കണ്ണീര്‍ക്കാഴ്ചയായി... ആറ്റുകാല്‍ പൊങ്കാലയിടുന്നതിനിടെ ഹൃദയാഘാതം, പൊതുഭരണ വകുപ്പ് മുന്‍ സ്പെഷ്യല്‍ സെക്രട്ടറി മരിച്ചു. എറണാകുളം ഉദ്യോഗമണ്ഡല്‍ ഏലൂര്‍ നാറാണത്ത് ശ്രീകൃഷ്ണസ്വാമി ക്ഷേത്രത്തിന് സമീപം എട്ടിയേടത്ത് ശാന്തി സദനില്‍ ജി.രാജേശ്വരിയാണ് (66) മരിച്ചത്.

മുന്‍മന്ത്രി പി.കെ.ജയലക്ഷ്മിയുടെ പ്രൈവറ്റ് സെക്രട്ടറിയായിരുന്നു. ഇന്നലെ ഉച്ചയ്ക്ക് 12.30നാണ് സംഭവം നടന്നത്. തിരുവനന്തപുരം ഗാന്ധാരി അമ്മന്‍കോവിലിന് സമീപത്തെ വാടക വീടിന് മുന്നില്‍ നിന്ന് പൊങ്കാലയിടുമ്പോഴാണ് ഹൃദയാഘാതം സംഭവിച്ചത്. തുടര്‍ന്ന് കുഴഞ്ഞുവീണു. കൂടെയുണ്ടായിരുന്നവര്‍ ഉടന്‍ തന്നെ ജനറല്‍ ആശുപത്രിയിലെത്തിച്ചെങ്കിലും വൈകുന്നേരം മൂന്നോടെ മരിച്ചു. അവിവാഹിതയാണ്.


കേരള സെക്രട്ടേറിയറ്റ് അസോസിയേഷന്‍ മുന്‍ നേതാവായിരുന്നു. സെക്രട്ടേറിയറ്റ് വനിതാവേദിയുടെ മുന്‍ പ്രസിഡന്റുമായിരുന്നു. മൃതദേഹം ഇന്ന് പോസ്റ്റുമോര്‍ട്ടത്തിന് ശേഷം എറണാകുളത്ത് സംസ്‌കാര ചടങ്ങുകള്‍ നടക്കും.