സ്‌കൂള്‍ വിദ്യാര്‍ഥികളുമായി പോയ ഓട്ടോറിക്ഷ മറിഞ്ഞ് ഡ്രൈവര്‍ക്ക് ദാരുണാന്ത്യം. നെല്ലിമുണ്ട സ്വദേശി ചീരങ്ങല്‍ ഫൈസല്‍ (42) ആണ് മരിച്ചത്. ഇന്നു രാവിലെ 10 മണിയോടെയായിരുന്നു അപകടം. മേപ്പാടി സെന്റ് ജോസഫ് സ്‌കൂളിനു സമീപമാണ് ഓട്ടോറിക്ഷ മറിഞ്ഞത്. ഓട്ടോയിലുണ്ടായിരുന്ന 5 വിദ്യാര്‍ഥികള്‍ക്കും അപകടത്തില്‍ പരുക്കേറ്റു. ഇവരുടെ പരുക്ക് സാരമുള്ളതല്ല.

റോഡ് മുറിച്ചു കടന്ന കുട്ടിയെ രക്ഷിക്കാനായി പെട്ടെന്ന് ബ്രേക്ക് ചെയ്തതോടെ ഓട്ടോറിക്ഷ മറിയുകയായിരുന്നുവെന്നാണ് വിവരം. അപകടത്തെ തുടര്‍ന്ന് ഫൈസല്‍ ഓട്ടോയുടെ അടിയില്‍പ്പെടുകയായിരുന്നു. മേപ്പാടിയില്‍ സ്വകാര്യ മെഡിക്കല്‍ കോളജില്‍ ചികിത്സയിലിരിക്കെ മൂന്നു മണിയോടെയാണ് മരണം സംഭവിച്ചത്.