കേരളത്തില്‍ അഭയം തേടിയ ഝാര്‍ഖണ്ഡ് ദമ്പതികള്‍ക്ക് പോലീസ് സംരക്ഷണം നല്‍കണമെന്ന് ഹൈക്കോടതി
കേരളത്തില്‍ അഭയം തേടിയ ഝാര്‍ഖണ്ഡ് സ്വദേശികളായ ദമ്പതികള്‍ക്ക് പോലീസ് സംരക്ഷണം നല്‍കണമെന്ന് ഹൈക്കോടതിയുടെ ഇടക്കാല ഉത്തരവ്. ലൗ ജിഹാദ് ആരോപണത്തെ തുടര്‍ന്ന് നാടുവിട്ട് കേരളത്തിലെത്തിയ ആശാവര്‍മയും മുഹമ്മദ് ഗാലിബും ഫെബ്രുവരി 11നാണ് സ്‌പെഷ്യല്‍ മാരേജ് ആക്ട് പ്രകാരം വിവാഹിതരായത്. ഇരുവരെയും നാട്ടിലേക്ക് കൊണ്ട് പോവാന്‍ പാടില്ല. അടുത്തയാഴ്ച കോടതി ഹര്‍ജി പരിഗണിക്കും വരെ പോലീസ് പ്രൊട്ടക്ഷന്‍ കൊടുക്കണമെന്നും ഹൈക്കോടതി വ്യക്തമാക്കി.
26 കാരി ആശാവര്‍മയെ തട്ടിക്കൊണ്ടുപോയി എന്ന കേസില്‍ മുഹമ്മദ് ഗാലിബിനെതിരെ അറസ്റ്റ് വാറണ്ട് നില നില്‍ക്കെ ഹൈക്കോടതിയുടെ ഉത്തരവ് ദമ്പതികള്‍ക്ക് ആശ്വാസമായി. ഹൈക്കോടതി സിംഗിള്‍ ബെഞ്ച് ജസ്റ്റിസ് CS ഡയസ് ആണ് ഉത്തരവിറക്കിയത്. ദമ്പതികള്‍ക്ക് വേണ്ടി അഭിഭാഷകന്‍ ശ്രാവണ്‍ ഹാജരായി. ഇരുവര്‍ക്കും പൊലീസ് പ്രൊട്ടക്ഷന്‍ നല്‍കാന്‍ ആലപ്പുഴ ജില്ലാ പൊലീസ് മേധാവിക്കും കായംകുളം എസ് എച്ച്ഒയ്ക്കും കോടതി നിര്‍ദ്ദേശം നല്‍കി. അടുത്തയാഴ്ച കേസ് വീണ്ടും പരിഗണിക്കും.
ഇതോടെ മുഹമ്മദ് ഗാലിബിനായി അറസ്റ്റ് വാറന്റുമായി കായംകുളത്ത് എത്തിയ ഝാര്‍ഖണ്ഡ് രാജ്‌റപ്പ പോലീസിന് തിരികെ മടങ്ങേണ്ടി വരും. മുഹമ്മദ് ഗാലിബിനൊപ്പം ആശ വര്‍മ്മ എത്തിയത് സ്വന്തം ഇഷ്ടപ്രകാരമെന്ന് ആശാവര്‍മയുടെ മൊഴിയും വിവാഹ സര്‍ട്ടിഫിക്കറ്റില്‍ നിന്നും പൊലീസിന് ബോധ്യപ്പെട്ടിരുന്നു. അതേസമയം, ആശാവര്‍മ്മയ്ക്കും മുഹമ്മദ് ഗാലിബിനും പൂര്‍ണ്ണ സംരക്ഷണം നല്‍കുമെന്ന് DYFI ജില്ലാ സെക്രട്ടറി ജെയിംസ് സാമൂവല്‍ വ്യക്തമാക്കി.
https://www.facebook.com/Malayalivartha
