വെഞ്ഞാറമൂട് കൂട്ടക്കൊലപാതക കേസിലെ പ്രതി അഫാന്റെ പിതാവ് അബ്ദുറഹീം നാട്ടിലെത്തി. ഏഴ് വര്‍ഷത്തിന് ശേഷമാണ് ഇദ്ദേഹം നാട്ടിലേക്ക് വരുന്നത്.

സൗദിയിലെ ദമ്മാമില്‍ നിന്ന് തിരിച്ച അദ്ദേഹം എയര്‍ ഇന്ത്യ എക്‌സ്പ്രസില്‍ രാവിലെ എട്ട് മണിയോടെയാണ് തിരുവനന്തപുരത്തെത്തിയത്. സാമ്പത്തിക പ്രതിസന്ധിയും താമസ രേഖയില്ലാത്തതും റഹീമിന്റെ യാത്ര പ്രതിസന്ധിയിലാക്കിയിട്ടുണ്ടായിരുന്നു. സാമൂഹ്യ പ്രവര്‍ത്തകന്റെ ഇടപെടലിലൂടെയാണ് നാട്ടിലെത്താന്‍ കഴിഞ്ഞത്

അതേസമയം ഏഴ് വര്‍ഷത്തിന് ശേഷം നാട്ടിലേക്കെത്തുമ്പോള്‍ പ്രിയപ്പെട്ടവരൊന്നും വീട്ടിലില്ല. ഉമ്മയും മകനും സഹോദരനും സഹോദരിയെയും മൂത്ത മകന്‍ കൊലപ്പെടുത്തി. ഭാര്യ മകന്റെ ക്രൂരതക്കിരയായി ആശുപത്രിയിലും. തണലാകേണ്ട മൂത്ത മകന്‍ കൊലപാതകത്തിന് പൊലീസ് കസ്റ്റഡിയിലാണ്. അടക്കാനാവാത്ത ദുഃഖത്തിലാണ് അബ്ദുറഹീം.

റിയാദിലെ കട നഷ്ടം വന്ന് പൂട്ടേണ്ടി വന്നതോടെ അബ്ദുറഹീമിന് വലിയ സാമ്പത്തിക ബാദ്ധ്യത വന്നിട്ടുണ്ടായിരുന്നു. രണ്ടര വര്‍ഷമായി ഇഖാമയും പുതുക്കാനായി കഴിഞ്ഞില്ല. സാമൂഹ്യ പ്രവര്‍ത്തകന്‍ നാസ് വക്കമാണ് ഇപ്പോള്‍ അബ്ദുറഹീമിന്റെ രക്ഷയ്ക്കെത്തിയത്. പൊലീസ് കേസില്ലെന്ന് പാസ്‌പോര്‍ട്ട് വിഭാഗത്തില്‍ നിന്നും സ്ഥിരീകരിച്ചതോടെ നാട്ടിലേക്കുള്ള വഴിയൊരുക്കിയതും ഇദ്ദേഹമായിരുന്നു.