മുക്കത്ത് മാമ്പറ്റയില്‍ സങ്കേതം ഹോട്ടല്‍ ജീവനക്കാരിയെ പീഡിപ്പിക്കാന്‍ ശ്രമിച്ച കേസില്‍ ഹോട്ടല്‍ ഉടമ ദേവദാസിനെതിരെ കൂടുതല്‍ വെളിപ്പെടുത്തലുമായി അതിജീവിത. ആസൂത്രിതമായാണ് ആക്രമണം നടത്തിയതെന്നും മുന്‍പും മോശമായി പെരുമാറിയിട്ടുണ്ടെന്നും യുവതിയുടെ വെളിപ്പെടുത്തല്‍.

സംഭവദിവസം മറ്റ് ജീവനക്കാരെ നേരത്തെ പറഞ്ഞയച്ചിരുന്നുവെന്ന് അതിജീവിത പറയുന്നു. ദേവദാസ് യുവതിയെ പീഡിപ്പിക്കാന്‍ ശ്രമിക്കുന്നതിന്റെയും ഇവര്‍ നിലവിളിക്കുന്നതിന്റെയും യുവതിയുടെ ഫോണിലെ ദൃശ്യങ്ങള്‍ പുറത്തുവന്നിരുന്നു. ഫോണില്‍ ഗെയിം കളിക്കുകയായിരുന്ന യുവതിയുടെ മൊബൈല്‍ ഫോണിലെ സ്‌ക്രീന്‍ റെക്കോഡില്‍ പതിഞ്ഞതാണ് ദൃശ്യങ്ങള്‍.

ആദ്യം മകളോടെന്ന രീതിയിലായിരുന്നു പെരുമാറ്റം. പിന്നീട് പെരുമാറ്റത്തില്‍ മാറ്റം ശ്രദ്ധയില്‍പ്പെട്ടപ്പോള്‍ മുന്നറിയിപ്പ് നല്‍കി. തുടര്‍ന്ന് ഇനി ആവര്‍ത്തിക്കില്ലെന്ന് പറഞ്ഞു. കെട്ടിടത്തില്‍ നിന്ന് വീണ് പരിക്കേറ്റിട്ടും വലിച്ചിഴച്ച് അകത്തേയ്ക്ക് കൊണ്ടുപോകാന്‍ ശ്രമിച്ചു. ആസൂത്രിതമായാണ് ആക്രമിച്ചത്. സംഭവദിവസം മറ്റ് ജീവനക്കാരെ നേരത്തെ പറഞ്ഞയച്ചിരുന്നു. ചികിത്സയിലിരിക്കെ ഭീഷണി സന്ദേശം അയച്ചു. നിനക്കുള്ള ആദ്യത്തെ ഡോസാണിതെന്നായിരുന്നു സന്ദേശമെന്നും യുവതി വെളിപ്പെടുത്തി.

ദേവദാസിന്റെ ഉടമസ്ഥതയിലുള്ള സങ്കേതം എന്ന ഹോട്ടലിലെ ജീവനക്കാരിയായിരുന്ന യുവതിക്ക് നേരെയാണ് പീഡനശ്രമം നടന്നത്. സംഭവദിവസം രാത്രിയോടെ ഹോട്ടലിലെ ജീവനക്കാര്‍ താമസിക്കുന്നയിടത്തേക്ക് അതിക്രമിച്ചെത്തി യുവതിയെ പീഡിപ്പിക്കാന്‍ ശ്രമിക്കുകയായിരുന്നു.

ഭയന്ന യുവതി കെട്ടിടത്തിന്റെ മുകളില്‍നിന്ന് ചാടി. വാരിയെല്ലിനും നട്ടെല്ലിനും ഗുരുതര പരുക്കേറ്റ യുവതി കോഴിക്കോട് മെഡിക്കല്‍ കോളേജിലാണ് ചികിത്സയിലുള്ളത്. സംഭവത്തില്‍ അറസ്റ്റിലായ ദേവദാസ് റിമാന്‍ഡിലാണ്. എറണാകുളത്തേക്കുള്ള ബസ് യാത്രയ്ക്കിടെ കുന്ദംകുളത്ത് നിന്നാണ് ഇയാളെ പിടികൂടിയത്. യുവതി താമസിച്ചിരുന്ന വീട്ടിലെത്തിച്ച് തെളിവെടുപ്പ് നടത്തി.