വഞ്ചന കേസില്‍ പെരിന്തല്‍മണ്ണ എംഎല്‍എ നജീബ് കാന്തപുരത്തിനെതിരെ കേസെടുത്ത് പൊലീസ്. പകുതിവിലയ്ക്ക് ലാപ്‌ടോപ് വാഗ്ദാനം ചെയ്തു പണംതട്ടിയ സംഭവവുമായി ബന്ധപ്പെട്ട് യുവതി നല്‍കിയ പരാതിയിലാണ് നജീബ് കാന്തപുരത്തിനെതിരെ പെരിന്തല്‍മണ്ണ പൊലീസ് കേസെടുത്തിരിക്കുന്നത്. പുലാമന്തോള്‍ സ്വദേശിനിയായ യുവതിയാണു പരാതിക്കാരി. വഞ്ചനാ കുറ്റത്തിനുള്ള വകുപ്പുകള്‍ ചുമത്തിയാണു കേസ്.

നജീബ് കാന്തപുരം എംഎല്‍എയും മറ്റൊരാളും ചേര്‍ന്നു വിലയുടെ 50% നല്‍കിയാല്‍ ലാപ്ടോപ് തരാമെന്നു പറഞ്ഞു വഞ്ചിച്ചെന്നാണ് പരാതി. 40 ദിവസത്തിനകം ലാപ്‌ടോപ് നല്‍കുമെന്നായിരുന്നു വാഗ്ദാനം. 2024 സെപ്റ്റംബറില്‍ എംഎല്‍എ ഓഫിസില്‍ വച്ച് 21,000 രൂപ നല്‍കിയെന്നും യുവതിയുടെ പരാതിയില്‍ പറയുന്നു.

40 ദിവസം കഴിഞ്ഞിട്ടും ലാപ്ടോപ് നല്‍കിയില്ലെന്നും പണം തിരികെ നല്‍കിയില്ലെന്നും പരാതിയില്‍ ആരോപിക്കുന്നുണ്ട്. തുടര്‍ന്നാണ് നജീബ് കാന്തപുരത്തിനെതിരെ പൊലീസ് കേസ് എടുത്തത്. ഭാരതീയ ന്യായ സംഹിതയുടെ 318 (4), 3(5) വകുപ്പുകള്‍ പ്രകാരമാണ് കേസ്.