മകളുടെ പരാതിയില്‍ കല്ലറ തുറന്ന് പോസ്റ്റ്മോര്ട്ടം നടത്തിയ സജിയുടെ മരണകാരണം പുറത്ത്
ചേര്‍ത്തലയില്‍ മകളുടെ പരാതിയില്‍ കല്ലറ തുറന്ന് പോസ്റ്റ്മോര്ട്ടം നടത്തിയ സജിയുടെ മരണകാരണം പുറത്ത്. വീട്ടമ്മ സജിയുടെ മരണത്തില്‍ ഭര്‍ത്താവ് സോണിക്കെതിരെ മനപൂര്‍വമല്ലാത്ത നരഹത്യയ്ക്ക് കേസെടുത്ത് പൊലീസ്. കസ്റ്റഡിയിലുള്ള സോണിയുടെ അറസ്റ്റ് ഉടന്‍ രേഖപ്പെടുത്തും.
സജിയുടെ തലയ്ക്ക് പിന്നില്‍ ചതവും തലയോട്ടിയില്‍ പൊട്ടലുമുണ്ടെന്ന് പോസ്റ്റ്മോര്ട്ടം റിപ്പോര്‍ട്ടില്‍ വ്യക്തമായിട്ടുണ്ട്. ഇന്നലെയാണ് കല്ലറ തുറന്ന് സജിയുടെ മൃതദേഹം പുറത്തെടുത്തത്. ഇന്ന് ഉച്ചയോടെ പോസ്റ്റ്മോര്ട്ടം പൂര്‍ത്തിയായി. പരിക്കേറ്റ് തലയില്‍ ശസ്ത്രക്രിയ പൂര്‍ത്തിയാക്കി ഒരു മാസത്തോളം ചികിത്സയിലിരുന്ന ശേഷമാണ് സജി മരിക്കുന്നത്.
അതുകൊണ്ട് തന്നെ വിശദമായ പോസ്റ്റ്മോര്ട്ടം റിപ്പോര്‍ട്ടിലെ കൂടുതല്‍ കാര്യങ്ങള്‍ വ്യക്തമാകൂ. ഒരാഴ്ചയ്ക്കകം ഇത്‌പോലീസിന് ലഭിക്കും. പോസ്റ്റ്മോര്ട്ടം നടത്തിയ ഫോറെന്‍സിക് സര്‍ജന്റെ മൊഴി പോലിസ് രേഖപ്പെടുത്തിയിട്ടുണ്ട്. സജിക്ക് ഭര്‍ത്താവ് സോണിയില്‍ നിന്ന് ക്രൂരമായ മര്‍ദനമേറ്റെന്ന മകളുടെ പരാതിയെ തുടര്‍ന്നായിരുന്നു മൃതദേഹം കല്ലറ തുറന്ന് പുറത്ത് എടുത്ത് പോസ്റ്റ്മോര്ട്ടം നടത്തിയത്. ബന്ധുക്കള്‍ ഏറ്റുവാങ്ങിയ സജിയുടെ മൃതദേഹം മുട്ടം സെന്റ്‌മേരിസ് ഫൊറോനപള്ളിയില്‍ സംസ്‌കരിച്ചു.
https://www.facebook.com/Malayalivartha
