തൃത്താല ഹൈസ്‌കൂള്‍ കെട്ടിടത്തില്‍ ദുരൂഹ സാഹചര്യത്തില്‍ തീപിടിത്തം
തൃത്താല ഹൈസ്‌കൂള്‍ കെട്ടിടത്തില്‍ ദുരൂഹ സാഹചര്യത്തില്‍ തീപിടിത്തം. കെട്ടിടത്തിനരികെ അജ്ഞാതരായ മൂന്ന് പേരുടെ സാന്നിധ്യം കണ്ടെത്തി. അന്വേഷണം ആവശ്യപ്പെട്ട് സ്‌കൂള്‍ അധികൃതര്‍ തൃത്താല പൊലീസില്‍ പരാതി നല്‍കി. പ്ലസ് ടു, പത്താം ക്ലാസ് പരീക്ഷ നടക്കാന്‍ ദിവസങ്ങള്‍ മാത്രം ബാക്കി നില്‍ക്കെ തൃത്താല ഡോ. കെ ബി മേനോന്‍ മെമ്മോറിയല്‍ ഹയര്‍ സെക്കന്‍ഡറി സ്‌കൂളിലെ കെട്ടിടത്തിലാണ് തീപിടിത്തമുണ്ടായത്.
ശനിയാഴ്ച ഉച്ചയ്ക്ക് 2 മണിയോടെ സ്‌കൂള്‍ ഓഫീസിന് പിന്‍വശത്തെ ബസ് ഷഡിന്റെ മുകളിലാണ് തീ പടര്‍ന്ന് പിടിച്ചത്. ഉടന്‍ തന്നെ സ്‌കൂളിലെ പ്രധാനാധ്യാപകനായ രാജേഷ് രാമചന്ദ്രന്‍, ഓഫീസ് അറ്റന്‍ഡര്‍ അബ്ദുള്‍ കബീര്‍, പരിസരവാസികള്‍ എന്നിവര്‍ ചേര്‍ന്ന് വെള്ളമൊഴിച്ച് തീ കൂടുതല്‍ ഭാഗങ്ങളിലേക്ക് പടരാതെ തടയാന്‍ ശ്രമിച്ചു. ഉടന്‍ തന്നെ പട്ടാമ്പിയില്‍ നിന്നും രണ്ട് ഫയര്‍ യൂണിറ്റുകള്‍ സ്ഥലത്തെത്തി തീ പൂര്‍ണ്ണമായി അണച്ചു.
തീ അണക്കുന്നതിനിടെ മേല്‍ക്കൂരയില്‍ പാതി കത്തിക്കൊണ്ടിരിക്കുന്ന വിറക് കഷണം കണ്ടെത്തിയതോടെയാണ് സംഭവത്തില്‍ ദുരൂഹത വെളിവാകുന്നത്. താഴെ സമീപത്തായി കരിയിലകള്‍ കൂട്ടിയിട്ട് കത്തിച്ചതായും കണ്ടെത്തിയിട്ടുണ്ട്. കൂടാതെ ഈ കെട്ടിടത്തിനരികില്‍ അജ്ഞാതരായ മുവര്‍ സംഘത്തെ സമീപത്ത് ആട് മേയ്ക്കുകയായിരുന്ന വയോധികന്‍ കാണുകയും ചെയ്തിട്ടുണ്ട്. ഈ വര്‍ഷത്തെ പത്താം ക്ലാസ്, പ്ലസ് ടു പരീക്ഷകള്‍ നടക്കാന്‍ ദിവസങ്ങള്‍ മാത്രം ശേഷിക്കേ ഉത്തര പേപ്പറുകളും ഹയര്‍ സെക്കന്‍ഡറി ചോദ്യപേപ്പറുകളും സൂക്ഷിക്കാറുള്ള മുറിയുടെ തൊട്ടടുത്തായുള്ള തീ പിടിത്തത്തെ സ്‌കൂള്‍ അധികൃതര്‍ അതീവ ഗൗരവകരമായാണ് കാണുന്നത്. സംഭവത്തില്‍ സ്‌കൂള്‍ അധികൃതര്‍ അന്വേഷണം ആവശ്യപ്പെട്ട് തൃത്താല പൊലീസില്‍ പരാതി നല്‍കി.
https://www.facebook.com/Malayalivartha
