facebook.com/Malayalivartha
