നെടുമ്പാശേരി വിമാനത്താവളത്തിലെ മാലിന്യക്കുഴിയില്‍ വീണ് മൂന്ന് വയസ്സുകാരന്‍ മരിച്ച സംഭവത്തില്‍ കൂടുതല്‍ വിവരങ്ങള്‍ പുറത്ത്. വിമാനത്താവളത്തിലെ മാലിന്യക്കുഴിയില്‍ മൂന്ന് വയസ്സുകാരന്‍ 10 മിനിറ്റോളം വീണുകിടന്നതായി സംഭവ സ്ഥലത്തുണ്ടായിരുന്നയാള്‍ പറയുന്നു. നാലടിയോളം താഴ്ചയുണ്ട് മാലിന്യക്കുഴിക്ക്. കുട്ടിയെ പുറത്തടുത്ത ഉടനെ സിപിആര്‍ കൊടുത്തു. മാലിന്യം നിറഞ്ഞ വെള്ളം പുറത്തുവന്നു. ഉടനെ ആശുപത്രിയിലേക്ക് എത്തിക്കുകയായിരുന്നുവെന്നും ദൃക്‌സാക്ഷി പറയുന്നു.

ഡൊമസ്റ്റിക് ആഗമന ടെര്‍മിനലിനടുത്ത് വെച്ച് ഇന്ന് ഉച്ചയോടെയാണ് അപകടം ഉണ്ടായത്. രാജസ്ഥാന്‍ സ്വദേശിയായ റിദാന്‍ ജാജു ആണ് മരിച്ചത്. രക്ഷിതാക്കള്‍ക്ക് ഒപ്പം നെടുമ്പാശ്ശേരിയില്‍ വിമാനമിറങ്ങിയതായിരുന്നു കുട്ടി. രക്ഷിതാക്കള്‍ കഫെയ്ക്കുള്ളിലായിരുന്ന സമയത്ത് മൂത്ത കുട്ടിക്ക് ഒപ്പം പുറത്ത് കളിക്കുകയായിരുന്നു റിദാന്‍. തുടര്‍ന്ന് മാലിന്യം നിറഞ്ഞ കുഴിയിലേക്ക് വീഴുകയായിരുന്നു.

കുട്ടിയെ കളിച്ചുകൊണ്ടിരിക്കെ കാണാതായതോടെ സിയാല്‍ സെക്യൂരിറ്റി വിഭാഗത്തിന്റെ സഹായത്തോടെ മാതാപിതാക്കള്‍ സിസിടിവി ക്യാമറ പരിശോധിച്ചു. കുട്ടി കുഴിയില്‍ വീണെന്ന് അപ്പോഴാണ് മനസ്സിലായത്. അപ്പോഴേക്കും പൊലീസും കാര്‍ഗോ ജീവനക്കാരും എത്തി ഉടന്‍ കുട്ടിയെ പുറത്തെടുത്തു. പ്രാഥമിക ശുശ്രൂഷ നല്‍കി ആശുപത്രിയില്‍ എത്തിച്ചെങ്കിലും അപ്പോഴേക്കും മരിച്ചിരുന്നു.

പൊതുജനങ്ങള്‍ക്ക് പ്രവേശനമില്ലാത്ത സ്ഥലത്ത് വെച്ചാണ് അപകടം നടന്നതെന്നാണ് സിയാല്‍ വാര്‍ത്താക്കുറിപ്പിലൂടെ അറിയിച്ചത്.തുടര്‍നടപടികള്‍ക്കായി സിയാല്‍ അധികൃതര്‍ കുടുംബത്തിനൊപ്പമുണ്ടെന്ന് അധികൃതര്‍ അറിയിച്ചു. മാതാപിതാക്കള്‍ക്ക് എല്ലാ പിന്തുണയും നല്‍കുമെന്നും സിയാല്‍ അറിയിച്ചു. എന്നാല്‍ കുഴി എന്തുകൊണ്ട് മൂടിയിട്ടില്ല എന്നാണ് ഉയരുന്ന ചോദ്യം. ഇവിടെ മുന്നറിയിപ്പ് ബോര്‍ഡ് സ്ഥാപിച്ചിട്ടുമില്ല.